គិតនៅត្រឹមពាក់កណ្ដាលឆ្នាំ២០២០នេះ មានគម្រោងរោងចក្រផលិតស្រាបៀរថ្មីចំនួន ២ហើយ ត្រូវបាន CDC អនុម័ត ដោយក្នុងនោះ គម្រោងរោងចក្រដែលទើបអនុម័តថ្មីចុងក្រោយនេះ គឺជារបស់ក្រុមហ៊ុន VATTANAC BREWERY CO., LTD។ បើតាម CDC គម្រោងរោងចក្រស្រាបៀរថ្មីមួយនេះ មានទីតាំងវិនិយោគស្ថិតនៅភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ មានទុនវិនិយោគចំនួន ៨៧លានដុល្លារអាមេរិក និងអាចបង្កើតការងារបានចំនួន ៨៩៩កន្លែង។
សូមបញ្ជាក់ថា កាលពីដើមខែមេសា CDC ក៏បានអនុម័តគម្រោងរោងចក្រស្រាបៀរ និងភេសជ្ជៈចំនួន១ ផងដែរ ដោយមានតម្លៃ ១៦០ លានដុល្លារអាមេរិក។ គម្រោងបង្កើតរោងចក្រស្រាបៀរ និងភេសជ្ជៈនេះ ស្ថិតនៅក្រោមការគ្រប់គ្រងរបស់ក្រុមហ៊ុន HANUMAN BEVERAGES CO., LTD ដោយគម្រោងនេះ មានទីតាំងស្ថិតនៅភូមិត្រពាំងវែង ឃុំឆក់ឈើនាង ស្រុកអង្គស្នួល ខេត្តកណ្តាល និងអាចបង្កើតការងារបានចំនួន ១.៥៤៥កន្លែង។
អត្ថបទទាក់ទង!
គួរបញ្ជាក់ថា ស្របពេលដែល គម្រោងរោងចក្រស្រាបៀរថ្មីៗ ត្រូវបានអនុម័ត បើក្រឡេកមកមើលរោងចក្រស្រាបៀរដែលកំពុងមានប្រតិបត្តិការផលិតនោះ ក៏មិននៅស្ងៀមដែរ គឺនៅតែបន្ដពង្រីកការវិនិយោគលើអាជីវកម្មរបស់ខ្លួនបន្ថែម។ តួយ៉ាង ក្រុមហ៊ុនរោងចក្រផលិតស្រាបៀរកម្ពុជា បានអះអាងថា ខ្លួនបានចំណាយទុនវិនិយោគបន្ថែមរាប់រយលានដុល្លារនៅប៉ុន្មានឆ្នាំចុងក្រោយនេះ ដើម្បីពង្រីកសមត្ថភាពអាជីវកម្មរបស់ខ្លួន។
លោក សាមសុន វ៉ុង (Samson Wong) នាយកគ្រប់គ្រងក្រុមហ៊ុន Cambodia Brewery Limited បានបញ្ជាក់នៅក្នុងជំនួបជាមួយឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈនាពេលថ្មីៗនេះថា បច្ចុប្បន្ន ក្រុមហ៊ុនផលិតស្រាបៀរមួយនេះ មានបុគ្គលិកជាង ៧០០នាក់ កំពុងបំរើការងារ និងបានបំពេញជាក្រុមហ៊ុនឯកជនដ៏ធំ ក្នុងការផលិតស្រាបៀរ និងភេសជ្ជៈ។ លោក សាម សុន វ៉ុង បន្ថែមថា នៅ២ឆ្នាំចុងក្រោយនេះ ក្រុមហ៊ុនបានចំណាយទុនជាង ២៣០លានដុល្លារបន្ថែមទៀត ក្នុងការអភិវឌ្ឍសមត្ថភាពអាជីវកម្មរបស់ខ្លួន។
ឯកឧត្តម អ៊ិត សំហេង បានវាយតម្លៃខ្ពស់ ចំពោះសង្វាក់ផលិតកម្ម របស់ក្រុមហ៊ុន ផលិតស្រាបៀរនេះ។ ឯកឧត្តមបន្ថែមថា ការចូលរួមរបស់វិស័យឯកជនពិតជាសំខាន់ណាស់ ហើយការដែលមានក្រុមហ៊ុនអន្តរជាតិមានវត្តមាននៅកម្ពុជា វានឹងនាំមកនូវស្តង់ដា គុណភាព ស្តង់ដាគ្រប់គ្រងធនធានមនុស្ស និងបណ្តុះបណ្តាលជំនាញសម្រាប់ប្រជាជនកម្ពុជា ពិសេសបានចូលរួមបង់ពន្ធរហូតដល់ទៅជាង ៤០០លានដុល្លារក្នុង១ឆ្នាំៗ៕
None
