បើតាមទិន្នន័យរបស់ក្រសួងសាធារណការ និងដឹកជញ្ជូន បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនសរុបជាង៧៥ម៉ឺនទូក្នុង១ឆ្នាំ ហើយគម្រោងថ្មីនេះ នឹងអនុញ្ញាតឱ្យកប៉ាល់ផ្ទុកទូកុងតឺន័រធំៗនៅតំបន់អាស៊ីប៉ាស៊ីហ្វិកជាង៩០% ចូលចតបាន ដែលនឹងកាត់បន្ថយថ្លៃដឹកជញ្ជូនរហូតដល់២០០ដុល្លារក្នុង១ទូកុងតឺន័រ ដែលអាចធ្វើឱ្យកម្ពុជាចំណេញប្រមាណ១៥០លានដុល្លារក្នុង១ឆ្នាំ។
ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានគូសបញ្ជាក់ថា នៅក្នុងរយៈពេល១១ខែ ឆ្នាំ២០២៣ បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុ មានចំនួនប្រមាណ ជាង៧លានតោន កើនឡើងជាង១១% ដោយបានផ្តល់ចំណូលអាជីវកម្មជាង៨៥លានដុល្លារអាម៉េរិក កើនឡើងជិត៣% បើធៀបនឹងរយៈពេលដូចគ្នាកាលពីឆ្នាំ២០២២។ ថ្នាក់ដឹកនាំរូបនេះបានគូសបញ្ជាក់ថា បរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុ មានចំនួនសរុបជាង៧៥ម៉ឺន TEUs ដោយមានកំណើនជាមធ្យម១១% ក្នុងរយៈពេល១២ឆ្នាំចុងក្រោយ គិតចាប់ពីឆ្នាំ២០១០ ដល់ឆ្នាំ២០២២។ការណ៍នេះបានចូលរួមចំណែកក្នុងការរក្សាកំណើនសេដ្ឋកិច្ចជាតិប្រចាំឆ្នាំក្នុងរង្វង់៧% ប្រកបដោយចីរភាពក្នុងរយៈពេល២ទសវត្សរ៍ចុងក្រោយមុនការផ្ទុះឡើងការរីករាលដាលនៃជំងឺកូវីដ-១៩ និងវិបត្តិនៃសង្គ្រាមរុស្ស៊ី-អ៊ុយក្រែន។
អត្ថបទគួរអាន
បើតាមការគូសបញ្ជាក់របស់ថ្នាក់ដឹកនាំរូបនេះ ក្រោយកំពង់ផែនេះ បញ្ចប់ការសាងសង់ជំហានទី១ វានឹងជួយកាត់បន្ថយថ្លៃដឹកជញ្ចូនរបស់កម្ពុជាយ៉ាងហោយណាស់២០០ដុល្លារក្នុងទូកុងតឺន័រ។ ដូច្នេះប្រសិនបើក្នុង១ឆ្នាំកំពង់ផែនេះ មានទូរកុងតឺន័រឆ្លងកាត់៧៥ម៉ឺនទូកុងតឺន័រ នោះកម្ពុជាអាចទទួលបានប្រាក់ចំណេញប្រមាណ១៥០លានដុល្លារក្នុង១ឆ្នាំ។ តែយ៉ាងណាប្រាក់ចំណេញដែលកម្ពុជាទទួលបានអាចនឹងមានច្រើនជាងនេះ ដោយសារក្រោយកំពង់ផែនេះបញ្ចប់ការសាងសង់ជំហានទី១ ទូកុងតឺន័រឆ្លងកាត់កំពង់ផែ ទំនងជាក៏មានការកើនឡើងផងដែរ។
អ្នកជំនាញក្នុងវិស័យដឹកជញ្ជូនជឿជាក់ថា ក្រោយកំពង់ផែនេះបញ្ចប់ការសាងសង់ជំហានទី១ ដែលគ្រោងចំណាយថវិកាសាងសង់ប្រមាណ២៤៣លានដុល្លារ វានឹងដើរតួនាទីរឹតតែសំខាន់ក្នុងការជួយអភិវឌ្ឍន៍សេដ្ឋកិច្ច ទាក់ទាញការវិនិយោគ និងលើកកម្ពស់ការប្រកួតប្រជែងក្នុងវិស័យដឹកជញ្ជូន ដ្បិតក្រោយការលើកកម្ពស់គុណភាពរួចកំពង់ផែនេះអាចអនុញ្ញាតឱ្យកប៉ាល់ធំៗចូលចតបានយ៉ាងងាយស្រួលដោយពុំចាំបាច់លើកដាក់ទំនិញនៅប្រទេសផ្សេងៗដូចមុន។
ក្រោយបញ្ចប់ការសាងសង់ជំហានទី១ រាជរដ្ឋាភិបាលកម្ពុជានឹងបន្តអភិវឌ្ឍន៍ និងពង្រីកគុណភាពចំណតផែកុងតឺន័រនៅកំពង់ផែនេះជំហានទី២ និងជំហានទី៣ជាបន្តបន្ទាប់ទៀត ដែលគ្រោងចំណាយថវិកាប្រមាណជិត៧០០លានដុល្លារ។ ក្រោយអភិវឌ្ឍន៍ជំហានទី១ចប់ កំពង់ផែនេះអាចអនុញ្ញាតឱ្យនាវាផ្ទុកទូកុងតឺន័រចាប់ពី១២ម៉ឺនតោនឡើងនៅក្នុងតំបន់ឥណ្ឌូប៉ាស៊ីហ្វិក និងតំបន់អឺរ៉ុប អាម៉េរិក អាចចូលចតបានដោយពុំចាំបាច់ឆ្លងកាត់បណ្ដាកំពង់ផែផ្សេងៗនៅក្នុងតំបន់៕
None
