សមាគមស្វាយចន្ទីរំពឹងផលិតគ្រាប់ស្វាយចន្ទីបានរហូតដល់៩០ម៉ឺនតោន នៅឆ្នាំនេះ ទោះត្រូវប្រឈមនឹងបញ្ហាអាកាសធាតុ

លោក អួន ស៊ីឡុត ប្រធានសមាគមស្វាយចន្ទីកម្ពុជា បានព្យាករណ៍ថា ការផលិតគ្រាប់ស្វាយចន្ទីរបស់កម្ពុជានឹងអាចសម្រេចបានចន្លោះពី៧០ទៅ៩០ម៉ឺនតោន នៅឆ្នាំ២០២៥ នេះ ពោលគឺមិនសូវខុសគ្នាពីទិន្នផលនៅឆ្នាំ២០២៤នោះទេ។ ការព្យាករបែបនេះ ធ្វើឡើងក្រោយលោកបារម្ភពីបញ្ហាអាកាសធាតុធ្វើឱ្យប៉ះពាល់ដល់ការបង្កើនបង្កើនផលគ្រាប់ស្វាយចន្ទីនៅឆ្នាំនេះ។ បើយោងតាមការព្យាករណ៍របស់ក្រសួងធនធានទឹក និងឧតុនិយមនៅរដូវប្រាំងឆ្នាំនេះអាចនឹងមានភ្លៀងធ្លាក់បន្តអូសបន្លាយយូរ ហើយប្រសិនបើវាធ្លាក់ចំពេលស្វាយចន្ទីកំពុងចេញផ្កា ឬផ្លៃ ចង់ ឬមិនចង់វានឹងធ្វើឱ្យប៉ះពាល់ក្នុងកម្រិតណាមួយ ។ ទន្ទឹមនឹងនេះ ប្រធានសមាគមរូបនេះជឿជាក់ថា ទិន្នផលគ្រាប់ស្វាយចន្ទីនៅឆ្នាំនេះអាចនឹងធ្លាក់ចុះចន្លោះពី១០ទៅ៣០% ប្រសិនបើកសិករចាត់វិធានការមិនបានទាន់ពេលវេលា។

តែយ៉ាងណាបើតាមការគូសបញ្ជាក់របស់ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម និងជាអ្នកជំនាញផ្នែកដាំដុះស្វាយចន្ទី នៅពេលមានភ្លៀងធ្លាក់ច្រើននៅរដូវប្រាំង វាអាចជះផលល្អសម្រាប់ដំណាំស្វាយចន្ទីទៅវិញទេ ពិសេសសម្រាប់ប្រភេទពូជ M23 តែម្តង។ ការអះអាងបែបនេះរបស់មន្ត្រីជាន់ខ្ពស់រូបនេះ ក៏ដោយដោយសារដំណាំស្វាយចន្ទីប្រភេទ M23 អាចចេញផ្កាបានរហូតដល់២ទៅ៣ដងឯណោះ ហើយនៅពេលមានភ្លៀងធ្លាក់ វានឹងអាកាសធាតុនឹងចុះត្រជាក់ ដែលនឹងកាន់តែផ្តល់ផលល្អសម្រាប់ដំណាំស្វាយចន្ទី។

សូមជម្រាបថា នៅពេញមួយឆ្នាំ២០២៤ កន្លងទៅនេះ កម្ពុជាផលិតគ្រាប់ស្វាយចន្ទីបានជាង៨៥ម៉ឺនតោនមានការកើនឡើង២៦% បើធៀបនឹងឆ្នាំ២០២៣ ដោយបាននាំចេញទៅទីផ្សារអន្តរជាតិប្រមាណជាង៨១ម៉ឺនតោន ក្នុងនោះនាំចេញទៅទីផ្សារវៀតណាមជាង៧៩ម៉ឺនតោន ដោយគិតជាទឹកប្រាក់មានប្រមាណជាង១ពាន់១រយលានដុល្លារ កើនឡើង៣១%៕