ទន្ទឹមនឹងនេះ នៅឆ្នាំ២០១៨នេះ ថៃរំពឹងថា នឹងបង្កើនទំហំពាណិជ្ជកម្មទ្វេភាគីជាមួយកម្ពុជា លើការផលិតគ្រឿងបន្លាស់ និងគ្រឿងតុបតែងរថយន្ដឲ្យបានដល់ ជាង ៥០០លានដុល្លារអាមេរិក ខណៈដែលកាលពីឆ្នាំ២០១៧កន្លងទៅនេះ សម្រេចបានជាង ៤៨០លានដុល្លារអាមេរិក។ នេះបើតាមការលើកឡើងពីមន្ត្រីជាន់ខ្ពស់របស់ស្ថានទូតថៃប្រចាំនៅកម្ពុជា។
លោក Jirawuth Suwanna-arj អគ្គទីប្រឹក្សាពាណិជ្ជកម្មនៅស្ថានរាជទូតថៃប្រចាំកម្ពុជា បានលើកឡើងថា ក្នុងឆ្នាំ២០១៧ កន្លងទៅនេះ កម្ពុជាបានាំចេញគ្រឿងបន្លាស់សម្រាប់ការដំឡើងរថយន្ដទៅប្រទេសថៃមានចំនួនទឹកប្រាក់ប្រមាណ ២០០លានដុល្លារ ខណៈដែលថៃនាំចេញគ្រឿងបន្លាស់សម្រាប់ប្រើប្រាស់ក្នុងយានដ្ឋានជួសជុលមកកាន់កម្ពុជាវិញ មានជាង ២០០លានដុល្លារ ពោលគឺសរុបទំហំពាណិជ្ជកម្មនៃវិស័យផលិតផលគ្រឿងបន្លាស់រថយន្ដ រវាងប្រទេសទាំងពីរ មានជាង ៤៨៧លានដុល្លារអាមេរិក។ លោក Jirawuth បានគូសបញ្ជាក់ទៀតថា នៅឆ្នាំ២០១៨នេះ គេរំពឹងថា ទំហំពាណិជ្ជកម្មទ្វេភាគីកម្ពុជា-ថៃលើវិស័យមួយនេះ នឹងអាចកើនឡើងដល់ជាង ៥០០លានដុល្លារអាមេរិក។
បច្ចុប្បន្ន កម្ពុជាមានរោងចក្រមកពីប្រទេសថៃចំនួន៣ហើយ បាននិងកំពុងដំណើរការផលិតគ្រឿងបន្លាស់សម្រាប់ការដំឡើងរថយន្ដ ដើម្បីនាំចេញទៅកាន់ប្រទេសថៃ ក្នុងនោះមានដូចជា រោងចក្រផលិតខ្សែភ្លើងរថយន្ដនៅខេត្តកោះកុង រោងចក្ររបស់ក្រុមហ៊ុន តូយ៉ូតា ផលិតគ្រឿងបន្លាស់រថយន្ដដឹកទំនិញនៅក្រុងប៉ោយប៉ែត និងរោងចក្រផលិតប៉ាដាងរថយន្ដ នៅរាជធានីភ្នំពេញ។
តើអ្នកបានអានអត្ថបទនេះ ឬនៅ?
អគ្គទីប្រឹក្សាពាណិជ្ជកម្មនៅស្ថានរាជទូតថៃ ប្រចាំកម្ពុជា លោក Jirawuth បានបន្ថែមទៀតថា កន្លងមក មានក្រុមហ៊ុន ក៏ដូចជារោងចក្រផលិតគ្រឿងបន្លាស់រថយន្ដជាច្រើន បានមកសិក្សាស្វែងយល់ពីទីផ្សាររបស់កម្ពុជា ដើម្បីបង្កើតរោងចក្រ ហើយពួកគេរង់ចាំតែពេលវេលា និងឱកាសសមស្របណាមួយ នោះពួកគេនឹងពិចារណាវិនិយោគបើករោងចក្រនៅកម្ពុជា។
ជាមួយគ្នានេះ លោក Jirawuth បានលើកទឹកចិត្តឲ្យវិនិយោគិនរបស់កម្ពុជា គួរតែស្វែងរកឱកាសសហការជាមួយរោងចក្រនៅឯប្រទេសថៃ ដើម្បីវិនិយោគបង្កើតរោងចក្រផលិតគ្រឿងបន្លាស់រថយន្ដបន្ថែមទៀតនៅកម្ពុជា តួយ៉ាង នៅថ្ងៃទី៥ ដល់ថ្ងៃទី៨ខែមេសាខាងមុខនេះ នឹងមានពិព័រណ៍គ្រឿងបន្លាស់ និងគ្រឿងតុបតែងរថយន្ដធំមួយ ហៅថា TAPA 2018 ដែលនឹងប្រព្រឹត្តទៅនៅប្រទេសថៃ ហើយវាជាឱកាសមួយដែលអ្នកវិនិយោគកម្ពុជាអាចជួបផ្ទាល់ជាមួយម្ចាស់រោងចក្រទាំងនោះផងដែរ។
រោងចក្រផលិតគ្រឿងបន្លាស់រថយន្តនៅប្រទេសថៃ មានបែងចែកជា២ គឺទី១ រោងចក្រផលិតគ្រឿងបន្លាស់រថយន្ដសម្រាប់ដំឡើងរថយន្ដនៅប្រទេសថៃ និងទី២ រោងចក្រផលិតគ្រឿងបន្លាស់រថយន្ដ សម្រាប់ប្រើប្រាស់នៅតាមយានដ្ឋានជួសជុលរថយន្ដ។ ចំណែកឯរោងចក្រ ដែលផលិតគ្រឿងបន្លាស់រថយន្ដនៅកម្ពុជា គឺផលិតគ្រឿងបន្លាស់សម្រាប់នាំចេញទៅកាន់រោងចក្រដំឡើងរថយន្ដនៅប្រទេសថៃ ពោលគឺនៅមិនទាន់មានរោងចក្រផលិតគ្រឿងបន្លាស់រថយន្ដសម្រាប់ផ្គត់ផ្គង់ដល់យានដ្ឋានជួសជុលរថយន្ដនៅឡើយទេ។
តើអ្នកបានអានអត្ថបទនេះឬនៅ?
ប្រទេសថៃត្រូវបានគេដឹងថា ជាមជ្ឈមណ្ឌលផលិតរថយន្ដដ៏សំខាន់មួយ ខណៈដែលរោងចក្រផលិតរថយន្ដស្ទើរតែគ្រប់ម៉ាកនៅអាស៊ី បានបង្កើតរោងចក្រផលិតនៅប្រទេសថៃ លើកលែងតែម៉ាករថយន្ដរបស់ចិនប៉ុណ្ណោះ។ លើសពីនេះ ក៏មានរោងចក្រផលិតរថយន្ដម៉ាករបស់អឺរ៉ុបមួយចំនួន ក៏មានវត្តមាននៅប្រទេសថៃដែរ។ វត្តមានរោងចក្រផលិតរថយន្ដដ៏ច្រើននេះ បានធ្វើឲ្យមានតម្រូវការរោងចក្រផលិតគ្រឿងបន្លាស់រថយន្ដក៏មានកាន់តែច្រើនឡើងផងដែរ ដើម្បីឆ្លើយតបទៅនឹងសេចក្ដីត្រូវការរបស់រោងចក្រផលិតរថយន្ដនានា។ ដូច្នេះ ថៃចាំបាច់ត្រូវការពង្រីកសមត្ថភាពរោងចក្រផលិតរបស់ខ្លួននៅក្រៅប្រទេសថែមទៀត ពិសេស នៅកម្ពុជាតែម្ដង។
ជាមួយគ្នានេះ បើតាមលោក Jirawuth សក្ដានុពលដែលវិនិយោគិនថៃសម្លឹងឃើញពីប្រទេសកម្ពុជានោះ រួមមាន កម្លាំងពលកម្មនៅកម្ពុជាថោកជាងប្រទេសថៃ។ ពលករមួយចំនួនដែលបានទៅធ្វើការនៅប្រទេសថៃ បានត្រឡប់មកវិញ ដោយបានពាំនាំនូវចំណេះដឹងនិងជំនាញជាច្រើន ដែលអាចធ្វើការនៅក្នុងស្រុកបាន ។ លើសពីនេះ ពលរដ្ឋកម្ពុជាមានចិត្តចង់ចេះចង់ដឹង ដែលងាយក្នុងការអភិវឌ្ឍសមត្ថភាពរបស់ពួកគេឲ្យក្លាយជាអ្នកជំនាញ៕
