កាលពីឆ្នាំ ២០១៩កន្លងទៅ លំហូរនៃការវិនិយោគនៅក្រៅប្រទេស មានជាង ១,៥ទ្រីលានដុល្លារអាមេរិក ក៏ប៉ុន្តែ តួលេខនេះ នឹងធ្លាក់ចុះ ៤០% នៅក្នុងឆ្នាំ ២០២០នេះ ហើយវានឹងបង្ហាញពី ភាពអវិជ្ជមានកាន់តែខ្លាំងទៀត នៅក្នុងឆ្នាំ ២០២១ខាងមុខ។
អង្គការសហប្រជាជាតិ បានប៉ាន់ប្រមាណនៅក្នុងរបាយការណ៍វិនិយោគអន្តរជាតិ ឆ្នាំ ២០២០នេះទៀតថា ការវិនិយោគដោយផ្ទាល់នៅបរទេស អាចនឹងធ្លាក់ចុះចន្លោះ ៥% ទៅ ១០% បន្ថែមទៀត នៅក្នុងឆ្នាំ ២០២១ខាងមុខនេះ ហើយនឹងចាប់ផ្តើមងើបឡើងវិញនៅក្នុងឆ្នាំ២០២២។
លោក ម៉ូគីសា គីតូយី អគ្គលេខាធិការនៃសន្និសីទអង្គការសហប្រជាជាតិស្តីពី ពាណិជ្ជកម្ម និងការអភិវឌ្ឍ បានលើកឡើងថា សេដ្ឋកិច្ចសកលលោក កំពុងស្ថិតក្នុងស្ថានការណ៍ដ៏ធ្ងន់ធ្ងរជាង វិបត្តិហិរញ្ញវត្ថុ កាលពីឆ្នាំ ២០០៨ទៅទៀត ហើយវិបត្តិកូវីដ-១៩ បានវាយប្រហារដល់ប្រទេសកំពុងអភិវឌ្ឍយ៉ាងដំណំ ដោយបានកាត់ផ្តាច់ខ្សែច្រវាក់ផលិតកម្ម និងវិស័យឧស្សាហកម្ម និងប៉ះពាល់ដល់ វិស័យទេសចរណ៍ និងពាណិជ្ជកម្មទូទាំងសកលលោក។
អត្ថបទទាក់ទង!
នៅក្នុងតំបន់អាស៊ី វិបត្តិមេរោគនេះបានធ្វើឲ្យធ្លាក់ចុះនូវ ប្រាក់ចំណូលសម្រាប់ការវិនិយោគឡើងវិញ របស់ក្រុមហ៊ុនបរទេស ដែលកំពុងរកស៊ីនៅក្នុងតំបន់ ខណៈបណ្តាប្រទេសដីគោក ដែលមានការអភិវឌ្ឍតិចតួច ចំនួន ៣២ប្រទេស កំពុងតែព្យាយាមដោះស្រាយបញ្ហាសេដ្ឋកិច្ច ជាពិសេសទៅលើលំហូរនៃការវិនិយោគ ដោយសារតែការបិទច្រកព្រំដែន ព្រោះបណ្តាប្រទេសទាំងអស់នេះ ពុំអាចត្រលប់មកប្រើប្រាស់ការដឹកជញ្ជូនតាមផ្លូវទឹកវិញឡើយ។
ថា្នក់ដឹកនាំជាន់ខ្ពស់នៃ អង្គការសហប្រជាជាតិបានបញ្ជាក់ថា ជាបទពិសោធន៍ ការវិនិយោគនៅក្រៅប្រទេសបានដើរតួយ៉ាងសំខាន់ ក្នុងការជួយដោះស្រាយវិបត្តិហិរញ្ញវត្ថុសកលលោក ដោយបានបង្កើតឱកាសសម្រាប់ បណ្តាប្រទេសដែលមានប្រាក់ចំណូលមធ្យម ឲ្យមានលក្ខណៈជាខ្សែច្រវាក់ក្នុងតំបន់៕
None
