លោក ងន សាំង នាយកប្រតិបត្តិក្រុមហ៊ុន RMA Cambodia ដែលជាក្រុមហ៊ុនមេ នាំចូលរថយន្តម៉ាក Ford ផ្តាច់មុខមកកម្ពុជាបានបញ្ជាក់ប្រាប់ខេមបូណូមីសថា រោងចក្រផ្គុំ និងដំឡើងរថយន្តម៉ាក Ford នៅខេត្តពោធិ៍សាត់សម្រេចការសាងសង់ស្ទើរតែ១០០%ហើយ។ លោកបានគូសបញ្ជក់ថា បច្ចុប្បន្ន ក្រុមហ៊ុន RMA នៅរង់ចាំតែការសម្រេចលើឯកសារនាំចូលបំណែករថយន្តពីខាងរាជរដ្ឋាភិបាលកម្ពុជាតែប៉ុណ្ណោះ គឺអាចចាប់ផ្ដើមការងារផលិតកម្មរោងចក្រនេះបានហើយ។ សម្រាប់ការដាក់ឲ្យដំណើរការនៅឆ្នាំដំបូង លោក ងន សាំង រំពឹងថា រោងចក្រនេះនឹងអាចផលិតផ្គុំ និងដំឡើងរថយន្ត Ford បានប្រមាណជាង១ពាន់គ្រឿងនៅឆ្នាំនេះ។
ពាក់ព័ន្ធតម្លៃរថយន្តវិញ លោក ងន សាំង អះអាងថា តម្លៃរថយន្ត Ford ដែលដំឡើងនៅកម្ពុជាអាចនឹងលក់ចេញក្នុងតម្លៃទាបជាងរថយន្តដែលនាំចូល ក្នុងករណីមានការជួយសម្រួល និងបន្ធូរបន្ថយពន្ធនាំចូលគ្រឿងបង្គុំពីរាជរដ្ឋាភិបាលកម្ពុជា។ ប៉ុន្តែរថយន្តដែលដំឡើងនៅកម្ពុជា ក៏អាចមានតម្លៃខ្ពស់ជាងរថយន្តនាំចូលដែរ ប្រសិនបើគ្មានជួយសម្រួលពីរាជរដ្ឋាភិបាលលើបញ្ហាពន្ធ។ ខ្ពស់ជាង ក៏ដោយសាររថយន្តដំឡើងក្នុងស្រុកត្រូវចំណាយច្រើនលើតម្លៃពលកម្មរបស់បុគ្គលិក កម្មករ និងថ្លៃភ្លើងជាដើម។
អត្ថបទគួរអាន
ជុំវិញការសាងសង់រោងចក្រផ្គុំ និងដំឡើងរថយន្ត Ford នៅខេត្តពោធិ៍សាត់នេះដែរ នាជំនួបជាមួយឯកឧត្តម Michael Michlalk អនុប្រធានជាន់ខ្ពស់នៃនាយកគ្រប់គ្រងប្រចាំតំបន់ នៃក្រុមប្រឹក្សាធុរកិច្ចអាមេរិក-អាស៊ាន សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជាបានវាយតម្លៃខ្ពស់ និងសំដែងការស្វាគមន៍ចំពោះក្រុមហ៊ុនអាមេរិក ដែលបានដំឡើងរោងចក្រផ្គុំ និងដំឡើងរថយន្ត Ford នៅកម្ពុជា។ បន្ថែមលើនេះ សម្តេចតេជោ លើកទឹកចិត្តឲ្យក្រុមហ៊ុនបន្តវិនិយោគ និងស្វែងរកវិស័យសក្តានុពលនានាសម្រាប់វិនិយោគនៅកម្ពុជាបន្ថែមទៀត។
ក្រៅពីរោងចក្រផ្គុំ និងដំឡើងរថយន្ត Ford នៅខេត្តពោធិ៍សាត់ ប្រតិភូនៃក្រុមប្រឹក្សាធុរកិច្ចសហរដ្ឋអាមេរិក-អាស៊ាន ដែលនាំដោយឯកឧត្តម Michael ក៏បានពិភាក្សាលើវិស័យថាមពល សុខាភិបាល និងការជំរុញសេដ្ឋកិច្ចឌីជីថលផងដែរ។ ពាក់ព័ន្ធវិស័យថាមពល សម្តេចតេជោ ហ៊ុន សែន បានគូសបញ្ជាក់ថា កម្ពុជាកំពុងប្រើប្រាស់អគ្គិសនីផលិតដោយវារីអគ្គិសនីសរុបទាំងអស់មាន ៦៤% សូឡាមានជាង៤% និងជីវឧស្ម័នចំនួន ០,២៨%។
គួរបញ្ជាក់ថា រោងចក្រដំឡើងរថយន្ត Ford នេះ សាងសង់លើផ្ទៃដី៤ហិកតា ស្ថិតនៅភូមិសាវ័ន ឃុំស្នាអន្យា ស្រុកក្រគរ ខេត្តពោធិ៍សាត់។ រោងចក្រនេះអាចស្រូបទាញកម្លាំងពលកម្មបានប្រមាណ៥០០នាក់ និងមានសមត្ថភាពអាចផលិតរថយន្តបានប្រមាណ១ម៉ឺនគ្រឿងក្នុងមួយឆ្នាំ៕
None
