ថ្នាក់ដឹកនាំសហព័ន្ធស្រូវអង្ករជឿជាក់ថា កម្ពុជា នឹងមិនអាចសម្រេចការនាំចេញអង្ករតាមផែនការកំណត់នៅឆ្នាំនេះទេ បើសិនជាស្ថានភាពនៅក្នុងរយៈពេល៣ខែខាងមុខនៅតែដូចបច្ចុប្បន្ន។
ក្រោយជួបបញ្ហាក្នុងការនាំចេញអង្ករទៅកាន់ប្រទេសឆ្ងាយៗជាពិសេសទីផ្សារអឺរ៉ុប ដោយសារបញ្ហាកង្វះទូកុងតឺន័រ និងតម្លៃដឹកជញ្ជូនឡើងថ្លៃខ្ពស់ បច្ចុប្បន្នកម្ពុជាកំពុងយកចិត្តទុកដាក់ងាកទៅរកទីផ្សារចិន ដែលកំពុងមានតម្រូវការអង្ករប្រណីតកើនឡើងបើធៀបនឹងបណ្តាប្រទេសផ្សេងៗ។ ប្រធានសហព័ន្ធស្រូវអង្ករកម្ពុជាឧកញ៉ា សុង សារ៉ន បានបញ្ជាក់ថា កម្ពុជានឹងពង្រីកការនាំចេញអង្ករទៅកាន់ទីផ្សារចិន ដើម្បីជួយស្តារស្ថានភាពការនាំចេញអង្កររបស់កម្ពុជា ដែលបានធ្លាក់ចុះអស់រយៈពេលជាច្រើនខែកន្លងមកនេះ។
ប្រធានសហព័ន្ធស្រូវអង្កររូបនេះ កត់សម្គាល់ឃើញថា មិនមែនមានតែកម្ពុជានោះទេ ដែលងាកទៅរកទីផ្សារចិន សូម្បីប្រទេសនាំចេញអង្ករធំៗនៅអាស៊ាន និងក្នុងតំបន់រួមមានវៀតណាម ថៃ ឥណ្ឌា និងបង់ក្លាដែសជាដើម ក៏ងាកផ្តោតខ្លាំងមកលើទីផ្សារចិនផងដែរ នៅក្នុងអំឡុងនៃវិបត្តកូវីដ-១៩ នេះ។ កត្តាដែលធ្វើឲ្យកម្ពុជារួមទាំងប្រទេសទាំងនេះងាកមករកចិន ដោយសារចិនមានតម្រូវការអង្ករច្រើននៅអំឡុងនៃវិបត្តិកូវីដ-១៩ គួបផ្សំការដឹកជញ្ជូនមានភាពងាយស្រួលទាំងផ្លូវទឹក និងផ្លូវគោក។
ពាក់ព័ន្ធបញ្ហារឿងដឹកជញ្ជូន ឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាសង្កេតឃើញថា វិស័យដឹកជញ្ជូន និងឡូជីស្ទិកក្រមខណ្ឌក្នុងប្រទេស និងជាមួយប្រទេសជិតខាង ហាក់មានភាពល្អប្រសើរឡើងវិញបន្តិច ក្រោយរាជរដ្ឋាភិបាលកម្ពុជាអាចគ្រប់គ្រងស្ថានការណ៍ នៃការឆ្លងរីករាលដាល នៃជំងឺកូវីដ-១៩ បានល្អ។ ប៉ុន្តែ ការដឹកជញ្ជូនក្របខណ្ឌក្រៅប្រទេសពុំទាន់មានភាពល្អប្រសើរនៅឡើយទេ ពោលគឺតម្លៃដឹកជញ្ជូនឡើងថ្លៃ និងកង្វះទូកុងតឺន័រនៅតែជាបញ្ហាសម្រាប់វិស័យនេះ។
អត្ថបទទាក់ទង
ទោះបីបច្ចុប្បន្ន កម្ពុជាផ្តោតខ្លាំងទៅលើទីផ្សារចិន តែឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា អះអាងថា កម្ពុជាមិនបោះបង់ការផ្តោតលើទីផ្សារផ្សេងៗ ជាពិសេសទីផ្សារអឺរ៉ុបនោះទេ ពោលគឺ កម្ពុជានៅតែបន្តខិតខំស្វែងរកយុទ្ធសាស្ត្រធ្វើយ៉ាងណាបង្កើនការនាំចេញទៅកាន់ទីផ្សារទាំងនោះ។ បើតាមប្រធានសហព័ន្ធរូបនេះ កម្ពុជាឈរលំដាប់ទី២បន្ទាប់ពីថៃក្នុងនាមជាប្រទេសនាំចេញអង្ករទៅកាន់ទីផ្សារអឺរ៉ុបច្រើនជាងគេ ខណៈកាលពីមុនកម្ពុជាឈរលំដាប់ទី១។
ការឆ្លងរាតត្បាតជាសកលនៃជំងឺកូវីដ-១៩ បានបង្កឲ្យមានវិបត្តិក្នុងវិស័យដឹកជញ្ជូនដូចជាកង្វះទូកុងតឺន័រ និងតម្លៃដឹកជញ្ជូនឡើងថ្លៃជាដើម។ វិបត្តិនេះត្រូវបានគេកត់សម្គាល់ឃើញថា បានកើនឡើងក្រោយមានការផ្អាកដំណើរការកំពង់ផែបណ្តោះពីប្រទេសមួយចំនួនក្រោយរកឃើញមានអ្នកឆ្លងជំងឺកូវីដ-១៩ គួបផ្សំការផ្អាកការឆ្លងដែននៅតាមព្រំដែន និងផ្អាកជើងហោះហើរពីប្រទេសមួយទៅប្រទេសមួយជាដើម។
បើតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទនៅ៨ខែក្នុងឆ្នាំ២០២១ កម្ពុជាសម្រេចការនាំចេញអង្ករបានជាង៣៤ម៉ឺនតោនធ្លាក់ចុះជាង២៣% បើធៀបនឹងរយៈពេល៨ខែកាលពីឆ្នាំ២០២០ ដែលមានជិត៤៥ម៉ឺនតោន។ ប៉ុន្តែបើក្រឡេកទៅមើលការនាំចេញក្នុងខែសីហា ឃើញថា កម្ពុជាសម្រេចបានជាង៣ម៉ឺនតោនកើនឡើងជិត៥២% បើធៀបនឹងខែសីហា កាលពីឆ្នាំមុន៕
None
