ចិនមានចំណែកទីផ្សារលើធាតុផ្សំសម្រាប់ផលិតអាគុយរថយន្តអគ្គិសនីសំខាន់ៗរហូតដល់ជាង៨០%

វិទ្យាស្ថានស្រាវជ្រាវយ៉ាណូ (Yano) មានមូលដ្ឋាននៅទីក្រុងតូក្យូប្រទេសជប៉ុនបានរាយការណ៍ថា សមាសធាតុថ្មលីចូម-អ៊ីយ៉ុងមានផ្នែកសំខាន់ៗចំនួនបួន គឺសមាសធាតុកាតូដ (cathodes) សមាសធាតុអាណូត (anodes) សមាធាតុអេឡិចត្រូលីត (electrolytes) និងសមាសធាតុបំបែក (separators)។

វិទ្យាស្ថាននេះបាននិយាយថា ក្រុមហ៊ុនអាជីវកម្មចិនបានកាន់កាប់ចំណែកទីផ្សារសមាសធាតុថ្មលីចូមអ៊ីយ៉ុងគិតជាបរិមាណជាមធ្យមជាង៨០% ដោយបរិមាណសម្រាប់សមាសធាតុកាតូដមានជិត៩០% បរិមាណសម្រាប់អាណូតមានជាង៩០% សម្រាប់សមាសធាតុបំបែកមានជាង៨០% និងសម្រាប់សមាសធាតុអេឡិចត្រូលីតមាន៨៥%។

ចំណែកទីផ្សារចិនសម្រាប់សមាសធាតុបំបែក ឬ separators បានកើនឡើងជាង១៣%ក្នុងរយៈពេលពីរឆ្នាំមកនេះ ហើយចំណែកទីផ្សារសមាសធាតុដូចគ្នានេះរបស់ជប៉ុនបានធ្លាក់ចុះពី២០%មកនៅត្រឹមតែជិត១០%ប៉ុណ្ណោះ។

ការកើនឡើងនូវតម្រូវការរបស់ចិនសម្រាប់ថ្មប្រភេទនេះដោយសារតែមានតម្រូវការកើនឡើងនូវរថយន្តអគ្គិសនីនៅក្នុងស្រុក។ ជាក់ស្ដែងយានយន្តថ្មីចំនួនជាង៣០% ត្រូវបានលក់នៅក្នុងប្រទេសចិនកាលពីឆ្នាំមុនដោយភាគច្រើន គឺជារថយន្តអគ្គិសនី ឬរថយន្តកូនកាត់ Hybrid។ អ្នកស្រាវជ្រាវនៅធនាគារមីហ្សូហូ (Mizuho)លោក តាង ជីន (Tang Jin) បាននិយាយថាប្រហែលពីរភាគបីនៃតម្រូវការសកលសម្រាប់អាគុយរថយន្តគឺនៅប្រទេសចិន។

ពេលនេះក្រុមហ៊ុនចិនដែលផលិតសមាសធាតុថ្មទាំងនេះ ក៏កំពុងសម្លឹងមើលការពង្រីកចំនួនអតិថិជនរបស់ពួកគេនៅបរទេសថែមទៀត ក្រោយពីមានអតិថិជនមួយចំនួនរួចហើយដូចជាក្រុមហ៊ុន CATL ដែលជាក្រុមហ៊ុនផលិតថ្មរថយន្តដ៏ធំបំផុតនៅក្នុងពិភពលោក៕