ក្រុមហ៊ុនតាក់ស៊ីរបស់ចិនមួយ ដាក់ពាក្យស្នើសុំបោះផ្សាយលក់ភាគហ៊ុននៅសហរដ្ឋអាម៉េរិក

ក្រុមហ៊ុនប្រតិបត្តិករបម្រើសេវាកម្មតាក់ស៊ីរបស់ចិនមួយនេះ កំពុងសាកល្បង និងធ្វើពាណិជ្ជកម្មតាក់ស៊ីរ៉ូបូត និងបច្ចេកវិទ្យាបើកបរដោយខ្លួនឯងផ្សេងទៀតនៅក្នុងទីក្រុងចំនួន៣០នៅទូទាំងប្រទេសចំនួន៧ រួមទាំងប្រទេសចិន ផងដែរ។ ប្រព័ន្ធផ្សព្វផ្សាយចិន និងមួយចំនួនទៀតបានរាយការណ៍ថា ក្រុមហ៊ុន WeRide អាចរៃអង្គាសប្រាក់បានរហូតដល់៥០០លានដុល្លារតាមរយៈការឡើង IPO លើទីផ្សារភាគហ៊ុន Nasdaq ដោយអ្នកខ្លះមើលឃើញថា វាក្លាយជាការចុះបញ្ជីដ៏ធំបំផុតសម្រាប់ក្រុមហ៊ុនចិន នៅសហរដ្ឋអាម៉េរិក ចាប់តាំងពីកម្មវិធីហៅជិះ Didi ក្នុងឆ្នាំ២០២១។

ក្រុមហ៊ុន WeRide ត្រូវបានបង្កើតឡើងក្នុងឆ្នាំ២០១៧ និងមានមូលដ្ឋាននៅទីក្រុងក្វាងចូវ ហើយស្ថាបនិករបស់ក្រុមហ៊ុននេះ គឺលោក ថូនី ហាន (Tony Han) បានចូលរួមនៅក្នុងការអភិវឌ្ឍ​បច្ចេកវិទ្យាបើកបរដោយខ្លួនឯងនេះនៅសហរដ្ឋអាម៉េរិក សម្រាប់ក្រុមហ៊ុនស្វែងរកតាមអ៊ីនធឺណិតខ្នាតយក្សរបស់ចិនប៉ៃទូ (Baidu)៕

អត្ថបទ៖ សុខ មង្គល