ក្រុមអង្គការបាននិយាយថា សេចក្តីព្រាងច្បាប់នេះមានបទប្បញ្ញត្តិជាច្រើន ដែលមានវិសាលភាពទូលំទូលាយក្នុងការកំណត់បទល្មើសចំពោះសកម្មភាពស្របច្បាប់ប្រចាំថ្ងៃជាច្រើន ហើយដែលនឹងរំលោភលើសិទ្ធិសេរីភាពខាងការបញ្ចេញមតិ ខាងសមាគម ខាងការជួបប្រជុំនិងសិទ្ធិមនុស្សផ្សេងៗទៀត។
ក្រុមអង្គការបាននិយាយក្នុងសេចក្តីថ្លែងការណ៍ដូច្នេះថា៖ «ប្រសិនបើសេចក្តីព្រាងច្បាប់នេះត្រូវបានអនុម័តច្បាប់នេះ នឹងក្លាយជាច្បាប់ដែលមានលក្ខណៈគាបសង្កត់មួយផ្សេងទៀតនៅក្នុងក្របខ័ណ្ឌច្បាប់ដែលប៉ះពាល់សិទ្ធិមនុស្សធ្ងន់ធ្ងរ។»
សេចក្តីថ្លែងការណ៍បានបន្តថា៖ «យើងខ្ញុំសូមគូសបញ្ជាក់នូវក្តីបារម្ភចម្បងៗដូចខាងក្រោម។ ទោះជាយ៉ាងនេះក្តី ការទម្លាក់ចោលទាំងស្រុងនូវសេចក្តីព្រាងច្បាប់ដែលពុំចាំបាច់នេះ គឺជាការប្រសើរ។»
អត្ថបទទាក់ទង
ការបារម្ភទាំងនោះ រួមមាន មាត្រាដែលហាមឃាត់ការតាំង ឬការលក់ដូរទំនិញបំពានលើទីសាធារណៈគ្មានសណ្តាប់ធ្នាប់ និងការសុំទានតាមគ្រប់រូបភាព។
ការបារម្ភផ្សេងទៀតគឺមាត្រាដែលហាមឃាត់ការប្រើពាក្យសម្តីឮខ្លាំងៗ និងកំណត់រាល់សំឡេងបង្កឱ្យឮខ្លាំងរំខានដល់អ្នកដទៃត្រូវបញ្ឈប់ចាប់ពីម៉ោង១២ ថ្ងៃត្រង់ ដល់ម៉ោង១៤ រសៀល និងចាប់ពី ម៉ោង២២ យប់ ដល់ម៉ោង ៥ព្រឹក លើកលែងតែមានការអនុញ្ញាតពីអាជ្ញាធរមានសមត្ថកិច្ច។
ក្រុមអង្គការបានអះអាងបន្តថា មាត្រាផ្សេងទៀតដែលហាមឃាត់បុរសស្លៀកតែខោអត់ពាក់អាវ ឬស្លៀកតែខោទ្រនាប់បង្ហាញផ្នែកខ្លះនៃកេរ្តិ៍ភេទ និងហាមឃាត់ស្ត្រីពីការស្លៀកពាក់ខ្លីខើចលើខើចក្រោម ឬ ស្លៀកពាក់ស្តើងមើលឃើញកេរ្ដិ៍ភេទនោះ គឺ «ជាការបំពានលើសេរីភាពក្នុងការបញ្ចេញមតិ ប៉ះពាល់ដល់ស្វ័យភាពរបស់បុគ្គលនិងពុំបានពន្យល់ច្បាស់លាស់អំពីនិយមន័យនៃសេចក្តីថ្លៃថ្នូរ ដូច្នេះ ជាការទុកចន្លោះប្រហោងឱ្យមានការអនុវត្តពុំស្មើភាពគ្នា។»
ពួកគេបានបន្តថា៖ «ស្ត្រីនៅកម្ពុជាប្រឈមនឹងការគំរាមកំហែងនិងការដាក់ពន្ធនាគារដោយសារជម្រើសក្នុងការស្លៀកពាក់របស់ខ្លួន ដោយមានស្ត្រីម្នាក់ធ្លាប់ត្រូវបានផ្តន្ទាទោសទាក់ទងនឹងការស្លៀកពាក់របស់នាងរួចហើយក្នុងឆ្នាំ២០២០។»
បុគ្គលល្មើសនឹងសេចក្តីព្រាងច្បាប់នេះអាចប្រឈមនឹងទោសដាក់ពន្ធនាគាររយៈពេល១ថ្ងៃ ដល់ ៦ថ្ងៃ និងពិន័យជាប្រាក់ចន្លោះ ១០០.០០០ រៀល ដល់ ៥០០.០០០ រៀល។
លោក ឡុង ប៉ុណ្ណាស៊ីរីវត្ថ រដ្ឋលេខាធិការនិងជាអ្នកនាំពាក្យក្រសួងវប្បធម៌និងវិចិត្រសិល្បៈបាននិយាយនៅថ្ងៃព្រហស្បតិ៍ ទី១៣ ខែសីហា ឆ្នាំ២០២០នេះ ថា សេចក្តីព្រាងច្បាប់ដែលព្រាងដោយក្រសួងមហាផ្ទៃនេះមិនទាន់បានឆ្លងកាត់ដំណាក់កាលអន្តរក្រសួងនៅឡើយទេ ហើយប្រហែលជាត្រូវឆ្លងដៃគូនានា រួមមាន អង្គការសង្គមស៊ីវិលផងដែរ។
លោក ឡុង ប៉ុណ្ណាស៊ីរីវត្ថ បានថ្លែងការពារមាត្រានានាដែលនិយាយអំពីវប្បធម៌ប្រពៃណី ដោយបានលើកឡើងថា សូម្បីតែនៅអាមេរិកក៏មានច្បាប់ស្រដៀងគ្នានេះដែរ។
លោក ឡុង ប៉ុណ្ណាស៊ីរីវត្ថ បាននិយាយដូច្នេះថា៖ «អ្វីដែលវាមិនប៉ះពាល់ដល់ការបំផ្លាញកិត្យានុភាពជាតិ សេចក្តីថ្លៃថ្នូររបស់ស្រ្តីរបស់ប្រពៃណីទំនៀមទម្លាប់ យើងអត់ដែលថាអីផងប្អូន អាហ្នឹងយើងបើកសេរីភាពឲ្យគាត់ពេញលេញ។»
លោក ឡុង ប៉ុណ្ណាស៊ីរីវត្ថ បានបន្តថា៖ «នៅអាមេរិកក៏គេមានដូចគ្នាដែរប្អូន គេតឹងជាងយើងទៀត យើងដូចជានៅបត់ជើងតូចតាមរបងបាន គេតែហ៊ានអ៊ីចឹងទៀតទីមួយ ខូចបរិស្ថានផង ទីពីរអាហ្នឹងជាការបង្ហាញកេរ្តិ៍ដែលមិនល្អ ណាប្អូន»៕
