កម្ពុជានៅតែកំពុងរកឱកាសនាំចេញអង្ករទៅកាន់បណ្ដាប្រទេសអាស៊ាន!

លោក លន់ យ៉េង អគ្គលេខាធិការនៃសហព័ន្ធស្រូវអង្ករកម្ពុជាបានបញ្ជាក់ថា កម្ពុជាកំពុងសិក្សាលទ្ធភាព និង ស្វែងរកទីផ្សារនាំចេញអង្ករទៅហ្វីលីពីន ដែលជាប្រទេសបញ្ជាទិញអង្ករដ៏ធំមួយនៅតំបន់អាស៊ីអាគ្នេយ៍។

ក្រៅពីទីផ្សារហ្វីលីពីន កម្ពុជា ក៏កំពុងសិក្សាលទ្ធភាពទីផ្សារអង្ករនៅប្រទេសឥណ្ឌូណេស៊ី ដែលជាទីផ្សារធំជាងគេមួយនៅតំបន់អាស៊ានផងដែរ។

មែនទែនទៅ នេះមិនមែនជាលើកទី១នោះទេ ដែលកម្ពុជាសិក្សាលទ្ធភាពក្នុងការនាំចេញអង្ករទៅកាន់ទីផ្សារហ្វីលីពីន ពោលគឺកម្ពុជាធ្លាប់សិក្សាជាច្រើនលើករួចមកហើយ ប៉ុន្តែគ្មានលទ្ធផល។ បើតាមលោក លន់ យ៉េង មូលហេតុដែលអង្ករកម្ពុជាមិនអាចជ្រែកចូលទីផ្សារហ្វីលីពីនបាន នាពេលកន្លងមក ដោយសារអង្ករកម្ពុជាមានតម្លៃថ្លៃជាងអង្កររបស់ប្រទេសមួយចំនួន។ 

ម្យ៉ាងទៀត កម្ពុជាភាគច្រើននាំចេញតែអង្ករប្រណីត និងអង្ករក្រអូប ខណៈការនាំចូលទៅកាន់ទីផ្សារហ្វីលីពីនភាគច្រើនជាប្រភេទអង្ករ ស តែប៉ុណ្ណោះ។

ការនាំចេញអង្កររបស់កម្ពុជា ងាកមកទីផ្សារអាស៊ាននេះ ត្រូវបានគេមើលឃើញថា នៅចំពេលដែលការនាំចេញអង្ករទៅកាន់ទីផ្សារអឺរ៉ុបនៅតែបន្តជួបបញ្ហាធ្ងន់ធ្ងរ ដោយសារតម្លៃដឹកជញ្ជូនឡើងថ្លៃខ្លាំង និងកង្វះទូកុងតឺន័រ។ ដូច្នេះ ការធ្វើពិពិធកម្មទីផ្សារនាំចេញ គឺជាកត្តាសំខាន់មួយ ក្នុងការជួយស្តារ និងជំរុញការនាំចេញអង្កររបស់កម្ពុជា ដែលជួបបញ្ហាធ្លាក់ចុះមួយរយៈចុងក្រោយនេះ។

របាយការណ៍ពីក្រសួងកសិកម្មបង្ហាញថា ៥ខែឆ្នាំ២០២១ កម្ពុជានាំចេញអង្ករសម្រេចបានជាង២៣ម៉ឺនតោន ធ្លាក់ចុះជាង៣៤% បើធៀបនឹងរយៈពេលដូចគ្នាកាលពីឆ្នាំមុន ដែលសម្រេចបានរហូតដល់ជាង៣៥ម៉ឺនតោន៕