ក្រុមប្រឹក្សាសហភាពអឺរ៉ុបកាលពីចុងសប្តាហ៍មុន បានអនុម័តសេចក្តីសម្រេចមួយដើម្បីផ្អាក នូវកិច្ចព្រមព្រៀងស្តីពីទិដ្ឋាការ ដែលបានចូលជាធរមានតាំងពីឆ្នាំ២០០៧ គិតចាប់ពីថ្ងៃទី១២ ខែកញ្ញាតទៅ។ កិច្ចព្រមព្រៀងសម្របសម្រួលទិដ្ឋាការនេះបានផ្តល់សិទ្ធិ និងសម្រួលដល់ការធ្វើដំណើររបស់ជនជាតិរុស្ស៊ីចូលទៅកាន់ទឹកដីសហភាពអឺរ៉ុប។
បើតាមសហភាពអឺរ៉ុប ការធ្វើសង្គ្រាមឈ្លានពានដែលមិនសមហេតុផល រួមទាំងការវាយប្រហារដោយមិនរើសមុខទៅលើជនស៊ីវិលនោះ រុស្ស៊ីបានធ្វើឱ្យខូចខាតដល់ទំនុកចិត្តរវាងគ្នាសម្រាប់ការធ្វើដំណើរ និងបានជាន់ឈ្លីលើតម្លៃជាមូលដ្ឋាននៃសហគមន៍អន្តរជាតិ។
ការរឹតបណ្តឹងនេះ នឹងធ្វើឱ្យថ្លៃស្នើសុំទិដ្ឋាការកើនឡើងពី៣៥ដុល្លារដល់៨០ដុល្លារ ដោយតម្រូវឱ្យបង្ហាញភស្តុតាងឯកសារបន្ថែមច្រើនជាងមុនផងដែរនៅពេលស្នើសុំ និងការបន្ថយសុពលភាពទិដ្ឋាការជាដើម។
ប្រទេសរុស្ស៊ីបានចេញមកឆ្លើយតបថា ខ្លួននឹងចាត់វិធានការសងសឹកចំពោះវិធានការទប់ស្កាត់របស់អឺរ៉ុបនេះ។ ទោះយ៉ាងណា នេះគ្រាន់ជាការរឹតបណ្តឹងការស្នើសុំទិដ្ឋាការប៉ុណ្ណោះ អឺរ៉ុប មិនបានឈប់ផ្តល់ទិដ្ឋាការទាំងស្រុងដល់ពលរដ្ឋរុស្ស៊ី តាមអ្វីដែលអ៊ុយក្រែនធ្លាប់ស្នើសុំនោះទេ។
អត្ថបទគួរអាន
បើតាមទីភ្នាក់ងារព្រំដែនរបស់សហភាពអឺរ៉ុប ជនជាតិរុស្សីជាងមួយលាននាក់បានចូលទៅក្នុងសហភាពអឺរ៉ុបតាមរយៈព្រំដែនគោកចាប់តាំងពីទីក្រុងមូស្គូបានឈ្លានពានអ៊ុយក្រែននៅក្នុងខែកុម្ភៈដែលពួកគេភាគច្រើនបានឆ្លងកាត់តាមប្រទេសហ្វាំងឡង់ និងអេស្តូនី។
សូមរំលឹកថា ការហោះហើរត្រង់រវាងរុស្ស៊ី និងសហភាពអឺរ៉ុបត្រូវបានលុបចោលនៅពេលជម្លោះនៅអ៊ុយក្រែនបានចាប់ផ្តើមផ្ទុះឡើង ដោយបានដាក់កម្រិតលើលទ្ធភាពរបស់ពលរដ្ឋរុស្សីក្នុងការចេញចូលទៅសហភាពអឺរ៉ុបតាំងពីពេលនោះមក៕
អត្ថបទ៖ សុខ ជា
