បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល២ខែដំបូងឆ្នាំ២០២៥ នេះ ការដោះដូរពាណិជ្ជកម្មរវាងកម្ពុជា ជាមួយប្រទេសក្បែរខាងហាក់មានការធ្លាក់ចុះគួរឱ្យកត់សម្គាល់ ពោលគឺទំហំពាណិជ្ជកម្មរវាងកម្ពុជា ជាមួយវៀតណាម មានជាង១ពាន់៣រយលានដុល្លារ ធ្លាក់ចុះ៣,៨% បើធៀបនឹងរយៈពេលដូចគ្នាឆ្នាំមុន ក្នុងនោះកម្ពុជា នាំចេញទៅវៀតណាម មានទំហំជាង៦៤៨លានដុល្លារ ថយចុះជាង១៩% ខណៈកម្ពុជា នាំចូលពីវៀតណាម មកវិញ មានទំហំជាង៧១២លានដុល្លារ កើនឡើងជាង១៦%។ ដោយឡែកការដោះដូរពាណិជ្ជកម្មរវាងកម្ពុជា ជាមួយប្រទេសថៃ នៅ២ខែឆ្នាំនេះវិញមានទំហំជាង៧៤៧លានដុល្លារធ្លាក់ចុះ០,៤% ក្នុងនោះកម្ពុជា នាំចេញទៅថៃ មានទំហំជាង១៦០លានដុល្លារ ធ្លាក់ចុះជាង២១% ខណៈកម្ពុជា នាំចូលពីថៃ មកវិញ មានទំហំជាង៥៨៧លានដុល្លារ កើនឡើងជាង៧%។
ពាក់ព័ន្ធបញ្ហានេះ ឧកញ៉ា ស៊ិន ចន្ធី អគ្គនាយកក្រុមហ៊ុន ឡាញហល អិចប្រេស បានគូសបញ្ជាក់ថា ការធ្លាក់ចុះទំហំនាំចេញរបស់កម្ពុជា ទៅកាន់ប្រទេសក្បែរខាងទាំងពីរនេះ គឺដោយសារឥទ្ធិពលនៃការធ្លាក់ចុះការនាំចេញផលិតកសិកម្មរបស់កម្ពុជា ទៅកាន់ប្រទេសទាំង២ បន្ទាប់ពីតម្លៃ និងតម្រូវការទីផ្សារកសិផលមួយចំនួននៅលើទីផ្សារអន្តរជាតិ មានការធ្លាក់ចុះនៅមួយរយៈពេលចុងក្រោយនេះ។ បើតាមអ្នកជំនាញរូបនេះ កន្លងមកទំនិញដែលកម្ពុជា នាំចេញទៅកាន់ប្រទេសថៃ និងវៀតណាម ភាគច្រើនគឺសុទ្ធសឹងតែជាផលិតកសិកម្ម។
ជាមួយគ្នានេះ លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា បានគូសបញ្ជក់ថា កន្លងមកកម្ពុជា មានឱនភាពពាណិជ្ជកម្មជាមួយប្រទេសថៃ និងវៀតណាម រួចស្រាប់ទៅហើយ ដូច្នេះតាមរយៈការនាំចេញទំនិញរបស់កម្ពុជា ទៅកាន់ប្រទេសក្បែរខាងទាំង២មានការធ្លាក់ចុះខ្លាំងនៅ២ខែដើមឆ្នាំនេះ វាកាន់តែសបញ្ជាក់ឱ្យឃើញថា អតុល្យភាពជញ្ជីងពាណិជ្ជកម្មរបស់កម្ពុជា ជាមួយប្រទេសទាំង២នេះ កាន់តែធ្លាក់ចុះថែមទៀត និងធ្វើឱ្យកម្ពុជា ខាតបង់ចំណូលសេដ្ឋកិច្ចមួយចំនួនផងដែរ។ បើតាមអ្នកជំនាញរូបនេះ កត្តាដែលធ្វើឱ្យការនាំចេញទំនិញកម្ពុជា ទៅកាន់ប្រទេសថៃ និងវៀតណាម មានការធ្លាក់ចុះ ក៏ដោយសារតម្រូវការបញ្ជាទិញទំនិញពីទីផ្សារគោលដៅរបស់ប្រទេសទាំង២មានការធ្លាក់ចុះ។
=គួរជម្រាបថា នៅក្នុងរយៈពេល២ខែដំបូង ឆ្នាំ២០២៥ នេះ ការដោះដូរពាណិជ្ជកម្មរបស់កម្ពុជា ជាមួយទីផ្សារអន្តរជាតិ សម្រេចបានទំហំជាង៩,៤ពាន់លានដុល្លារ កើនឡើងជាង១៦% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះកម្ពុជា នាំចេញទៅកាន់ទីផ្សារអន្តរជាតិ មានទំហំជាង៤,៤ពាន់លានដុល្លារ កើនឡើងជិត១២% ខណៈកម្ពុជា នាំចូលពីទីផ្សារអន្តរជាតិ មកវិញ មានទំហំជាង៤,៩ពាន់លានដុល្លារកើនឡើងជាង២០% ៕
