បើតាមការចុះផ្សាយរបស់សារព័ត៌មាន South China Morning Post អធិការបតីអាល្លឺម៉ង់ លោកស្រី Angela Merkel និងប្រធានាធិបតីបារាំង អេម៉ានុយអែល ម៉ាក្រុង ត្រូវគេរំពឹងថា នឹងចូលរួមកិច្ចប្រជុំកំពូលនាថ្ងៃទី១៤ ខែកញ្ញានេះ រួមជាមួយនឹងប្រធានក្រុមប្រឹក្សាអឺរ៉ុប និងប្រធានគណៈកម្មការអឺរ៉ុប ផងដែរ ។
សហភាពអឺរ៉ុបកំពុងចរចាជាមួយចិន អំពីកិច្ចព្រមព្រៀងវិនិយោគដ៏មានសក្ដានុពលមួយ ដែលនឹងការពារផលប្រយោជន៍ក្រុមហ៊ុនអឺរ៉ុបដែលរកស៊ីនៅក្នុងប្រទេសមហាអំណាចសេដ្ឋកិច្ចពិភពលោកទីពីរនេះ ។
ប្រភព EU មួយ បានប្រាប់ South China Morning Post ថា អាទិភាពនៃជំនួបកំពូលពិសេសនេះ គឺស្ដីពីការចរចាកិច្ចព្រមព្រៀងវិនិយោគ សហភាពអឺរ៉ុប-ចិន ឲ្យរួចរាល់ជាស្ថាពរនៅដំណាច់ឆ្នាំនេះ ។
អត្ថបទទាក់ទង
អ្វីដែលស្ថិតក្នុងការពិភាក្សាគ្នានៅឡើយ គឺថា ជំនួបកំពូលនាខែកញ្ញានេះ អាចនឹងបង្រួមតូចខុសពីផែនការដើមដែលគ្រោងជួបផ្ទាល់ទល់មុខគ្នាជាមួយប្រមុខរដ្ឋាភិបាលសមាជិកអឺរ៉ុបទាំង ២៧ ប្រទេស ដែលកាន់តែច្រើនឡើង បានមើលមកចិនចាត់ទុកចិនជា"គូប្រជែងជាលក្ខណៈប្រព័ន្ធ" ជាជាងជាដៃគូ ។
នៅសហរដ្ឋអាមេរិកវិញ លោក ចូ បាយដិន (Joe Biden) បេក្ខជនប្រធានាធិបតីមកពីគណបក្សប្រជាធិបតេយ្យ ដែលនឹងប្រជែងដណ្ដើមតំណែងពីប្រធានាធិបតី ដូណាល់ ត្រាំ នៅក្នុងការបោះឆ្នោតនាខែវិច្ឆិកា ខាងមុខនេះ បានប្ដេជ្ញាថា នឹងធ្វើការដុតដៃដុតជើងថែមទៀតជាមួយសម្ព័ន្ធមិត្តដែលមានចិត្តដូចគ្នា ដើម្បីដោះស្រាយគ្នាជាមួយប្រទេសចិន ដែលការណ៍នេះបាននាំឲ្យអ្នកការទូតចិនមួយចំនួនជឿជាក់ថា វាជារឿងបន្ទាន់សម្រាប់ចិនដែលត្រូវកសាងទំនាក់ទំនងការងារកាន់តែជិតស្និទ្ធជាមួយបណ្ដាប្រទេសនៅក្នុងសហភាពអឺរ៉ុប ។
ដោយសារអាល្លឺម៉ង់ បច្ចុប្បន្ន ជាប្រធានប្ដូរវេនរបស់សហភាពអឺរ៉ុប លោកស្រី Merkel ដើមឡើយ ចង់អញ្ជើញលោកប្រធានាធិបតីចិន ស៊ី ជិនពីង មកជួបប្រជុំគ្នាដោយផ្ទាល់ នៅទីក្រុង Leipzig ប្រទេសអាល្លឺម៉ង់ ដើម្បីលើកកម្ពស់ទំនាក់ទំនងរយៈពេលវែងរវាងសហភាពអឺរ៉ុប និងចិន ។ ប៉ុន្តែ ផែនការនេះត្រូវអាក់ខានទៅវិញ ដោយសារការឆ្លងរាតត្បាតនៃជំងឺកូវីដ១៩ ។
កន្លងមក មន្ត្រីអ្នកធ្វើគោលនយោបាយ និងអ្នកការទូតសហភាពអឺរ៉ុប បានផ្ដល់សញ្ញាថា ពួកគេនឹងមិនទទួលយកកិច្ចព្រមព្រៀងវិនិយោគណាមួយឡើយ ប្រសិនបើគ្មានការប្ដេជ្ញាចិត្តរបស់ចិនក្នុងការបើកទីផ្សារចិនឲ្យបានកាន់តែទូលំទូលាយ ដល់ក្រុមហ៊ុនអឺរ៉ុប ឬក្នុងការបង្កើតឲ្យមានភាពស្មើគ្នាក្នុងការប្រកួតប្រជែង រវាងក្រុមហ៊ុនអឺរ៉ុបនិងក្រុមហ៊ុនចិន ឡើយ ៕
