ចិន នៅតែបន្តបង្ហាញពីភាពត្រឹមត្រូវនៃការទាមទារទឹកដីនៅសមុទ្រចិនខាងត្បូង ទោះមានប្រទេស​ជាច្រើនជំទាស់

តាមសេចក្តីរាយការណ៍របស់សារព័ត៌មានជប៉ុន NHK មហាយក្សចិន កំពុងតែបន្តបង្ហាញនូវភាពត្រឹមត្រូវនៃការទាមទារទឹកដីរបស់ខ្លួននៅសមុទ្រចិនខាងត្បូង បន្ទាប់ពីប្រទេសចំនួន ១៤ បានបន្តការអំពាវនាវរបស់ពួកគេឲ្យចិន ទទួលយកការសម្រេចចិត្ត ដែលធ្វើឡើងកាលពីមួយទសវត្សរ៍មុនដោយតុលាការអាជ្ញាកណ្តាលអន្តរជាតិ ពាក់ព័ន្ធនឹងជម្លោះនៅដែនសមុទ្រចិនខាងត្បូង។
ជុំវិញអំណះអំណាងនេះ ក្រសួងការបរទេសចិន បានចេញសេចក្តីថ្លែងការណ៍មួយកាលពីថ្ងៃទី ១២ ខែកក្កដា ដើម្បីឆ្លើយតបទៅនឹងសេចក្តីថ្លែងការណ៍រួមមួយ ដោយប្រទេសជប៉ុន សហរដ្ឋអាម៉េរិក និងប្រទេសចំនួន ១២ ផ្សេងទៀត ក្នុងឱកាសខួបលើកទី ១០ នៃសេចក្តីសម្រេចលើជោគវាសនានៅសមុទ្រចិនខាងត្បូង។
សេចក្តីសម្រេចរបស់តុលាការ ដែលត្រូវបានគេស្គាល់ថា ជាសេចក្តីសម្រេចរបស់អាជ្ញាកណ្តាល បានច្រានចោលការទាមទាររបស់ចិន លើសមុទ្រស្ទើរតែទាំងមូលថា ខ្វះមូលដ្ឋានច្បាប់ និងរំលោភលើច្បាប់អន្តរជាតិ ក្រោយពេលដែល ប្រទេសហ្វីលីពីន បានដាក់ពាក្យបណ្តឹង។
ពាក់ព័ន្ធនឹងបញ្ហានេះ ក្រសួងការបរទេសចិន បានពិពណ៌នាថា សេចក្តីសម្រេចនោះ គឺគ្មានអ្វីក្រៅពីក្រដាសសំរាម ដែលខុសច្បាប់ និងគ្មានអំណាចនៃសេចក្តីពិតឡើយ។
ប្រភពដដែលបាននិយាយថា ចិន ប្រឆាំងនឹងការទាមទារ ក៏ដូចជាការធ្វើសកម្មភាពណាមួយ ដែលផ្អែកលើសេចក្តីសម្រេចនេះ។ ក្រសួងការបរទេសចិន បានបន្ថែមថា អធិបតេយ្យភាពដែនដី និងផលប្រយោជន៍ផ្លូវសមុទ្ររបស់ចិននៅសមុទ្រចិនខាងត្បូង នឹងមិនរងផលប៉ះពាល់ដោយសាលក្រមនេះទេ។
ក្រសួងការបរទេសចិន ក៏បានចេញសេចក្ដីថ្លែងការណ៍ដាច់ដោយឡែកមួយឆ្លើយតបនឹងសេចក្ដីថ្លែងការណ៍របស់រដ្ឋមន្ត្រីការបរទេសជប៉ុន លោក ម៉ូតេជី តូស៊ីមីស៊ូ ( Motegi Toshimitsu) ដែលបានលើកឡើងថា ការបដិសេធរបស់ចិនក្នុងការទទួលយកសេចក្ដីសម្រេចឆ្នាំ ២០១៦ កំពុងធ្វើឲ្យប៉ះពាល់ដល់នីតិរដ្ឋក្នុងសហគមន៍អន្តរជាតិ។
ប្រភពដដែលបានអះអាង ថា ក្រសួងការបរទេសចិន ប្រកាសធ្វើការថ្កោលទោស ចំពោះសេចក្ដីថ្លែងការណ៍នេះ និងប្រឆាំងយ៉ាងដាច់អហង្ការចំពោះសេចក្ដីថ្លែងការណ៍នេះ។
ក្រៅពីប្រទេសជប៉ុន សហរដ្ឋអាមេរិក ហ្វីលីពីន ដែលជាម្ចាស់បណ្តឹង សម្រាប់អាស៊ានផ្ទាល់ គឺមិននៅក្នុងបញ្ជី១៤ ប្រទេសនេះទេ ខណៈដែល សហគមន៍នេះ នៅមិនទាន់មានកុងសង់ស៊ីសពាក់ព៍ន្ធនឹងសេចក្តីសម្រេចស្តីពីបញ្ហានៅសមុទ្រចិនខាងត្បូងនេះនៅឡើយ៕

ដោយៈ សរ សុជាតិ