ធនាគារអេស៊ីលីដាបង្កើតសាខាទី ២៦៤ នៅផ្សារទំនើបអ៊ីអន៣ ដើម្បីបំពេញកំណើនតម្រូវការអតិថិជន
ដើម្បីបំពេញនូវតម្រូវការអតិថិជនដែលកំពុងមានការកើនឡើងខ្ពស់ផ្នែកសេវាហិរញ្ញវត្ថុ ធនាគារអេស៊ីលីដា ភីអិលស៊ី បានបើកសម្ពោធសាខាថ្មីរបស់ខ្លួនទី២…
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជា បានកត់សម្គាល់ឃើញថា កត្តាចម្បងៗ ដែលបង្ហាញថា ផ្សារមូលបត្រកម្ពុជានៅឆ្នាំ២០២២ មានភាពរីកចម្រើន គឺពឹងផ្អែកលើសម្ទុះនៃការចាប់អារម្មណ៍របស់សាធារណជន ការចាប់អារម្មណ៍របស់ក្រុមហ៊ុនក្នុងការចុះបញ្ជី និងទំហំជួញដូរប្រចាំថ្ងៃជាដើម។
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកផ្សារមូលបត្រកម្ពុជាបានបង្ហាញក្តីរំពឹងខ្ពស់ចំពោះភាពរីកចម្រើននៃវិស័យផ្សារមូលបត្រនៅកម្ពុជាថា នៅឆ្នាំ២០២៣ បើទោះបី ស្ថានភាពផ្សារមូលបត្រសាកលមានភាពមិនច្បាស់លាស់ ដោយសារឥទ្ធិពលនៃវិបត្តិសង្រ្គាមរុស្សី-អ៊ុយក្រែន តែវិស័យផ្សារមូលបត្រកម្ពុជានឹងនៅតែបង្ហាញពីភាពរឹងមាំ។ បើតាមឯកឧត្តម ហុង សុហូរ នៅឆ្នាំ២០២២នេះ ទំហំជួញដូរបានកើនឡើងយ៉ាងឆាប់រហ័ស បើធៀបនឹងឆ្នាំ២០២១ ខណៈរយៈពេល ៩ខែ ក្នុងឆ្នាំ២០២២ ទំហំជួញដូរប្រចាំថ្ងៃជាមធ្យមបានកើនដល់ប្រមាណ ៦០ម៉ឺនដុល្លារ ក្នុងមួយថ្ងៃ។ ជាមួយគ្នានេះ ឯកឧត្តម ហុង សុហួរ នៅតែមើលឃើញពីសន្ទុះនៃចំនួនអ្នកបើកគណនីជួញដូរថ្មីមានការកើនឡើងខ្លាំង ជាពិសេសក្នុងកម្មវិធីពិព័រណ៍ផ្សារភាគហ៊ុនកម្ពុជា និងពិព័រណ៍ការងារ ដែលធ្វើឲ្យផ្សារមូលបត្រកម្ពុជាទទួលបានអ្នកបើកគណនីជួយដូរភាគហ៊ុនជិត៣ពាន់នាក់ ដែលបង្ហាញពីភាពរីកចម្រើន និងការចាប់អារម្មណ៍របស់អ្នកវិនិយោគមកលើវិស័យជួញដូរភាគហ៊ុននៅកម្ពុជា។
បើទោះជាបែបនេះក្ដី ការអូសបន្លាយនូវវិបត្តិសង្រ្គាមរវាងរុស្សី និងអ៊ុយក្រែន នៅតែជិះឥទ្ធិពលខ្លះដែរ ដល់វិស័យផ្សារមូលបត្រសាកល រួមទាំងវិស័យផ្សារមូលបត្រនៅកម្ពុជាផងដែរ ដែលបានធ្វើឲ្យទំហំជួញដូរជាមធ្យមប្រចាំថ្ងៃនៅត្រីមាសចុងក្រោយនៃឆ្នាំ២០២២ មានការថយចុះបន្តិចវិញ។ បច្ចុប្បន្ន ការជួញដូរភាគហ៊ុនជាមធ្យមមានទំហំជាង ៥០ម៉ឺនដុល្លារក្នុង១ថ្ងៃ។
យ៉ាងណាក៏ដោយចុះ សម្រាប់វិស័យផ្សារមូលបត្រសាកលឆ្នាំ២០២៣ ឯកឧត្តម ហុង សុហួរ បានយល់ឃើញថា អាចនឹងបន្តរងឥទ្ធិពលខ្លះៗ ពីវិបត្តិសង្គ្រាមរវាងរុស្សី-អ៊ុយក្រែន ដូច្នេះ ចង់ឬមិនចង់វាក៏ប៉ះពាល់ខ្លះដែរដល់វិស័យផ្សារមូលបត្រទាំងមូល ដែលបណ្ដាលមកពីថ្លៃភាគហ៊ុនធ្លាក់ចុះ។ ក្នុងនោះ មូលបត្របំណុលវិញ កំពុងប្រឈមនឹងបញ្ហា អត្រាការប្រាក់កើនឡើងខ្លាំង ដោយសារធនាគារកណ្ដាលនៅអាមេរិក និងអឺរ៉ុប មានការដំឡើងអត្រាការប្រាក់ ហើយក៏ជំរុញឲ្យទាំងមូលបត្ររដ្ឋ និងឯកជនត្រូវដំឡើងការប្រាក់ដូចគ្នា។ ក៏ប៉ុន្តែ ជុំវិញស្ថានភាពផ្សារមូលបត្រកម្ពុជា នាឆ្នាំ២០២៣វិញ ឯកឧត្តម ហុង សុហួរ នៅតែបង្ហាញនូវសញ្ញាណវិជ្ជមាន ដោយសារសម្ទុះនៃការចាប់អារម្មណ៍កាន់តែខ្លាំងពីសាធារណជន។ លើសពីនេះ ឯកឧត្តមនៅតែរំពឹងខ្ពស់ថា ឆ្នាំ២០២៣នេះ ចំនួនអ្នកបើកគណនីជួញដូរថ្មីនឹងមានការកើនឡើងថែមទៀត ជាមួយនឹងទំហំជួញដូរភាគហ៊ុនក្នុងផ្សារមូលបត្រកម្ពុជានឹងអាចកើនដល់១លានដុល្លារក្នុង១ថ្ងៃ។
គួរជម្រាបថា បច្ចុប្បន្នផ្សារមូលបត្រកម្ពុជាទទួលបានក្រុមហ៊ុនចុះបញ្ជីចំនួន១៧ ក្នុងនោះក្រុមហ៊ុនចំនួន៨បានចុះបញ្ជីបោះផ្សាយលក់មូលបត្របំណុល ខណៈ៩ក្រុមហ៊ុនទៀតបោះផ្សាយលក់មូលបត្រកម្មសិទ្ធិ។ ដោយឡែក សម្រាប់ឆ្នាំ២០២២ ផ្សារមូលបត្រកម្ពុជា ទទួលបានក្រុមហ៊ុនចុះបញ្ជីថ្មីចំនួនតែពីរប៉ុណ្ណោះ៕
