ត្រូវបានស្រង់សំដីដោយប្រព័ន្ធផ្សព្វផ្សាយរដ្ឋចិន នាយករដ្ឋមន្ត្រីលី ឃឺឆាំង អំឡុងពេលកិច្ចប្រជុំតាមវីដេអូជាមួយមន្ត្រីជាន់ខ្ពស់មកពីខេត្តធំៗចំនួនប្រាំមួយ ដែលដំណាងឱ្យជាង៤០%នៃសេដ្ឋកិច្ចចិនបានអះអាងថា សេដ្ឋកិច្ចរបស់ប្រទេសចិនបានបន្តងើបឡើងវិញតិចតួចបំផុតកាលពីខែកក្កដា ដែលជាកំណើនខុសពីការរំពឹងទុកឆ្ងាយ។
លោកបានដាក់បញ្ជាឱ្យអាជ្ញាធរខេត្តទាំង៦ អនុវត្តយ៉ាងហ្មត់ចត់នូវកញ្ចប់ថវិកា វិធានការគោលនយោបាយ ដែលធ្លាប់បានដាក់ចេញកាលពីខែឧសភា។ ការដាក់បញ្ជាដូចនេះក៏ដោយសារតែវិធានការដែលបានដាក់ចេញអនុវត្តកាលពីខែឧសភា មិនបានបង្ហាញប្រសិទ្ធភាពសោះឡើយ ជាក់ស្តែងដូចគេបានឃើញរបាយការណ៍កំណើនសេដ្ឋកិច្ចក្នុងខែកក្កដាស្រាប់ គឺវិស័យសំខាន់ៗដែលទ្រទ្រង់ដល់សេដ្ឋកិច្ចចិនសុទ្ធតែបង្ហាញពីកំណើនថយចុះជាងការពឹងរំពឹងទុក។ ជុំវិញនឹងបញ្ហាសេដ្ឋកិច្ចកើនយឺតនេះ លោកលី ឃឺឈាំង នាយករដ្ឋមន្ត្រីចក៏បានសន្យាដែរថា លោកនឹងជំរុញគុណភាពនៃគោលនយោបាយម៉ាក្រូសេដ្ឋកិច្ចបន្ថែមទៀត ដើម្បីរក្សាសកម្មភាពកំណើនក្នុងរង្វង់សមហេតុសមផលមួយ។
របាយការណ៍ពីការិយាល័យស្ថិតិជាតិចិនកាលពីថ្ងៃចន្ទបង្ហាញថា ការចំណាយរបស់ពលរដ្ឋ ការចំណាយលើអាជីវកម្ម និងសេវាកម្មបានធ្លាក់ចុះខ្លាំងកាលពីខែកក្កដា។ ប្រការនេះត្រូវបាន នាយករដ្ឋមន្ត្រីចិនសន្យាថា នឹងចាត់វិធានការបន្ថែមទៀត ដើម្បីជំរុញការប្រើប្រាស់ និងពង្រីកការវិនិយោគប្រកបដោយប្រសិទ្ធភាព។ លោកក៏បានប្តេជ្ញាថា បង្កើនការគាំទ្រគោលនយោបាយដើម្បីរក្សាស្ថិរភាពការងារ តម្លៃទំនិញ និងធានានូវកំណើនសេដ្ឋកិច្ចទាំងមូលតែម្តងសម្រាប់ត្រីមាសទី៣ឆ្នាំនេះ។
អត្ថបទគួរអាន
សូមជម្រាបថា រដ្ឋាភិបាលក្រុងប៉េកាំងទំនងជាខកចិត្តយ៉ាងខ្លាំងនឹងរបាយការណ៍សេដ្ឋកិច្ចខែកក្កដារបស់ខ្លួន ទើបសម្រេចកោះប្រជុំ និងបង្ហាញការប្តេជ្ញាចិត្តភ្លាមៗបន្ថែមទៀតនៅពេលនេះ។ ទិន្នន័យសេដ្ឋកិច្ចចុងក្រោយនេះ សុទ្ធតែបានបង្ហាញពីវិស័យចម្បងៗរបស់ចិន មានកំណើនយឺតជាងការប៉ាន់ស្មានទុកទាំងអស់ ក្នុងនោះរួមមាន ផលិតកម្មឧស្សាហកម្ម ការលក់រាយ លំហូរនៃឡានដឹកទំនិញ ភាព ការងារធ្វើជាដើម។
ភាពរឹងទទឹងមិនផ្លាស់ប្តូរ ដោយនៅតែបន្តអនុវត្តគោលនយោបាយគ្មានកូវីដ១៩ដ៏តឹងរ៉ឹងរបស់រដ្ឋាភិបាលទីក្រុងប៉េកាំង បានធ្វើឲ្យមានការលំបាកក្នុងការរក្សានូវវឌ្ឍនភាពសេដ្ឋកិច្ច និងធ្វើឱ្យអ្វីៗទាំងអស់ស្ថិតនៅក្នុងភាពស្រពេចស្រពិល។ ស្រពេចស្រពិល ក៏ដោយសារតែ ភាពភ័យខ្លាចក្នុងការរឹតបន្តឹងនិងការបិទខ្ទប់ម្តងហើយម្តងទៀត នៅតែបន្តកើតមានក្នុងចំណោមពលរដ្ឋ អាជីវករ និងពិសេសអ្នកវិនិយោគ។ ខណៈកង្វះខាតថាមពលនារដូវក្តៅឆ្នាំនេះ កំពុងចោទជាបញ្ហាមួយថ្មីទៀតសម្រាប់រោងចក្រឧស្សាហកម្មធំៗនៅក្នុងប្រទេសចិនផងដែរ៕
