សេចក្ដីប្រកាសនេះ បានធ្វើឡើងខណៈដែលនាយកដ្ឋានប្រយុទ្ធនឹងជំងឺឆ្លង បានសង្កត់ធ្ងន់ថា ជំងឺរាតត្បាត អាចនឹងមិនងាយគ្រប់គ្រងបាននៅក្នុងអនាគតដ៏ខ្លីខាងមុខនោះទេ ដ្បិតថា ប្រទេសជាច្រើនកំពុងមានរដូវរងារចូលមកដល់ ហើយមានប្រទេសខ្លះទៀត បានបរាជ័យក្នុងការការពារការផ្ទុះឡើងនៃមេរោគកូវីដ-១៩នេះ។
លោកវេជ្ជបណ្ឌិត Rattanaxay Phetsouvanh អគ្គនាយកនៃនាយកដ្ឋានប្រយុទ្ធនឹងជំងឺឆ្លង បានចេញសេចក្ដីថ្លែងការណ៍ថា ទាក់ទងនឹងការរាតត្បាតដែលកំពុងបន្ដ និងស្ថានភាពទាក់ទងនឹងការផ្ដល់វ៉ាក់សាំង។
លោក Rattanaxay និយាយថា «ក្នុងឆ្នាំ២០២១ ប្រទេសឡាវ នឹងអាចទទួលបាន និងចែកចាយវ៉ាក់សាំងប្រឆាំងកូវីដ-១៩ ដែលវាគឺជាដំណឹងដ៏ល្អមួយ»។
អត្ថបទទាក់ទង!
លោកបន្ថែមថា មានប្រភេទវ៉ាក់សាំងកូវីដ-១៩ ប្រហែល ២០៩ ប្រភេទផ្សេងៗគ្នា កំពុងត្រូវបានបង្កើតឡើងនៅទូទាំងពិភពលោក។ ទោះយ៉ាងណា មានតែវ៉ាក់សាំងចំនួន១០ ប៉ុណ្ណោះ ដែលត្រូវបានទទួលស្គាល់ជាផ្លូវការ។
លោក គូសបញ្ជាក់យ៉ាងដូច្នេះថា «ទាក់ទងនឹងវ៉ាក់សាំងដែលនឹងត្រូវប្រើប្រាស់នៅក្នុងប្រទេសឡាវ វាគឺជាវ៉ាក់សាំងដែលត្រូវបានផលិតឡើងនៅក្នុងចក្រភពអង់គ្លេស ដែលបានបង្ហាញថា មានប្រសិទ្ធភាពខ្ពស់បំផុតក្នុងការប្រឆាំងនឹងមេរោគ គឺមានកម្រិតនៃការការពារដល់ទៅ ៩៥%ឯណោះ»។
មានអ្នកជំងឺកូវីដ-១៩ ត្រឹមតែ ៥នាក់ប៉ុណ្ណោះ កំពុងបន្ដព្យាបាលនៅក្នុងមន្ទីរពេទ្យនៃក្រុងវៀងច័ន្ទ។ ប្រទេសឡាវ មានអ្នកឆ្លងកូវីដ-១៩ សរុបត្រឹមតែ ៤១ ករណីប៉ុណ្ណោះ ហើយមិនមានអ្នកស្លាប់នោះទេ គិតមកទល់ថ្ងៃទី ១៧ ខែធ្នូ ឆ្នាំ២០២០៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
