គណៈកម្មការនិយ័តកម្មមូលបត្រចិន បាននិយាយនៅក្នុងសេចក្តីថ្លែងការណ៍មួយថា នៅរវាងឆ្នាំ២០១៩ និងឆ្នាំ២០២០ ក្រុមហ៊ុនអចលនទ្រព្យ Evergrande បានបង្កើនប្រាក់ចំណូល និងប្រាក់ចំណេញក្លែងបន្លំ ដោយការទទួលស្គាល់ប្រាក់ចំណូលមុនកាលកំណត់ បណ្តាលឱ្យមានការចេញមូលបត្របំណុលក្លែងក្លាយ ដែលស្នើសុំឱ្យបោះផ្សាយជាសាធារណៈលើទីផ្សារប្តូរប្រាក់។
សេចក្តីថ្លែងការណ៍នេះបាននិយាយថា គណៈកម្មការនិយ័តករនេះក៏បានពិន័យក្រុមហ៊ុន Evergrande ជាទឹកប្រាក់ជាង៥៧៧លានដុល្លារ និងពិន័យស្ថាបនិកក្រុមហ៊ុននេះ គឺលោក ហួយ កាយ៉ាន (Hui Ka Yan) នូវទឹកប្រាក់ជាង៦លានដុល្លារព្រមទាំងបានហាមឃាត់ស្ថាបនិករូបនេះមិនឱ្យចូលទីផ្សារមូលបត្រឡើងវិញអស់មួយជីវិតផងដែរ។
ក្រុមហ៊ុនខ្នាតយក្សអចលនទ្រព្យចិន Evergrande គឺជាអ្នកអភិវឌ្ឍន៍អចលនទ្រព្យដែលជំពាក់បំណុលច្រើនជាងគេបំផុតរបស់ពិភពលោក ជាមួយនឹងបំណុលសរុបជាង៣០០ពាន់លានដុល្លារ។
អត្ថបទគួរអាន
ពាក់ព័ន្ធនឹងអចលនទ្រព្យនៅប្រទេសចិនវិញ ការស្ទង់មតិឯកជនមួយបានបង្ហាញថា តម្លៃផ្ទះថ្មីនៅប្រទេសចិន បានកើនឡើងបន្តិចសម្រាប់រយៈពេល៩ខែជាប់គ្នាក្នុងខែឧសភា ដោយសារតែមានវិធានការគាំទ្រមួយចំនួនរបស់រដ្ឋាភិបាលចិន ដើម្បីជំរុញវិស័យអចលនទ្រព្យដែលបានរងគ្រោះដោយវិបត្តិមួយនេះ។ ទិន្នន័យពីអ្នកស្រាវជ្រាវអចលនទ្រព្យ China Index Academy បានបង្ហាញកាលពីថ្ងៃសៅរ៍ ថា តម្លៃផ្ទះថ្មីជាមធ្យមនៅទូទាំង១០០ទីក្រុងបានកើនឡើង០,២៥% ក្នុងខែឧសភា បន្ទាប់ពីការកើនឡើង០,២៧% នៅក្នុងខែមេសា។
រដ្ឋាភិបាលចិន កំពុងតស៊ូជំរុញការលក់ផ្ទះ ឬបង្កើនសាច់ប្រាក់ងាយស្រួលដោយចាត់វិធានការជំរុញ និងបន្ធូរបន្ថយជាបន្តបន្ទាប់។ ប្រទេសចិន បានប្រកាសជំហាន«ជាប្រវត្តិសាស្ត្រ»កាលពីពាក់កណ្តាលខែឧសភា ដើម្បីធ្វើឱ្យមានស្ថិរភាពក្នុងវិស័យនេះ ដោយធនាគារកណ្តាលបានបន្ធូរបន្ថយច្បាប់កម្ចីទិញផ្ទះ និងសម្របសម្រួលការផ្តល់មូលនិធិបន្ថែមចំនួន១៤០ពាន់លានដុល្លារ ហើយរដ្ឋាភិបាលក្នុងតំបន់បានប្តេជ្ញាចិត្តក្នុងការទិញអាផាតម៉ិនជាបន្តទៀត។ ក្រុមវិនិយោគិនសង្ឃឹមថា វិធានការនេះបានបង្ហាញពីការចាប់ផ្តើមអន្តរាគមន៍របស់រដ្ឋាភិបាលដែលមានការសម្រេចចិត្តកាន់តែច្រើនក្នុងការជំរុញតម្រូវការអ្នកទិញផ្ទះ និងការបង្អែបង្អង់ការធ្លាក់ចុះតម្លៃផងដែរ៕
អត្ថបទ៖ សុខ មង្គល
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
