ប្រសិនបើផែនការនេះកើតឡើងមែន នេះជាគំរូដ៏មហិច្ឆតារបស់ចិន ក្នុងការនាំចេញសមត្ថភាពឧស្សាហកម្មធន់ធ្ងន់ដែលលើសតម្រូវការ នៅក្នុងប្រទេសរបស់ខ្លួន ទៅកាន់ប្រទេសក្រៅនានា។
យោងតាមទីភ្នាក់ងារព័ត៌មាន រ៉យទ័រ (Reuters) ដដែល ក្រុមហ៊ុន Baowu កំពុងសិក្សាលទ្ធភាពដឹកជញ្ជូនរោងចក្ររំលាយរ៉ែដែកចំនួន ២ ដែលមានសមត្ថភាពផលិតរួមបញ្ចូលគ្នា ៣,១លានតោន រួមជាមួយនឹងម៉ាស៊ីនបំលែងដែកទៅជាដែកថែបចំនួន ២ ផងដែរ មកកាន់ប្រទេសកម្ពុជា នៅចុងឆ្នាំ២០១៩នេះ។
ប្រទេសចិនបានបិទរោងចក្រផលិតដែកថែបដែលសរុបសមត្ថភាពផលិតដល់ទៅជាង ១៥០លានតោន ក្នុងរយៈពេល ៣ឆ្នាំកន្លងទៅ នៅក្នុងយុទ្ធនាការមួយដើម្បីធ្វើទំនើបកម្មសេដ្ឋកិច្ចរបស់ខ្លួន ប៉ុន្តែ គិតជាទិន្នផលពិភពលោក គឺចិននៅតែផលិតប្រមាណពាក់កណ្ដាលនៃទិន្នផលនេះ ដោយមានសមត្ថភាពផលិត ៩៨០លានតោន ក្នុងមួយឆ្នាំ។
រូបភាពតំណាងឡរំលាយរ៉ែដែក នៅប្រទេសអេស្ប៉ាញ។ រូបភាព Wikipedia
តើបានអានអត្ថបទនេះ ឬនៅ?
ឧបករណ៍ដែលកំពុងសិក្សាដឹកមកដំឡើងនៅកម្ពុជានេះ គឺកាលពីមុនស្ថិតនៅក្នុងរោងចក្រមួយ នៅតំបន់ដាច់ស្រយាលនៃភាគពាយ័ព្យប្រទេសចិន ប៉ុន្តែ រោងចក្រនោះត្រូវអាជ្ញាធរចិនបិទទ្វារ កាលពីឆ្នាំ២០១៧។
ទីភ្នាក់ងារព័ត៌មាន រ៉យទ័រ បានដកស្រងសម្ដីមេការម្នាក់របស់ក្រុមហ៊ុនចិន ដែលនិយាយថា «ឧបករណ៍នេះអាចនឹងត្រូវគេមើលឃើញថា ហួសសម័យនៅក្នុងប្រទេសចិន ប៉ុន្តែ វានៅតែទំនើបខ្លាំងនៅឡើយ សម្រាប់ប្រទេសកម្ពុជា»។
គម្រោងរើឧបករណ៍ផលិតដែកថែបពីប្រទេសចិនមកកម្ពុជានេះ ត្រូវគេមើលឃើញថា ជារឿងធម្មតា ពីព្រោះថា ដោយសារកម្ពុជាកំពុងមានវិនិយោគិនចិនជាច្រើនដែលវិនិយោគលើវិស័យសំណង់យ៉ាងគគ្រឹកគគ្រេង ដូច្នេះ អ្នកវិនិយោគិនចិនក៏យល់ឃើញថា វានឹងមានប្រយោជន៍ចំពោះពួកគេ ក្នុងការដំឡើងរោងចក្រផលិតដែកថែបដើម្បីបំពេញតម្រូវការផ្នែកសាងសង់ពីសំណាក់ក្រុមហ៊ុនសាងសង់ចិន។
យោងតាម រ៉យទ័រ ប្រទេសកម្ពុជាបានសម្ដែងការស្វាគមន៍ចំពោះវិនិយោគទុននៅក្នុងគ្រប់វិស័យ។ មន្ត្រីអ្នកនាំពាក្យក្រសួងពាណិជ្ជកម្ម លោក សេង ថៃ ថ្លែងប្រាប់ រ៉យទ័រ ថា «ប្រសិនបើមានរោងចក្រផលិតដែកថែបនៅប្រទេសរបស់យើង វានឹងជួយច្រើនដល់វិស័យសំណង់។ យើងមានរោងចក្រស៊ីម៉ងត៍ស្រាប់ហើយ ដូច្នេះបើមានរោងចក្រដែកថែបទៀត វានឹងតែប្រសើរ»។
សារព័ត៌មានដដែល សរសេរថា វាជាការកម្រណាស់ ដែលរោងចក្រចិនត្រូវរើទីតាំងឧបករណ៍ផលិតដែកថែបទៅកាន់ប្រទេសផ្សេង ក្រៅតែពីក្រុមហ៊ុនទាំងឡាយដែលព្យាយាមលួចនាំចេញនូវឡរំលាយរ៉ែដែកខ្នាតតូចៗដែលត្រូវអាជ្ញាធរចិនហាមឃាត់ បន្ទាប់ពីទីក្រុងប៉េកាំងបើកយុទ្ធនាការបង្ក្រាបទៅលើរោងចក្រដែលផលិតដែកថែបគុណភាពទាប កាលពីឆ្នាំ២០១៧ តែប៉ុណ្ណោះ៕
