ប្រទេសចិន បានបរិច្ចាគវ៉ាក់សាំង ៥០ម៉ឺនដូស ហើយថៃបានទទួលយកវ៉ាក់សាំងទាំងនោះ ដើម្បីចាក់ជូនជនជាតិចិន ដែលកំពុងស្នាក់នៅប្រទេសថៃ នៅគ្រាដែលប្រទេសនេះកំពុងមានភាពយឺតយ៉ាវក្នុងការចាក់វ៉ាក់សាំងសម្រាប់ពលរដ្ឋខ្លួន នៅចំពេលដែលស្ថានការណ៍កូវីដ-១៩កំពុងតែបន្ដកើនឡើងកាន់តែខ្លាំងនៅរយៈពេល ២ទៅ៣ខែកន្លងមកនេះ។
លោក Yang Xin ទីប្រឹក្សារដ្ឋមន្ត្រីនៅស្ថានទូតចិនប្រចាំប្រទេសថៃ បាននិយាយថា កម្មវិធី “ពន្លកនិទាឃរដូវ” (Spring Sprout) របស់ទីក្រុងប៉េកាំងនឹងផ្ដល់ផលប្រយោជន៍ដល់ប្រជាជនចិនរាប់ម៉ឺននាក់ដែលនៅក្នុងប្រទេសថៃ ដោយតាមរយៈការប៉ាន់ស្មានចំនួនពលរដ្ឋចិន ដែលរស់នៅក្នុងប្រទេសថៃនេះ មានប្រមាណ ១៥ម៉ឺននាក់។
ប្រទេសចិនមកទល់ពេលនេះ បានផ្គត់ផ្គង់វ៉ាក់សាំង ៦លានដូសហើយ សម្រាប់ប្រទេសថៃ ដែលជាចំនួនច្រើនជាងគេក្នុងចំណោមវ៉ាក់សាំងដែលថៃបានទិញ។ រដ្ឋាភិបាលថៃថ្មីៗនេះ បានប្រកាសថា នឹងចាក់វ៉ាក់សាំងកូវីដ-១៩ សម្រាប់ជនជាតិថៃជាមុនសិន ទើបបន្ដចាក់វ៉ាក់សាំងជូនដល់ជនបរទេសជាច្រើនផ្សេងទៀត។
អត្ថបទទាក់ទង!
មានប្រហែលតែ ២%ប៉ុណ្ណោះ នៃប្រជាជនថៃសរុប ៧០លាននាក់ បានទទួលការចាក់វ៉ាក់សាំងដូសទី១ និងអ្នកដែលបានចាក់គ្រប់ចំនួនពីរដូសមានត្រឹមតែ១%ប៉ុណ្ណោះ គិតមកទល់ពេលនេះ។ រដ្ឋាភិបាលសង្ឃឹមថា ការចាក់វ៉ាក់សាំងឲ្យបានដល់ ៧០%នៃចំនួនប្រជាជនសរុប នឹងត្រូវបញ្ចប់ឲ្យបាននៅត្រឹមចុងឆ្នាំនេះ ប៉ុន្ដែក៏មានការរិះគន់ខ្លាំងទៅលើរដ្ឋាភិបាលថៃផងដែរ អំពីមានការពន្យារពេលយូរពេកនៃការចាប់ផ្ដើមកម្មវិធីចាក់វ៉ាក់សាំងរបស់ខ្លួន។
មន្ត្រីរដ្ឋាភិបាលចិនបាននិយាយនៅក្នុងកាសែតក្នុងស្រុកថា មានជនជាតិចិនជាង ៥០ម៉ឺននាក់នៅក្នុង ១២០ប្រទេស បានទទួលការចាក់វ៉ាក់សាំងពីកម្មវិធី “ពន្លកនិទាឃរដូវ” តាំងតែពីមានការបើកដាក់ឲ្យដំណើរការក្នុងខែមីនាមក។
សូមបញ្ជាក់ថា គិតត្រឹមថ្ងៃព្រហស្បតិ៍សប្ដាហ៍នេះ អាជ្ញាធរសុខាភិបាលថៃបានរាយការណ៍ថា អ្នកឆ្លងកូវីដ-១៩ករណីថ្មីមានជាង២ពាន់៦រយនាក់ និងមានអ្នកស្លាប់២៥នាក់។ បើគិតពីចំនួនអ្នកឆ្លងសរុបវិញថៃ មានការកើនឡើងដល់ប្រមាណ ១២ម៉ឺននាក់ហើយ និងអ្នកស្លាប់មានដល់ទៅជាង ៧០០នាក់។ ចំនួនអ្នកឆ្លងនៅក្នុងប្រទេសថៃ បានចាប់ផ្ដើមហក់ឡើងច្រើនបំផុតចាប់តាំងពីថ្ងៃទី ០១ ខែមេសាមកម្ល៉េះ។ អំឡុងពេលដែលមេរោគរាតត្បាតខ្លាំងប្រទេសថៃ ក៏មានការបិទខ្ទប់ និងផ្អាកដំណើការអាជីវកម្ម និងការដាក់ចេញបម្រាមគោចរផងដែរ។
នៅក្នុងប្រទេសថៃដែលមានប្រជាជនប្រហែល៧០លាននាក់ ក៏មានជនអន្តប្រវេសន៍ប្រមាណ២លាន៥សែនាក់កំពុងរស់នៅ និងធ្វើការនៅក្នុងប្រទេសនេះ ដោយភាគច្រើនពួកគេមកពីប្រទេសជិតខាងដូចជា កម្ពុជា ឡាវ និងភូមា។ ពលករអន្តោប្រវេសន៍ទាំងនោះ ធ្វើការនៅក្នុងការដ្ឋានសំណង់ និងរោងចក្រជាដើម។
ដោយឡែក ជនជាតិចិន គឺជាជនបរទេស ដែលរស់នៅក្នុងប្រទេសថៃច្រើនជាងគេ (មិនរាប់បញ្ចូលជនអន្តោប្រវេសន៍ពីប្រទេសជិតខាង) ហើយជនជាតិចិនក៏ជាជនបរទេសតែមួយគត់ ដែលបានទទួលការចាក់វ៉ាក់សាំងក្រោមយុទ្ធនាការ “ពន្លកនិទាឃរដូវ” របស់រដ្ឋាភិបាលចិន។
ឧបនាយករដ្ឋមន្ត្រីក្រសួងការបរទេសថៃ លោក Natapanu Nopakun បាននិយាយនៅថ្ងៃព្រហស្បតិ៍សប្ដាហ៍នេះថា មានជនអន្តោប្រវេសន៍ស្របច្បាប់ប្រហែល ១លាន៣សែននាក់ធ្វើការនៅក្នុងទីក្រុងបាងកក និងតំបន់ក្បែរៗនោះ ខណៈដែលពលករអន្តោប្រវេសន៍ខុសច្បាប់មានជាង១លាននាក់កំពុងធ្វើការនៅទូទាំងប្រទេសថៃ។ ក្រសួងការងារថៃធ្លាប់បានលើកឡើងថា ក៏មានបំណងនឹងចាក់វ៉ាក់សាំងសម្រាប់ជនអន្តោប្រវេសន៍ទាំងអស់នោះផងដែរ ព្រោះថាការចល័តរបស់ពួកគេ គឺមានហានិភ័យខ្ពស់ណាស់នៅក្នុងការទប់ស្កាត់ការចម្លងមេរោគ។
ក្រៅពីនេះ ក៏មានជនបរទេសប្រមាណ២០ម៉ឺននាក់ទៀត ពីប្រទេសអូស្ត្រាលី ជប៉ុន អឺរ៉ុប អាមេរិក និងប្រទេសផ្សេងៗទៀតក៏កំពុងរស់នៅប្រទេសថៃដែរ ដែលភាគច្រើននៃពួកគេ គឺជាអ្នកជំនាញការ និងនិវត្តជន។ ជាមួយគ្នានេះ ក្រុមតំណាងឲ្យជនជាតិអាមេរិកាំង ដែលរស់នៅប្រទេសថៃ នាពេលកន្លងទៅនេះ ក៏បានផ្ញើលិខិតទៅកាន់រដ្ឋមន្ត្រីក្រសួងការបរទេសអាមេរិកលោក Antony Blinken ដោយបានស្នើសុំឲ្យរដ្ឋាភិបាលផ្គត់ផ្គង់វ៉ាក់សាំងកូវីដ-១៩ សម្រាប់ពួកគេផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
