លោក ព្យែរ អូលីវីយេ ហ្គោរីនសា (Pierre-Olivier Gourinchas) ទីប្រឹក្សាសេដ្ឋកិច្ចរបស់មូលនិធិរូបិយវត្ថុអន្តរជាតិ (IMF) បានប្រាប់អ្នកសារព័ត៌មានថា ហានិភ័យ នៃការធ្លាក់ចូលក្នុងវិបត្តិរបស់សេដ្ឋកិច្ចសកល គឺមានក្នុងកម្រិតតិចតួចណាស់។ ប៉ុន្តែអ្នកជំនាញរូបនេះអះអាងថា ការគំរាមកំហែងដល់កំណើនសេដ្ឋកិច្ចសកលនៅតែបន្តកើតមានប្រសិនបើមានការកើនឡើងភាពតានតឹងនៅតំបន់មជ្ឈិមបូព៌ា។ យ៉ាងណាក៏ដោយការព្យាកររបស់អ្នកជំនាញសេដ្ឋកិច្ចរូបនេះបានធ្វើឡើងមុនពេលមិនទាន់មានការផ្ទុះការវាយបកសងសឹករបស់អ៊ីស្រាអែលទៅលើអ៊ីរ៉ង់ ដែលបានប្រើដ្រូន និងមីស៊ីលវាយប្រហារទៅលើមូលដ្ឋានទ័ពរបស់អ៊ីស្រាអែល។
យ៉ាងណាក៏ដោយអ្នកជំនាញរូបនេះកត់សម្គាល់ឃើញថា ពិភពលោកកំពុងទទួលបានដំណឹងល្អ ដោយសារតែសកម្មភាពសេដ្ឋកិច្ចរបស់សហរដ្ឋអាម៉េរិក និងសេដ្ឋកិច្ចនៅទីផ្សារសំខាន់ៗនានាកំពុងរីកចម្រើន ស្របពេលដែលអត្រាអតិផរណាបានធ្លាក់ចុះលឿនជាងការរំពឹងទុករហូតមកដល់ពេលថ្មីៗនេះ បើទោះបីជាអឺរ៉ុបប្រឈមនឹងការបន្តទទួលបានកំណើនទាបយ៉ាងណាក៏ដោយ។
អត្តបទគួរអាន
មូលនិធិរូបិយវត្ថុអន្តរជាតិ ដែលមានមូលដ្ឋាននៅទីក្រុងវ៉ាស៊ីនតោន នៅសប្តាហ៍នេះបានព្យាករថា នៅក្នុងឆ្នាំ២០២៤ និងឆ្នាំ២០២៥ ខាងមុខ ពិភពលោកនឹងទទួលបានកំណើនសេដ្ឋកិច្ចក្នុងរង្វង់៣,២%ដូចគ្នា។
ការព្យាកររបស់មូលនិធិរូបិយវត្ថុអន្តរជាតិនេះ គឺបានបូកបញ្ចូលនូវហានិភ័យផ្សេងៗរាប់ចាប់តាំងពីកត្តាអស្ថិរភាពភូមិសាស្ត្រនយោបាយ ជាមួយនឹងភាពតានតឹងនៅមជ្ឈិមបូព៌ា ផលរំខាននៅសមុទ្រក្រហម ការអូសបន្លាយនៃសង្គ្រាមរុស្ស៊ី-អ៊ុយក្រែន ដែលកំពុងបន្ត។ ប៉ុន្តែការព្យាករនេះនៅមិនទាន់រាប់បញ្ចូលព្រឹត្តិការណ៍ចុងក្រោយ ពោលគឺការបើកការវាយប្រហារសងសឹលរបស់អ៊ីស្រាអែលលើអ៊ីរ៉ង់ ដែលបានវាយប្រហារមូលដ្ឋានទ័ពរបស់ខ្លួនកាលពីចុងសប្តាហ៍មុននោះទេ។
លោកស្រី ជីតា ហ្គូភីណាត (Gita Gopinath) នាយករងមូលនិធិរូបិយវត្ថុអន្តរជាតិ បាននិយាយកាលពីថ្ងៃអង្គារ៍ថា ហានិភ័យភូមិសាស្ត្រនយោបាយ គឺជាការព្រួយបារម្ភដ៏ធំ ដ្បិតវាអាចបង្កផលប៉ះពាល់ដល់តម្លៃប្រេងក្នុងតម្លៃដ៏មហិមា ប្រសិនបើជម្លោះរីកប៉ោងកាន់តែធំឡើងៗ៕
ដោយៈ សរ សុជាតិ
None
