តើក្រុមហ៊ុនអចលនទ្រព្យចិន ស៊ីម៉ៅ អាចក្លាយជាក្រុមហ៊ុនទីពីរ ដែលត្រូវបានរំលាយដោយតុលាការ ហុងកុងទេ?

ក្រុមហ៊ុនអភិវឌ្ឍន៍អចលនទ្រព្យចិន Shimao Group ត្រូវបានសារព័ត៌មានរាយការណ៍ថា ធនាគារ China Construction Bank បានដាក់ពាក្យបណ្តឹងរំលាយក្រុមហ៊ុននេះ នៅហុងកុងជុំវិញការខកខានសងសំណងកាតព្វកិច្ចហិរញ្ញវត្ថុ ដែលមានតម្លៃជិត២០២លានដុល្លារ។ ការសម្រេចចិត្តចាត់វិធានការផ្លូវច្បាប់ដ៏កម្ររបស់ធនាគាររដ្ឋចិននេះ គឺដើម្បីបង្ហាញពីការប្រឆាំងនឹងអ្នកអភិវឌ្ឍន៍ចិន ដែលមិនគោរពច្បាប់​។

ក្រុមហ៊ុននេះអាចមានវាសនាដូចក្រុមហ៊ុន China Evergrande Group ដែលត្រូវបានតុលាការហុងកុង ចេញសាលក្រមរំលាយចោល ដោយសារវិបត្តិបំណុលស្រដៀងគ្នានេះកាលពីចុងខែមករា ឆ្នាំ២០២៤ កន្លងទៅថ្មីៗនេះ។ នៅក្នុងស្ថានភាពបច្ចុប្បន្ន ភាគហ៊ុនដែលបានចុះបញ្ជីនៅហុងកុងរបស់ក្រុមហ៊ុន Shimao Group បានធ្លាក់ចុះដល់ទៅជិត៩% នៅលើទីផ្សារហ៊ុន Hang Seng ក្នុងទីក្រុងហុងកុង ដែលបានបើកការជួញដូរនៅព្រឹកថ្ងៃទី៨ ខែមេសា ឆ្នាំ២០២៤។

យ៉ាងណាក៏ដោយ ក្រុមហ៊ុន Shimao Group បានចេញមកច្រានចោលចំពោះការចោទប្រកាន់នេះ ហើយបានលើកឡើងថា ខ្លួនកំពុងតែរៀបចំដំណើរការទូទាត់បំណុលក្រៅប្រទេស ដែលមានតម្លៃជិត១២ពាន់លានដុល្លារ ដោយមានគោលបំណងកាត់បន្ថយវាឲ្យបានដល់កម្រិត៦០ %ឯណោះ។ ទន្ទឹមនេះក្រុមហ៊ុននេះអះអាងថា ពាក្យបណ្តឹងនេះមិនតំណាងឱ្យផលប្រយោជន៍រួមនៃម្ចាស់បំណុលរបស់ក្រុមហ៊ុន និងភាគីពាក់ព័ន្ធផ្សេងទៀតឡើយ ខណៈធនាគារ China Construction Bank មិនបានឆ្លើយតបភ្លាមៗចំពោះសំណើសុំការអត្ថាធិប្បាយជុំវិញការលើកឡើងនេះទេ។

វិស័យអចលនទ្រព្យនៅក្នុងប្រទេសចិន បានចាប់ផ្តើមមានវិបត្តិតាំងពីឆ្នាំ២០២១ ហើយក្រុមហ៊ុន Shimao Group ដែលមានមូលដ្ឋាននៅទីក្រុងសៀងហៃ គឺស្ថិតក្នុងចំណោមក្រុមហ៊ុនអ្នកអភិវឌ្ឍន៍អចលនទ្រព្យចិនជាច្រើន ដែលមានបញ្ហាខកខានទូទាត់ការប្រាក់ និងការទូទាត់ថ្លៃដើមសម្រាប់មូលបត្របំណុលក្រៅប្រទេសផ្សេងៗ។

ទិន្នន័យពីការិយាល័យស្ថិតិរបស់ចិន ដែលបានចេញផ្សាយនៅក្នុងខែមីនា បានបង្ហាញថា ការ វិនិយោគក្នុងវិស័យអចលនទ្រព្យនៅក្នុងប្រទេសចិនបានធ្លាក់ចុះ៩% ស្របពេលដែលការលក់អចលនទ្រព្យបានធ្លាក់ចុះជាង២០%៕

ដោយៈ សរ សុជាតិ