ចិន បញ្ចេញមហិច្ឆតាពង្រីកឥទ្ធិពលប្រាក់យន់ ដើម្បីប្រជែងនឹងប្រាក់ដុល្លារអាម៉េរិក

នេះមិនមែនគ្រាន់តែជាការកែទម្រង់ធម្មតាឡើយ ប៉ុន្តែវាជាយុទ្ធសាស្ត្រសង្រ្គាមជើងព្រួលដ៏សំខាន់បំផុតរបស់ចិនក្នុងការដំឡើងសាច់ដុំហិរញ្ញវត្ថុនៅលើឆាកអន្តរជាតិ។ ជាក់ស្តែង កាលពីថ្ងៃទី១៧ ខែមិថុនា ទីក្រុងប៉េកាំង បានអនុញ្ញាតឱ្យធនាគាររដ្ឋចំនួន៦ រួមមាន Bank of China និង China Construction Bank ជាដើម ចាប់ផ្តើមធ្វើប្រតិបត្តិការប្រាក់យន់ក្រៅប្រទេសដោយសេរី នៅក្នុងតំបន់ពាណិជ្ជកម្មសេរីក្រុងសៀងហៃ។ បទបញ្ជាថ្មីនេះ គឺដើម្បីតភ្ជាប់សរសៃឈាមហិរញ្ញវត្ថុរវាងប្រាក់យន់ក្នុងស្រុក និងក្រៅប្រទេសឱ្យរត់ចូលគ្នាតែមួយ ដែលជាការបើកផ្លូវជួយសម្រួលដល់វិនិយោគិនអន្តរជាតិ ឱ្យងាកមកប្រើប្រាស់ប្រាក់យន់កាន់តែច្រើន ខណៈទីក្រុងប៉េកាំង នៅតែអាចក្តោបក្តាប់លំហូរមូលធនមិនឱ្យរបូតពីដៃ។

តំបន់ពាណិជ្ជកម្មសេរីក្រុងសៀងហៃ ដែលធ្លាប់តែជាមន្ទីរពិសោធន៍សាកល្បង ឥឡូវនេះបានក្លាយជាក្បាលម៉ាស៊ីនរុញច្រានប្រាក់យន់ឱ្យទៅជាឧបករណ៍ទូទាត់សកល ដោយចិន មិនចាំបាច់ហែកហួរ ឬបើកចំហទីផ្សារហិរញ្ញវត្ថុក្នុងស្រុកទាំងស្រុងនោះទេ។ ជាមួយគ្នានេះ ធនាគារកណ្តាលចិន ក៏កំពុងដុតដៃដុតជើងបញ្ចេញអាវុធទំនើបចុងក្រោយ គឺប្រាក់យន់ឌីជីថលផងដែរ។

ក្រុមអ្នកវិភាគសេដ្ឋកិច្ចបានវាយតម្លៃថា យុទ្ធសាស្ត្រអភិវឌ្ឍន៍បច្ចេកវិទ្យាហិរញ្ញវត្ថុរបស់ចិនលើកនេះ គឺធ្វើឡើង ដើម្បីបង្កើតប្រព័ន្ធការពារខ្លួនផង និងដើម្បីប្រជែងឥទ្ធិពលជាមួយប្រព័ន្ធបណ្តាញទូទាត់សកលលោក SWIFT ដែលគ្រប់គ្រងដោយលោកខាងលិចផង។

ទោះជាយ៉ាងណា ក្រុមអ្នកជំនាញនៅតែយល់ឃើញថា ទោះបីជាចិនព្យាយាមយ៉ាងណាក៏ដោយ ដរាបណាទីក្រុងប៉េកាំង នៅតែបន្តបិទខ្ទប់ និងគ្រប់គ្រងលំហូរមូលធនយ៉ាងតឹងរ៉ឹងដូចបច្ចុប្បន្ននោះ​ប្រាក់យន់ នៅតែត្រូវចំណាយពេលវែងឆ្ងាយទៀត ទើបអាចទៅអង្រួនកៅអីតំណែងរបស់លុយដុល្លារអាម៉េរិក ដែលជាមេធំគ្រប់គ្រងឃ្លាំងបម្រុងហិរញ្ញវត្ថុពិភពលោកបានទាំងស្រុងបាន៕

ដោយ: តែម សុខុម