ចាប់តាំងពីមានការរីករាលដាននៃជំងឺកូវីដ១៩ ប្រទេសចិនបានក្លាយជាប្រទេសផ្គត់ផ្គង់វ៉ាក់សាំងដំបូងគេ តាមរយៈការផ្ដល់ជាជំនួយផង និងលក់ផង ជាមួយនឹងវ៉ាក់សាំងរបស់ខ្លួនទាំងប្រភេទ គឺ ស៊ីណូហ្វាម និងស៊ីណូវ៉ាក់។ យ៉ាងណាមិញ ថ្មីៗនេះដែរ លោក ស៊ី ជីនពីង បានបញ្ជាក់បន្ថែមទៀតថា ប្រទេសចិននឹងបរិច្ចាគវ៉ាក់សាំងកូវីដ -១៩ឲ្យបានដល់ ២ ពាន់លានដូសនៅឆ្នាំ២០២១ ទៅឲ្យប្រទេសនានាពិសេសប្រទេសក្រីក្រដែលកំពុងត្រូវការវ៉ាក់សាំង ខណៈដែលថ្មីៗនេះ ចិនក៏ទើបតែបានប្រកាសថានឹងផ្ដល់ថវិកាបន្ថែម ១០០ដុល្លារទៅដល់គម្រោងចែកចាយវ៉ាក់សាំងសកលរបស់កម្មវិធីកូវ៉ាក់ផងដែរ។
ទន្ទឹមនេះ រដ្ឋមន្ត្រីការបរទេសចិនលោក វ៉ាង យីបាននិយាយដែរថា រយៈពេលកន្លងមកនេះ ប្រទេសចិនបានផ្គត់ផ្គង់វ៉ាក់សាំងដល់ប្រទេសដទៃសរុបប្រមាណ ៧៧០លានដូសហើយ។ ក្នុងនោះ ក្រុមហ៊ុន Sinovac Biotech គឺជាក្រុមហ៊ុនមួយក្នុងចំណោមក្រុមហ៊ុនផ្គត់ផ្គង់វ៉ាក់សាំងកូវីដ-១៩ធំៗរបស់ចិន ហើយក្រុមហ៊ុននេះ បានចុះកិច្ចសហប្រតិបត្តិការលើកិច្ចព្រមព្រៀងជាមួយប្រទេសចំនួន២០ ដែលមានការចាក់វ៉ាក់សាំងសរុបប្រមាណជិត ៩០០លានដូស។
ក្រៅតែពីប្រទេសចិន ក្រុមហ៊ុន Sinovac ក៏មានដៃគូនៅប្រទេស ឥណ្ឌូនេស៊ី ប្រេស៊ីលទួរគី ម៉ាឡេស៊ី និងអេហ្ស៊ីប ដើម្បីចូលរួមផលិតវ៉ាក់សាំងស៊ីណូវ៉ាក់នេះផងដែរ។
អត្ថបទគួរអាន
សូមបញ្ជាក់ថា បើតាមលោក វ៉ាង យី នៅក្នុងពេលឆាប់ៗនេះ ក្រុមហ៊ុន Sinovac នឹងដាក់ស្នើទៅកាន់និយ័តករនៅក្នុងប្រទេសនានា ដើម្បីសាកល្បងការចាក់វ៉ាក់សាំង និងប្រើប្រាស់បន្ទាន់ នូវវ៉ាក់សាំង Sinovac ប្រភេទថ្មី ចំនួន២ ដែលអាចមានប្រសិទ្ធកាន់តែខ្ពស់ជាងមុនក្នុងការការពារមេរោគបំប្លែងថ្មី ឌែលតា និង ហ្គាមា។
សូមរំលឹកដែរថា កម្ពុជាក៏ជាប្រទេសដែលបានទទួលជំនូយ និងបានបញ្ជាក់ទិញវ៉ាក់សាំងពីប្រទេសចិនផងដែរយ៉ាងច្រើនផងដែរ ហើយបើមកទល់ពេលនេះប្រទេសចិនបានផ្ដល់ជំនួយវ៉ាក់សាំងកូវីដ-១៩មកឲ្យកម្ពុជាប្រមាណ៣លាន ២សែនដូសហើយ ខណៈដែលកម្ពុជាបានបញ្ជាទិញវ៉ាក់សាំងពីចិនមានប្រមាណ២០ លាន៥សែនដូស ខណៈដែលកម្ពុជា បានជ្រើសយកប្រទេសចិនជាខ្នងបង្អែកយុទ្ធសាស្ត្រដ៏សំខាន់សម្រាប់ការផ្គត់ផ្គង់វ៉ាក់សាំង រីឯវ៉ាក់សាំងពីប្រទេសផ្សេងទៀត គឺជាការគាំទ្រដល់យុទ្ធយុទ្ធសាស្ត្រចាក់វ៉ាក់សាំងនៅកម្ពុជា។ នេះបើតាមការអះអាងរបស់សម្តេច តេជោ ហ៊ុន សែន នាយករដ្ឋមន្ត្រីកម្ពុជា៕
អត្ថបទ៖ ស៊ើង និមល់
None
