ការរីកសាយភាយទំនិញមានតម្លៃថោករបស់ចិន កំពុងគំរាមកំហែងផលិតកម្មនៅតំបន់អាស៊ាន

អាហារ និងភេសជ្ជៈមានតម្លៃសមរម្យរបស់ចិន ដូចជា Mixue និង Haidilao ជាដើម កំពុងពង្រឹងការឈរជើងរបសខ្លួននៅតំបន់អាស៊ីអាគ្នេយ៍ជាមួយការទាក់ទាញអ្នកប្រើប្រាស់ជាយុវជនតាមរយៈការលក់ក្នុងតម្លៃថោក ក្រោយប្រទេសចិនកំពុងជួបវិបត្តិអប្បផរណា។ បញ្ហានេះ កំពុងគំរាមកំហែងដល់ខ្សែច្រវាក់ផលិតកម្មចំណីអាហារ និងភេសជ្ជៈនៅតាមបណ្តាប្រទេសមួយចំនួននៅក្នុងតំបន់អាស៊ាន។

ជាក់ស្តែងនៅក្នុងប្រទេសវៀតណាម ដែលជាប្រទេសភូមិផងរបងជាមួយចិន ហាងលក់គ្រឿងភេសជ្ជៈ Mixue បានក្លាយជាកន្លែងប្រមូលផ្តុំដ៏ពេញនិយមសម្រាប់សិស្សានុសិស្សពេលម៉ោងចេញលេង ឬសម្រាកពីការសិក្សាម្ដងៗដោយសិស្សខ្លះបានទៅហាងបែបនេះគ្រប់ពេលតែម្ដងព្រោះវាមានតម្លៃថោកសមរម្យ។ បុគ្គលិកម្នាក់នៅក្នុងហាងនេះ បានអះអាងថា ហាងនេះអាចលក់ភេសជ្ជៈជាមធ្យមបានចន្លោះពី៥០០ទៅ១,០០០កំប៉ុងក្នុង១ថ្ងៃៗ ហើយភេសជ្ជៈដែលលក់ដាច់ជាងគេ គឺប្រទាលកន្ទុយក្រពើ ដោយវាមានតម្លៃថោកជាងភេសជ្ជៈក្នុងស្រុកចន្លោះពី៣០ទៅ៥០%។

ចំណែកនៅប្រទេសឥណ្ឌូនេស៊ី ឯណោះវិញ ខ្សែច្រវាក់អាហាររបស់ហាង Mixue នេះបានចូលទៅដល់ប្រទេសនេះលើកដំបូងនៅឆ្នាំ២០២០ ហើយបានបន្តរីកសាយភាពរហូតដល់ជាង២,៤០០កន្លែងមកទល់បច្ចុប្បន្ន។ ចំណែកនៅប្រទេសម៉ាឡេស៊ី មានហាងប្រភេទនេះជាង១៥០កន្លែង ហើយបន្តរីកដុះដាលដល់ប្រទេសថៃ និងហ្វីលីពីន ផងដែរ ខណៈដែលទីតាំងនៅជុំវិញពិភពលោកមានចំនួនជាង៣៦,០០០កន្លែង។

ចំណីអាហារ និងភេសជ្ជៈរបស់ចិន កំពុងប្រឈមនឹងសម្ពាធអប្បផរណានៅក្នុងស្រុក ដែលបង្ខំឱ្យម្ចាស់ផលិតកម្មលក់បញ្ចុះតម្លៃ ហើយក្រុមហ៊ុនផលិតកម្មចិនទាំងនោះកំពុងសម្លឹងមើលការពង្រីកទីផ្សារមកកាន់តំបន់អាស៊ីអាគ្នេយ៍កាន់តែច្រើន។ ការណ៍នេះ បាននិងកំពុងជះឥទ្ធិពលដល់ឧស្សាហកម្មចំណីអាហារ និងភេសជ្ជៈនៅតំបន់អាស៊ាន ដោយឧស្សាហកម្មខ្លះបានជំរុញឱ្យរដ្ឋាភិបាលរបស់ខ្លួនចាត់វិធានការទប់ស្កាត់ការរំហូរចំណីអាហារចិនដូចទឹកបាក់ទំនប់៕

អត្ថបទ៖ សុខ មង្គល