ជើងហោះហើរប្រភេទ MU5735 របស់ក្រុមហ៊ុន China Eastern Airlines ដែលកំពុងធ្វើដំណើរពីទីក្រុងគុនមីង រដ្ឋធានីនៃខេត្តយូណាន ភាគនិរតី ទៅកាន់ទីក្រុងនៃកំពង់ផែ ក្វាងចូវ គឺត្រូវបានធ្លាក់ នៅមុនពេលត្រៀមចុះចត។
ប្រព័ន្ធផ្សព្វផ្សាយចិនបានផ្សាយពីថតវីដេអូខ្លីៗដែលថតបានមានខ្លះថតពីកាមេរ៉ារថយន្ដ ដែលកំពុងបើកបរលើដងផ្លូវ បានបង្ហាញថា យន្តហោះធ្លាក់ចុះនៅពេលហោះចុះមកដីនៅមុំប្រហែល 35 ដឺក្រេ។
អ្នកភូមិដែលរស់នៅក្បែរតំបន់ធ្លាក់យន្តហោះនោះ បាននិយាយថា ពួកគេបានលឺ សម្លេងផ្ទុះ នៅពេលធ្លាក់យន្តហោះ ដែលវាប្រៀបដូចជាសម្លេងផ្គរលាន់។
មានផ្នែកខ្លះនៃយន្តហោះដែលត្រូវបានឆេះ ត្រូវបានគេរកឃើញនៅរាយប៉ាយពាសពេញភ្នំ ដែលយន្ដហោះធ្លាក់នោ។ ការធ្លាក់ចុះយន្ដហោះនេះ គឺជាការធ្លាក់ជាលើកដំបូងរបស់ប្រទេសចិន ចាប់តាំងពីឆ្នាំ ២០១០ មក ហើយតាមរយៈការរុករករបស់ក្រុមអ្នកជួយសង្គ្រោះ បានប្រទះឃើញ សំណល់អត្តសញ្ញាណប័ណ្ណ និងកាបូបត្រូវបានឆេះនៅកន្លែងកើតហេតុផងដែរ។
ប្រព័ន្ធផ្សព្វផ្សាយរបស់រដ្ឋចិនបានចុះផ្សាយថា ហេតុការនេះ គឺជារឿងដ៏គួរឲ្យសោកសៅ ហើយថាលទ្ធភាពអ្នកធ្វើដំណើរទាំងអស់ មិនមានការអះអាងណាមួយបញ្ចាក់ថា នៅមានជីវិតនោះទេ ខណៈកន្លែងធ្លាក់យន្តហោះនេះ ត្រូវបានធ្លាក់នៅតំបន់ភ្នំ ដែលមានច្រកចេញចូលតូចមួយប៉ុណ្ណោះ។ បន្ថែមពីនេះ នៅក្នុងតំបន់នោះត្រូវបានគេព្យាករណ៍នៅថា នឹងមានភ្លៀងធ្លាក់ក្នុងសប្តាហ៍នេះថែមទៀត។
អត្ថបទគួរអាន
ទោះជាយ៉ាងនេះក្តី ខ្សែវីដេអូពីកាសែត People's Daily បានបង្ហាញថា អ្នកស្វែងរក និងអ្នកជួយសង្គ្រោះ និងកម្លាំងទាហានប៉ារ៉ា កំពុងបន្ដតាមដានស្វែងរកអ្នករងគ្រោះបន្ដទៀត បើទោះបីជា មានសង្ឃឹមតិចថា ពួកគេនៅមានជីវិតក៏ដោយ។
ដោយឡែក អ្នកវិភាគអាកាសចរណ៍ដែលមានមូលដ្ឋាននៅសហរដ្ឋអាមេរិក លោក Robert Mann នៃក្រុមហ៊ុន R.W. Mann & Company បាននិយាយថា អ្នកស៊ើបអង្កេតនឹងត្រូវការឧបករណ៍កត់ត្រាទិន្នន័យហោះហើរ ដើម្បីយល់មូលហេតុដែលបណ្តាលឱ្យមានការធ្លាក់ចុះភ្លាមៗនេះ ។
គួរជម្រាបថា ប្រទេសចិនធ្លាប់មានការធ្លាក់ចុងក្រោយនៃយន្តហោះពាណិជ្ជកម្មក្នុងឆ្នាំ ២០១០ របស់ក្រុមហ៊ុន Henan Airlines បានសម្លាប់មនុស្ស ៤៤ នាក់ក្នុងចំណោមមនុស្ស ៩៦ នាក់នៅលើយន្តហោះនោះ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
