ក្រុមហ៊ុន ខេមបូឌា ស៊ីឃ្យួរឹធី ម.ក និង ស៊ីអ៊ីអូ ម៉ាស្ទ័រ ក្លឹប អ៊ិនវេសម៉ិន ម.ក សហការគ្នា​លើក​កម្ពស់​ការយល់ដឹង​ពីជម្រើស​នៃការវិនិយោគ​និង​ការស្វែងរក​ប្រភពទុន​បែបថ្មី

សូមគូសបញ្ជាក់ផងដែរថា ក្រុមហ៊ុន ខេមបូឌា ស៊ីឃ្យួរឹធី ម.ក គឺជាក្រុមហ៊ុនមូលបត្រដែលទទួលបានអាជ្ញាបណ្ណពីនិយ័តករមូលបត្រកម្ពុជា សម្រាប់បំពេញបេសកកម្មជួយជ្រោមជ្រែងសហគ្រាសខ្នាតតូច និងមធ្យមបែបស្ដង់ដារក្នុងការរៀបចំ និងស្វែងរកប្រភពទុនតាមរយៈការបោះផ្សាយមូលបត្រ (ទាំងមូលបត្រកម្មសិទ្ធិ និងមូលបត្របំណុល) ។ 

ខណៈដែល ក្រុមហ៊ុន ស៊ីអ៊ីអូ ម៉ាស្ទ័រ ក្លឹប អ៊ិនវេសម៉ិន ម.ក គឺជាក្រុមហ៊ុនគ្រប់គ្រងមូលនិធិ និងជាក្រុមហ៊ុនចែកចាយលក់ ទិញត្រឡប់មកវិញ ឬទូរទាត់សង ដែលទទួលបានអាជ្ញាបណ្ណពីនិយ័តករមូលបត្រកម្ពុជា សម្រាប់បំពេញបេសកកម្មជួយជ្រោមជ្រែងសហគ្រាសខ្នាតតូច និងមធ្យមបែបស្ដង់ដារក្នុងការរៀបចំ និងស្វែងរកប្រភពទុនតាមរយៈការប្រមូលទុនវិនិយោគពីសាធារណៈក្រោមរូបភាពជាគម្រោងវិនិយោគរួម ។

នាឱកាសនោះលោកស្រី ប៊ុត កេរ៉ាឌី ជាអភិបាល និងជានាយកប្រតិបត្តិ នៃក្រុមហ៊ុន ខេមបូឌា ស៊ីឃ្យួរឹធី ម.ក និង លោក ស៊ាន ធនិន ជានាយកប្រតិបត្តិនៃក្រុមហ៊ុន ស៊ីអ៊ីអូ ម៉ាស្ទ័រ ក្លឹប អ៊ិនវេសម៉ិន ម.ក បានចុះហត្ថលេខាលើអនុស្សរណៈនៃការយោគយល់គ្នានៅទីស្នាក់ការរបស់ក្រុមហ៊ុន ខេមបូឌា ស៊ីឃ្យួរឹធី ម.ក ។ 

ក្រៅពីគោលបំណងសំខាន់ខាងលើភាគីទាំងពីរក៏បានព្រមព្រៀងគ្នា និងប្ដេជ្ញាចិត្តក្នុងការ (១) ធ្វើឱ្យប្រសើរឡើងនូវការទទួលស្គាល់ក្រុមហ៊ុនទាំងពីរ ពីម្ចាស់អាជីវកម្ម និងសាធារណៈជនទាំងក្នុង និងក្រៅប្រទេស (២) រួមគ្នារៀបចំសិក្ខាសាលា និងកម្មវិធីបណ្តុះបណ្តាលសម្រាប់ម្ចាស់អាជីវកម្មដែលមានសក្តានុពល និងសាធារណៈជនដែលមានចំណាប់អារម្មណ៍ក្នុងការស្វែងរកប្រភពទុន តាមរយៈគម្រោងវិនិយោគរួម ការបោះផ្សាយលក់មូលបត្រកម្មសិទ្ធិ និង/ឬមូលបត្របំណុល និងការចុះបញ្ជីលក់មូលបត្រនៅផ្សារមូលបត្រកម្ពុជា ព្រមទាំងប្រធានបទនានាដែលទាក់ទងទៅនឹងសេវាកម្មនៃក្រុមហ៊ុនទាំងពីរនិងវិស័យមូលបត្រ (៣) រួមគ្នារៀបចំដំណើរទស្សនៈកិច្ចធុរកិច្ច សម្រាប់សមាជិក ដៃគូអាជីវកម្ម អតិថិជនដែលមានសក្តានុពលរបស់ ក្រុមហ៊ុន ទាំងពីរទៅកាន់ប្រទេសចិន ហុងកុង និងតៃវ៉ាន់ ។

លោកស្រី ប៊ុត កេរ៉ាឌី និងលោក ស៊ាន ធនិន ក៏បានបញ្ជាក់ផងដែរថាការចុះហត្ថលេខាលើអនុស្សរណៈនៃការយោគយល់គ្នានេះនឹងក្លាយជាគ្រឹះដ៍រឹងមាំសម្រាប់កិច្ចសហប្រតិបត្តិការរវាងក្រុមហ៊ុនទាំងពីរ ក៏ដូចជាការរួមចំណែកក្នុងការលើកកម្ពស់ភាពរីកចម្រើនក្នុងវិស័យមូលបត្រផងដែរ ៕