ឯកឧត្តម ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានគូសបញ្ជាក់ថា មុនពេលមានការប្រកាសបើកប្រទេសឡើងវិញពីរដ្ឋាភិបាលចិន កម្ពុជា-ចិន មានជើងហោះហើរចំនួន ៣០ជើងក្នុងមួយសប្ដាហ៍ មានន័យថា ក្រុមហ៊ុនអាកាសចរណ៍ខ្មែរអាចហោះទៅប្រទេសចិនចំនួន ១៥ជើង ក្នុងមួយសប្ដាហ៍ និងក្រុមហ៊ុនអាកាសចរណ៍ចិនអាចហោះមកប្រទេសកម្ពុជាចំនួន១៥ជើងដូចគ្នា។ បច្ចុប្បន្ន ក្រុមហ៊ុនអាកាសចរណ៍ចិនដែលកំពុងប្រតិបត្តិការហោះហើរចេញចូលកម្ពុជា មានចំនួន៦ក្រុមហ៊ុន។
យ៉ាងណាមិញ ចំពោះស្ថានភាពការហោះហើររវាងកម្ពុជា-ចិននាពេលបច្ចុប្បន្ននេះ ត្រូវបានឯកឧត្តម ស៊ិន ចាន់សិរីវុត្ថា បញ្ជាក់ថា ហាក់មិនទាន់មានការវិវត្តន៍អ្វីគួរឲ្យកត់សម្គាល់នោះទេ ទោះចិនបានបើកទ្វារប្រទេសសម្រាប់ការហោះហើរជាអន្តរបានប្រមាណជាង ១សប្ដាហ៍ទៅហើយក្ដី។ ទោះយ៉ាងណា ឯកឧត្តម ស៊ិន ចាន់សិរីវុត្ថា បានបង្ហាញក្ដីរំពឹងថា ការហោះហើរពីចិនមកកម្ពុជានឹងមានការឡើងវិញជាបន្តបន្ទាប់ ក្រោយពិធីបុណ្យចូលឆ្នាំប្រពៃណីចិន នាពេលខាងមុខ។
អត្ថបទគួរអាន
យោងតាមរបាយការណ៍របស់រដ្ឋលេខាធិការដ្ឋានអាកាសចរស៊ីវិល គិតត្រឹមបំណាច់ខែធ្នូ ឆ្នាំ២០២២ មានក្រុមហ៊ុនអាកាសចរណ៍អន្តរជាតិ ចំនួន២៧ ក្រុមហ៊ុន បានតភ្ជាប់ជើងហោះហើរឡើងវិញ គឺស្មើនឹងជិត៦០% នៃឆ្នាំ២០១៩ ដែលកំពុងហោះហើរចេញ-ចូល កម្ពុជា ដោយនៅឆ្នាំ២០១៩ មានមានក្រុមហ៊ុនអាកាសចរណ៍ចំនួន៤៤ ក្រុមហ៊ុន ដែលធ្លាប់បានធ្វើការហោះហើរ។ ដោយឡែក ក្នុងឆ្នាំ២០២២ កម្ពុជាទទួលបានអ្នកដំណើរ ចំនួនជាង ២ លាននាក់ មានការកើនឡើងជិត៩០០ % បើធៀបទៅនឹងរយៈពេលដូចគ្នានៅឆ្នាំ២០២១។ ក្នុងនោះ ចំនួនជើងហោះហើរមានចំនួនជិត ៣សែនជើង មានការកើនឡើងជាង២៦០% បើធៀបទៅនឹងរយៈពេលដូចគ្នានៅឆ្នាំ២០២១។
សូមបញ្ជាក់ថា ជាមួយក្ដីរំពឹងនៃការត្រឡប់មកវិញនៃទេសចរចិន កម្ពុជារំពឹងថា នឹងទទួលបានទេសចរអន្តរជាតិប្រមាណ ៧លាននាក់ នៅឆ្នាំ២០២៥ ដូចការគ្រោងទុកក្នុងផែនទីចង្អុលផ្លូវស្តីពីផែនការស្ដារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ១៩៕
