បច្ចុប្បន្នការអភិវឌ្ឍ និងចរន្តទិញលក់អចលនទ្រព្យនៅតំបន់ជ្រោយចង្វាហាក់មានភាពល្អប្រសើរឡើងវិញ បន្ទាប់ពីមានការធ្លាក់ចុះមួយរយៈដោយសារវិបត្តិកូវីដ-១៩។ ក៏តម្លៃអចលនទ្រព្យនៅតំបន់នោះមិនមានការប្រែប្រួលគួរឲ្យកត់សម្គាល់នោះទេ។ លោក ទូច សំណាង នាយកគ្រប់គ្រងទូទៅក្រុមហ៊ុន OCIC បានបញ្ជាក់ ខេមបូណូមីស ថា ទោះបីវិបត្តិកូវីដ-១៩ បានបង្កការរំខានធ្វើឲ្យមានការឆ្លងដល់បុគ្គលិក និងកម្មករនៅការដ្ឋានសាងសង់ក៏ដោយ តែវាមិនបានបន្ទច់បង្អាក់ការអភិវឌ្ឍគម្រោងទីក្រុងរណបជ្រោយចង្វានោះទេ។ ជាក់ស្តែងមកទល់បច្ចុប្បន្នគម្រោងដែលមានតម្លៃរាប់ពាន់លានដុល្លារមួយនេះ សម្រេចបានការសាងសង់លើអគារពាណិជ្ជកម្ម អគារលំនៅឋាន និងហេដ្ឋាចរនាសម្ព័ន្ធនានាបានជាង៨០% ហើយ។ នៅពេលសួរថា តើគម្រោងនេះនឹងបញ្ចប់ការសាងសង់នៅពេលណា? លោក ទូច សំណាង ឆ្លើយយ៉ាងខ្លីថា បើនិយាយពីការអភិវឌ្ឍ គឺមិនងាយចប់នោះទេ។
អត្ថបទគួរអាន
លោក ទូច សំណាង សង្កេតឃើញថា ក្នុងពេលពីរឆ្នាំកន្លងមកនេះ ពោលគឺបន្ទាប់ពីពិភពលោករួមទាំងកម្ពុជាទទួលរងការឆ្លងរាតត្បាតនៃជំងឺកូវីដ-១៩ ចរន្តទិញលក់ក្នុងវិស័យអចលនទ្រព្យមានការថមថយចុះគួរឲ្យកត់សម្គាល់។ លោកទូច សំណាងកត់សម្គាល់ឃើញថា ការធ្លាក់ចុះនេះ គឺបន្ទាប់ពីចំនួនជនបរទេស ដែលជាទីផ្សារធំសម្រាប់វិស័យខុនដូកម្ពុជាមានការថយចុះ ក្រោយប្រទេសមួយចំនួនបានរឹតបន្តឹងវិធានការកូវីដ-១៩ ដែលធ្វើឲ្យពួកគេមានការលំបាកក្នុងការធ្វើដំណើរមកកម្ពុជា។ ចំណែកវិស័យផ្ទះល្វែង និងអគារលំនៅឋានផ្ទាល់ដីមិនសូវរងផលប៉ះពាល់នោះទេ។
គួរបញ្ជាក់ថា គម្រោងទីក្រុងរណបជ្រោយចង្វា ដែលអភិវឌ្ឍឡើងដោយក្រុមហ៊ុន OCIC របស់អ្នកឧកញ៉ា ពង់ ឃាវសែ បាននិងកំពុងសាងសង់ឡើងលើផ្ទៃដីជាង២០០ហិកតា លាតសន្ធឹងចាប់ពីគល់ស្ពានជ្រោយចង្វារតាមបណ្ដោយផ្លូវជាតិលេខ៦អា។ គម្រោងនេះ បានបើកការដ្ឋានសាងសង់កាលពីអំឡុងឆ្នាំ២០១២នេះ និងមានទុនវិនិយោគជាង២ពាន់លានដុល្លារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
