យោងតាមសេចក្ដីរាយការណ៍របស់សារព័ត៌មាន Vietnam Times, នៅថ្ងៃទី៣១ ខែឧសភា ឆ្នាំ២០២៣ ក្រសួងឧស្សាហកម្មនិងពាណិជ្ជកម្មវៀតណាមបានធ្វើ«សន្និសីទស្ដីពីការជំរុញពាណិជ្ជកម្មជាមួយប្រព័ន្ធការិយាល័យពាណិជ្ជកម្មវៀតណាមនៅបរទេសក្នុងខែឧសភា ឆ្នាំ២០២៣» ក្រោមប្រធានបទ«ការលើកកម្ពស់ពាណិជ្ជកម្មផ្លែគូលែននិងផ្លែមៀន»។
នៅក្នុងសន្និសីទនេះ លោក ដូ ង៉ុក ហុង (Do Ngoc Hung) ទីប្រឹក្សាពាណិជ្ជកម្មនៅការិយាល័យពាណិជ្ជកម្មវៀតណាមនៅអាមេរិក បាននិយាយថា ដោយមានប្រជាជនចំនួន ៣៣១ លាននាក់ សហរដ្ឋអាមេរិកគឺជាទីផ្សារដ៏សំខាន់សម្រាប់ផលិតផលកសិកម្មនិងអាហារ រួមទាំងផ្លែឈើនិងបន្លែស្រស់ផងដែរ។
កាលពីឆ្នាំ២០២២ សហរដ្ឋអាមេរិកបាននាំចូលបន្លែ និងផ្លែឈើ ក្នុងបរិមាណច្រើនរហូតដល់ជាង ៣១ ពាន់លានដុល្លារអាមេរិក។ នៅក្នុងនោះតម្លៃជាង ១៩ ពាន់លានដុល្លារគឺផ្លែឈើស្រស់និងផ្លែឈើក្លាស្សេដែលស្មើនឹងទម្ងន់ជាង ២៣ លានតោន។ តួលេខនេះបានកើនឡើង ១០% បើធៀបនឹងឆ្នាំ២០២១។ ភាគច្រើននៃផលិតផលនាំចូលគឺមកពីប្រទេសកាណាដា ម៉ិកស៊ិក និងប្រទេសមួយចំនួននៅអាមេរិកកណ្តាល និងអាមេរិកខាងត្បូង។
អត្ថបទគួរអាន
ផ្លែឈើស្រស់ៗមួយចំនួនដែលបាននាំចូលទៅកាន់ទីផ្សារសហរដ្ឋអាមេរិក រួមមានផ្លែបឺរ ចេក ទំពាំងបាយជូ និងក្រូចឆ្មា ហើយដើម្បីឆ្លើយតបនឹងតម្រូវការផ្លែគូលែនដែលចេះតែកើនឡើងនោះ សហរដ្ឋអាមេរិកបាននាំចូលផ្លែឈើនេះមកពីប្រទេសចិន វៀតណាម ឥណ្ឌា និងថៃ ខណៈដែលផ្លែគូលែននៅទីក្រុងបាក់យ៉ាង (Bac Giang) ប្រទេសវៀតណាម តែងតែទទួលបានការកោតសរសើរយ៉ាងខ្លាំងពីអ្នកប្រើប្រាស់នៅអាមេរិក ចំពោះគុណភាពរបស់ផ្លែឈើនេះ។
លោក ហុង បានវាយតម្លៃថា ពេលអនាគត ទីផ្សារអាមេរិកនៅតែមានកន្លែងច្រើនសម្រាប់ឱ្យផ្លែឈើវៀតណាមពង្រីកនិងអភិវឌ្ឍទីផ្សារអាមេរិកថែមទៀត ព្រោះអាមេរិកជាទីផ្សារប្រើប្រាស់ផ្លែឈើដ៏ធំដែលមានតម្រូវការចម្រុះ និងដែលផ្ដោតកាន់តែខ្លាំងលើបន្លែនិងអាហារសរីរាង្គ។
ទោះយ៉ាងណា លោក ហុង បាននិយាយថា វៀតណាមមានឧបសគ្គខ្លះៗ ក្នុងការប្រកួតប្រជែងជាមួយចិន និងម៉ិកស៊ិក ដែលមានបទពិសោធន៍យូរឆ្នាំមកហើយ។ ប្រទេសទាំងពីរនេះក៏មានប្រព័ន្ធចែកចាយទូលំទូលាយ តម្លៃប្រកួតប្រជែងខ្លាំង និងតម្លៃដឹកជញ្ជូនទាបដែរ។
ការចូលទៅកាន់ទីផ្សារអាមេរិកសម្រាប់ផលិតផលកសិកម្មវៀតណាមទូទៅ និងជាពិសេសផ្លែគូលែនតែម្ដង គឹនៅតែប្រឈមមុខនឹងឧបសគ្គមួយចំនួន។ ទីមួយគឺចម្ងាយភូមិសាស្ត្រឆ្ងាយពេកដែលប៉ះពាល់ដល់គុណភាពនិងទម្ងន់ផ្លែឈើ ហើយការចំណាយក៏ច្រើនជាងគូប្រែជែង។ ទីពីរគឺកង្វះកន្លែងត្រួតពិនិត្យស្តង់ដារអាមេរិកនៅភាគខាងជើងវៀតណាម គឺត្រូវដឹកនៅពិនិត្យនៅទីក្រុងហូជីមិញ ជាហេតុនាំឱ្យកើនចំណាយ ហើយថយបរិមាណនិងគុណភាពផ្លែគូលែន។ ទីបីគឺដំណើរការចាប់ពីការប្រមូលផល ការដឹកជញ្ជូន រហូតដល់អ្នកប្រើប្រាស់នៅអាមេរិក គឺនៅតែចំណាយពេលយូរព្រោះគេត្រូវរៀបចំវេចខ្ចប់ និងរក្សាទុកដាក់ឱ្យត្រូវតាមស្តង់ដារ ដើម្បីកុំឱ្យខូចគុណភាពផ្លែគូលែន ទំរាំដឹកទៅដល់ទីផ្សារទំនើបៗនៅអាមេរិក៕
