ប្រេសិតពិសេសរបស់ប្រធានអាស៊ានឯកឧត្តម ប្រាក់ សុខុន នឹងដឹកនាំកិច្ចប្រជុំពិគ្រោះយោបល់ស្តីពីជំនួយមនុស្សធម៌របស់អាស៊ានសម្រាប់មីយ៉ាន់ម៉ា

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា និងជាប្រេសិតពិសេសរបស់ប្រធានអាស៊ានសម្រាប់មីយ៉ាន់ម៉ា និងឯកឧត្តម លឹម ចុក ហ៊ុយ អគ្គលេខាធិការអាស៊ាន ក្នុងឋានៈជាអ្នកសម្របសម្រួលជំនួយមនុស្សធម៌របស់អាស៊ាន នឹងធ្វើជាសហប្រធានដឹកនាំកិច្ចប្រជុំពិគ្រោះយោបល់ ស្តីពីជំនួយមនុស្សធម៌របស់អាស៊ានសម្រាប់មីយ៉ាន់ម៉ា នៅថ្ងៃទី ០៦ ខែឧសភា ឆ្នាំ២០២២ នៅរាជធានីភ្នំពេញ និងតាមប្រព័ន្ធវីដេអូ។ នេះបើតាមសេចក្ដីប្រកាសព័ត៌មានមួយពីក្រសួងការបរទេសកម្ពុជា។

ឯកឧត្តម ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិនៃកម្ពុជា រូបភាព៖ គណនីហ្វេសប៊ុក ឯកឧត្តម ប្រាក់ សុខុន

កិច្ចប្រជុំពិគ្រោះយោបល់ នឹងត្រូវបានអញ្ជើញចូលរួមដោយផ្ទាល់ និងតាមប្រព័ន្ធវីដេអូ ដោយតំណាងជាន់ខ្ពស់មកពីប្រទេសជាសមាជិកអាស៊ានទាំងអស់ ដៃគូខាងក្រៅរបស់អាស៊ាន ទីភ្នាក់ងារជំនាញអង្គការសហប្រជាជាតិ និងបណ្តាអង្គការអន្តរជាតិពាក់ព័ន្ធនៅក្នុងប្រទេសមីយ៉ាន់ម៉ាផងដែរ។

ទន្ទឹមនេះ កិច្ចប្រជុំពិគ្រោះយោបល់ នឹងផ្តល់ជាវេទិកាកម្រិតខ្ពស់មួយសម្រាប់អាស៊ានធ្វើការពិភាក្សាផ្តួចផ្តើមឱ្យមានកិច្ចសន្ទនាមួយ ដែលមានការចូលរួមពីភាគីពាក់ព័ន្ធ ដើម្បីផ្តល់នូវមគ្គុទ្ទេសក៍អំពីរបៀបក្នុងការជំរុញជំនួយមនុស្សធម៌របស់អាស៊ាន ឱ្យទៅដល់ប្រជាជនមីយ៉ាន់ម៉ា ដែលកំពុងត្រូវការបំផុតដោយឈរលើគោលការណ៍មនុស្សធម៌ និងគ្មានការរើសអើង។

សូមជម្រាបថា គោលបំណងនៃកិច្ចប្រជុំពិគ្រោះយោបល់នេះ រៀបចំឡើងដើម្បីពិភាក្សាស្វែងរកដំណោះស្រាយដែលមានការព្រមព្រៀងគ្នាទៅវិញទៅមកលើវិធីសាស្ត្រក្នុងការពង្រឹងបន្ថែមនូវការផ្តល់ជំនួយមនុស្សធម៌នៅមីយ៉ាន់ម៉ា ដើម្បីធានាបានថា នឹងពុំមាននរណាម្នាក់ត្រូវបានទុកចោលនោះទេ។ បន្ថែមពីនេះ កិច្ចប្រជុំនេះ ក៏នឹងពិភាក្សាអំពី ដំណោះស្រាយចំពោះបញ្ហាប្រឈមនានា ដែលពាក់ព័ន្ធទៅនឹងប្រតិបត្តិការរបស់មជ្ឈមណ្ឌលសម្របសម្រួលអាស៊ានសម្រាប់ជំនួយមនុស្សធម៌ ស្តីពីការគ្រប់គ្រងគ្រោះមហន្តរាយ (AHA Centre) និងវិធីសាស្ត្រនានាដែលជួយគាំទ្រទៅដល់ការផ្តល់វ៉ាក់សាំងបង្ការជំងឺកូវីដ-១៩ ទៅដល់សហគមន៍នានានៅមីយ៉ាន់ម៉ាផងដែរ។

សូមបញ្ជាក់ថា កាលពីថ្ងៃទី ០២ ឧសភា សម្តេចតេជោ ហ៊ុន សែននាយករដ្ឋមន្ត្រីនៃកម្ពុជា ក៏បានជួបសន្ទនាតាមប្រព័ន្ធវីដេអូជាមួយនឹងលោក មីង អោងឡាំង ប្រធានក្រុមប្រឹក្សារដ្ឋបាលរដ្ឋ នៃសាធារណរដ្ឋសហភាពមីយ៉ាន់ម៉ាផងដែរ ដើម្បីផ្លាស់ប្ដូរទស្សនៈ លើមាគ៌ាឆ្ពោះទៅរកការពន្លឿន ការអនុវត្តការព្រមព្រៀងជាឯកច្ឆន្ទ៥ចំណុចរបស់អាស៊ាន។ សម្តេចតេជោ ហ៊ុន សែន ក៏បានស្នើទៅកាន់ភាគីមីយ៉ាន់ម៉ា ឲ្យជួយសម្របសម្រួលដល់ដំណើរទស្សនកិច្ចលើកទី២ របស់ប្រេសិតពិសេសអាស៊ាន នៅមីយ៉ាន់ម៉ា ដែលអាចធ្វើឡើងនៅចុងខែឧសភាខាងមុខនេះ។ ជាមួយគ្នានោះ សម្តេចតេជោ ក៏បានស្នើមីយ៉ាន់ម៉ា អនុញ្ញាតឲ្យប្រេសិតពិសេសអាស៊ាន បានចូលជួបជាមួយនឹងភាគីពាក់ព័ន្ធទាំងអស់នៅមីយ៉ាន់ម៉ា ដែលក្នុងនោះ រួមទាំងលោកស្រី អ៊ុងសានស៊ូជី និងអតីតប្រធានាធិបតី លោក វិន ម្ញីនផងដែរ។ ប៉ុន្ដែ លោក មីង អោងឡាំងមិនបានឆ្លើយតបយល់ព្រមនៅឡើយទេ ដោយសន្យាថា នឹងពិនិត្យលទ្ធភាពលើសំណើនេះ៕

អត្ថបទ សោម ស្រីពេជ្រ