បើតាមអ្នកជំនាញធនាគារ និង ហរិញ្ញវត្ថុបញ្ជាក់ថា សាជីវកម្មធានាប្រាក់កម្ចីរបស់រដ្ឋមួយនេះ គាំទ្រគ្រប់វិស័យ ដោយផ្ដោតជាសំខាន់លើវិស័យកសិកម្ម ឧស្សាហកម្ម និង សេវាកម្ម។
សាជីវកម្មធានាឥណទាន គឺជាស្ថាប័នរដ្ឋមួយ ដែលផ្តល់ការគាំទ្រដល់ស្ថាប័នហិរញ្ញវត្ថុចូលរួម ដើម្បីផ្តល់ហិរញ្ញប្បទានជូនដល់ក្រុមហ៊ុនអាជីវកម្ម ដែលមានលទ្ធភាពសង ប៉ុន្តែខ្វះទ្រព្យបញ្ចាំ ដោយផ្តល់ការធានា ដែលដើរតួនាទីជាទ្រព្យបញ្ចាំ ចន្លោះពី ៧០% ទៅ ៨០% នៃប្រាក់កម្ចីរបស់ក្រុមហ៊ុនទាំងនោះ។
យ៉ាងណាមិញ តាំងពីបានចាប់ផ្ដើមបើកដំណើរការតាំងពីចុងខែមីនា ឆ្នាំ ២០២១ មក កម្ចីដែលទទួលបានការធានាពីសាជីវកម្មធានាឥណទាននេះ ទើបតែមាន១៨ករណីប៉ុណ្ណោះ។
លោកបណ្ឌិត អុិន ចាន់នី ប្រធានសមាគមធនាគារកម្ពុជា និង ជាប្រធាននាយកប្រតិបត្តិធនាគារអេស៊ីលីដា បានបញ្ជាក់ប្រាប់ខេមបូណូមីស ថា ទោះបីក្នុងរយៈពេល៣ខែមានឥណទានតែចំនួន១៨ករណីទទួលបានការធានាក្រោមគម្រោងសាជីវកម្មធានាឥណទានរបស់រដ្ឋក៏ពិតមែន ប៉ុន្តែសម្រាប់លោក បណ្ឌិត អ៊ិន ចាន់នី យល់ឃើញថា បរិមាណប៉ុណ្ណឹង វាជាចំនួនមួយច្រើនគួរសមដែរហើយ នៅក្នុងជំហានចាប់ផ្ដើមដំបូងនេះ។
អត្ថបទទាក់ទង!
លោកបណ្ឌិត អុិន ចាន់នី បានគូសបញ្ជាក់បន្ថែមថា គម្រោងសាជីវកម្មនាធាឥណទាននេះ ផ្តល់ជូនសហគ្រាស និងអាជីវកម្មលើគ្រប់វិស័យ ដែលរងផលប៉ះដោយសារកូវីដ-១៩ ហើយជួបបញ្ហាខ្វះទ្រព្យបញ្ចាំក្នុងការទទួលឥណទាន។ លោកបណ្ឌិតសង្កត់ធ្ងន់ថា សហគ្រាស ក្រុមហ៊ុន និងអាជីវកម្មដែលអាចទទួលបាននូវសេវានេះ លុះត្រាតែសហគ្រាស ក្រុមហ៊ុន និងអាជីវកម្មទាំងនោះមានម្ចាស់ជាជនជាតិខ្មែរ ឬភាគហ៊ុនភាគច្រើនកាន់កាប់ដោយជនជាតិខ្មែរ។
សូមបញ្ជាក់ថា
សាជីវកម្មធានាឥណទាន បានដាក់ចេញគម្រោងធានាឥណទានដើម្បីស្តារអាជីវកម្ម
ដែលមានទំហំទឹកប្រាក់ ២០០ លានដុល្លារអាមេរិក នៅខែមីនាឆ្នាំ ២០២១
ដើម្បីគាំទ្រដល់អាជីវកម្មខ្នាតមីក្រូ សហគ្រាសខ្នាតតូចនិងមធ្យម និងសហគ្រាស ខ្នាតធំ
ដើម្បីបង្កើនលទ្ធភាពទទួលបានប្រាក់កម្ចីពីស្ថាប័នហិរញ្ញវត្ថុចូលរួម
សម្រាប់ទុនបង្វិល, ការវិនិយោគ
និងពង្រីកអាជីវកម្ម។ គម្រោងធានាឥណទានដើម្បីស្តារអាជីវកម្មនេះ
មានសុពលភាពរហូតដល់ចុងឆ្នាំ២០២២។
បច្ចុប្បន្ន ស្ថាប័នហិរញ្ញវត្ថុ ដែលបានចូលរួមជាមួយសាជីវកម្មធានាឥណទានកម្ពុជាសរុបមាន១៥ស្ថាប័នហើយ។ ការកើនឡើងនៃចំនួនស្ថាប័នហិរញ្ញវត្ថុចូលរួម នឹងធ្វើឱ្យការផ្តល់ហិរញ្ញប្បទានដែលមានការធានាកាន់តែមានភាពទូលំទូលាយ, ប្រកួតប្រជែង, ព្រមទាំងផ្តល់ជម្រើស និងលទ្ធភាពកាន់តែច្រើន ជូនដល់ក្រុមហ៊ុនអាជីវកម្ម ក្នុងការទទួលបានហិរញ្ញប្បទាន នៅទូទាំងប្រទេស ៕
None
