លោក ត្រាំ គំរាមដំឡើងពន្ធ១០០% លើប្រទេសណា ដែលហ៊ានយកពន្ធពីក្រុមហ៊ុនបច្ចេកវិទ្យាអាម៉េរិក

លោក ត្រាំ បានប្រកាសតាមបណ្តាញ​ទំនាក់ទំនង​សង្គម​ Truth Social ថា ប្រទេសអឺរ៉ុប ជាច្រើនកំពុងត្រៀមអនុវត្តពន្ធនេះ ហើយបានព្រមានថា ប្រសិនបើប្រទេសណាអនុវត្តមែន សហរដ្ឋអាម៉េរិកនឹងដំឡើងពន្ធ១០០% លើទំនិញទាំងអស់ពីប្រទេសនោះភ្លាមៗ ដោយវិធានការនេះនឹងមានអាទិភាពលើកិច្ចព្រមព្រៀងពាណិជ្ជកម្មទាំងអស់ ទោះបានចុះហត្ថលេខាហើយ ឬ មិនទាន់អនុវត្តក៏ដោយ។

ការព្រមាននេះកើតឡើងបន្ទាប់ពីប្រធានាធិបតីបារាំង លោក អេម៉ានុយអែល ម៉ាក្រុង បដិសេធមិនដកពន្ធឌីជីថល៣% ដែលបារាំង បានអនុវត្តលើក្រុមហ៊ុនបច្ចេកវិទ្យាយក្សរបស់អាម៉េរិក តាំងពីឆ្នាំ២០១៩ ហើយសភាបារាំង ថែមទាំងកំពុងពិចារណាដំឡើងពន្ធនេះដល់៦%ទៀតផង។ បច្ចុប្បន្ន បារាំង អង់គ្លេស អូទ្រីស អេស្ប៉ាញ និងប្រទេសអឺរ៉ុបមួយចំនួនទៀតកំពុងប្រមូលពន្ធលើសេវាកម្មឌីជីថល ខណៈអាម៉េរិក ចាត់ទុកថា ពន្ធទាំងនេះជាការរើសអើង និងកំពុងកំណត់គោលដៅ ដើម្បីគាបកក្រុមហ៊ុនបច្ចេកវិទ្យាអាម៉េរិក ដែលគ្រប់គ្រងទីផ្សារឌីជីថលពិភពលោក។ ការគំរាមដំឡើងពន្ធ១០០% របស់លោក ដូណាល់ ត្រាំ ត្រូវបានគេមើលឃើញថា អាចជំរុញឱ្យជម្លោះពាណិជ្ជកម្មរវាងសហរដ្ឋអាម៉េរិក និងអឺរ៉ុបកាន់តែកើនឡើងកម្ដៅ៕

ដោយ: តែម សុខុម