ក្រសួងសំណង់វៀតណាម បានដាក់សំណើមួយចំនួនទៅកាន់រាជរដ្ឋាភិបាល ដើម្បីដោះស្រាយបញ្ហាក្នុងឧស្សាហកម្មស៊ីម៉ងត៍ ដែលកំពុងជួបបញ្ហាការផលិតលើសមតម្រូវការ ដែលកំពុងធ្វើឲ្យមានការខាតបង់យ៉ាងច្រើនដល់វិស័យនេះ។ តែយ៉ាងណាសំណើទាំងនេះមិនទាន់ត្រូវបានអនុម័ត ឬដាក់បញ្ចូលទៅក្នុងច្បាប់នៅឡើយដោយទុកឱ្យឧស្សាហកម្មនេះបន្តប្រឈមនឹងបញ្ហាប្រឈមដដែលៗរហូតមកដល់ពេលនេះ។
គិតត្រឹមឆ្នាំ២០២៤ វៀតណាមមានរោងចក្រផលិតកម្មស៊ីម៉ងត៍សរុបចំនួន៩២កន្លែង ដែលអាចមានសមត្ថភាពផលិតស៊ីម៉ងត៍បានរហូតដល់១២២លានតោន ក្នុង១ឆ្នាំ ប៉ុន្តែកាលពីឆ្នាំ២០២៤ រោងចក្រទាំងនេះផលិតស៊ីម៉ងត៍បានប្រមាណ៩៥លានតោនប៉ុណ្ណោះ ក្នុងនោះទីផ្សារក្នុងស្រុកស្រូបទាញបានប្រមាណជាង៦៥លានតោន និងនាំចេញជិត៣០លានតោន។
មកដល់ពេលនេះ រោងចក្រផលិតស៊ីម៉ងត៍នៅវៀតណាម ទើបអាចផលិតបាន៧៧% ប៉ុណ្ណោះ នៃសមត្ថភាពផលិតសរុបរបស់ខ្លួន ស្របពេលវៀតណាមបានកំណត់ក្នុងផែនការជំរុញផលិតកម្មស៊ីម៉ងត៍ឱ្យឈានដល់១២៥លានតោន នៅក្នុងឆ្នាំ២០២៥ និង១៥០លានតោន នៅត្រឹមឆ្នាំ២០៣០៕
ដោយៈ សរ សុជាតិ
