ក្រុមហ៊ុនចិនចុះបញ្ជីផ្សារភាគហ៊ុននៅអាមេរិក រងចំណាត់ការក្ដៅពីអាជ្ញាធរចិនជាបន្ដបន្ទាប់

ការបើកការស៊ើបអង្កេតពីសំណាក់និយ័តករចិន ទៅលើក្រុមហ៊ុនដែលបានចុះបញ្ជីនៅផ្សារភាគហ៊ុននៅអាមេរិកនេះ រួមមានក្រុមហ៊ុន Full Truck Alliance ដែលជាក្រុមហ៊ុនថ្នាលអនឡាញសម្រាប់សេវារថយន្ដដឹកជញ្ជូនទំនិញធំៗ និង ក្រុមហ៊ុន Kanzhun ដែលជាថ្នាលអនឡាញមួយទៀត ផ្ដល់សេវាកម្មរើសបុគ្គលិក។

រដ្ឋបាលលំហអ៊ីនធើណែតចិន បានឲ្យដឹងថា អាជ្ញាធរបានប្រាប់ក្រុមហ៊ុនទាំងពីរនេះ ឲ្យបញ្ឈប់ការចុះឈ្មោះរបស់អ្នកប្រើប្រាស់ថ្មីៗនៅលើបណ្ដាញរបស់ខ្លួនសិន អំឡុងពេលអាជ្ញាធរស៊ើបអង្កេត។

ការប្រកាសពីការស៊ើបអង្កេតលើក្រុមហ៊ុនចិនទាំងពីរនេះ គឺធ្វើឡើងនៅប៉ុន្មានម៉ោងប៉ុណ្ណោះ បន្ទាប់ពីអាជ្ញាធរចិន បានដកកម្មវិធីរបស់ក្រុមហ៊ុន Didi ចេញពី App Store ក្នុងប្រទេសចិន ដែលបានធ្វើឲ្យក្រុមហ៊ុន ដែលទើបឡើងផ្សារភាគហ៊ុនញ៉ូវយ៉កថ្មី្មថ្មោងមួយនេះ កំពុងជួបបញ្ហាជាច្រើន ពិសេសគឺតម្លៃភាគហ៊ុនរបស់ក្រុមហ៊ុននេះ បានធ្លាក់ចុះ ២៥% នៅថ្ងៃអង្គារសប្ដាហ៍នេះ ដោយមកនៅត្រឹមតម្លៃប្រមាណជាង ១១ដុល្លារប៉ុណ្ណោះ ក្នុងមួយភាគហ៊ុន ខណៈដែលតម្លៃបោះផ្សាយ IPO ដំបូងមានដល់ជាង១៦ដុល្លារក្នុងមួយភាគហ៊ុន។ 

អាជ្ញាធរចិន នៅមួយរយៈចុងក្រោយនេះ បានដាក់ការរឹតត្បិតខ្លាំងមែនទែន ចំពោះក្រុមហ៊ុនបច្ចេកវិទ្យាយក្សៗរបស់ខ្លួន ពិសេសក្រុមហ៊ុនដែលរកស៊ីមានប្រតិបត្តិការនៅក្រៅប្រទេស។ ហើយក្រុមហ៊ុន Didi ក៏មិនមែនជាករណីទី១ដែរ ដែលរដ្ឋាភិបាលចិនបង្ក្រាបយ៉ាងចាស់ដៃបែបនេះ។

គេនៅចាំបានថា កាលពីឆ្នាំមុន ក្រុមហ៊ុន Ant Group របស់កំពូលមហាសេដ្ឋី Jack Ma ក៏ធ្លាប់ត្រូវបានអាជ្ញាធរចិនបង្ក្រាប និងលុបចោលគម្រោងបោះផ្សាយ IPO តម្លៃ ៣៤ពាន់លានដុល្លារអាមេរិករបស់ខ្លួនផងដែរ។ ក្រៅពីនេះ ក្រុមហ៊ុន Alibaba របស់មហាសេដ្ឋីរអិលមាត់ Jack Ma ដដែលនេះ ក៏ទើបតែត្រូវបានអាជ្ញាធរចិនផាកពិន័យក្នុងទំហំទឹកប្រាក់ជិត៣ពាន់លានដុល្លារអាមេរិកផងដែរ ទាក់ទងនឹងការការរំលោភលើច្បាប់ពាណិជ្ជកម្ម៕