ជីប ម៉ុង បោះទុន ៧៥លានដុល្លារ វិនិយោគលើធនាគារ សាខាទី ២

នៅក្នុងរយៈពេលមិនដល់ ១ខែផង បន្ទាប់ពី ក្រុមហ៊ុន ជីប ម៉ុង បានបើកសម្ពោធធនាគារ ជីប ម៉ុង ខមមើសល ប៊ែង សាខាដំបូងបង្អស់របស់គ្រួសារអាណាចក្រ ជីប ម៉ុង រួចមក ថ្ងៃនេះ ជីប ម៉ុង បានពង្រីកបន្ថែម ការវិនិយោគក្នុងទឹកប្រាក់ប្រមាណ ៧៥លានដុល្លារអាមេរិក លើ ធនាគារ ជីប ម៉ុង សាខាព្រះនរោត្តម ដែលជាធនាគារឌីជីថលពេញលេញ សាខាទី ២ និងបានបើកសម្ពោធដាក់ឲ្យដំណើរការជាផ្លូវការហើយ។

លោក យូ វ៉ាន់កាប់ អគ្គនាយកធនាគារ ជីប ម៉ុង ខមមើសល ប៊ែង បានអះអាងថា ធនាគារថ្មីនេះ បង្កើតឡើង ដើម្បីបម្រើសេវាកម្មហិរញ្ញវត្ថុបែបឌីជីថលដ៏សម្បូរបែប ដោយប្រើប្រាស់ បច្ចេកវិទ្យាដែលមាននិរន្តរភាព រហូតដល់ថ្ងៃអនាគត។

ចំណែក លោក វង្ស សុខាល អគ្គនាយករងធនាគារ ជីប ម៉ុង ខមមើសល ប៊ែង បានបញ្ជាក់ដែរថា ធនាគារ ជីប ម៉ុង ខមមើសល ប៊ែង ជាធនាគារបង្កើតឡើងដោយកូនខ្មែរ ដែលចំណាយទឹកប្រាក់វិនិយោគជាង ៧៥លានដុល្លារអាមេរិក នឹងមានឆន្ទៈក្នុងការប្រែក្លាយទៅជា ធនាគារឈានមុខគេនៅកម្ពុជា មុននឹងបោះជំហានចូលក្នុងវិស័យធនាគារនៅក្នុងតំបន់។

គួរជម្រាបដែរថា ធនាគារ ជីប ម៉ុង ក៏គ្រោងនឹងបើកសាខាបន្ថែមចំនួន ៥ទៀត ក្នុងពេលដ៏ខ្លីខាងមុខ ជាមួយផលិតផល និងសេវាកម្មថ្មីៗ ប្រកបដោយទំនុកចិត្តក្នុងទីផ្សារប្រទេសកម្ពុជា ស្របពេលដែលរបាយការណ៍ធនាគាជាតិនៃកម្ពុជា ប្រចាំឆ្នាំ ២០១៨ បានបង្ហាញថា ទំហំនៃប្រតិបត្តិការនៃសេវាធនាគារអេឡិចត្រូនិច ដែលបានប្រើប្រាស់បច្ចេកវិទ្យាហិរញ្ញវត្ថុ មានរហូតដល់ជាង ៩.៦០០ លានដុល្លារអាមេរិក៕