ឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករ និងរដ្ឋាករកម្ពុជាបានថ្លែងនៅក្នុងកិច្ចប្រជុំបូកសរុបលទ្ធផលការងាររបស់អគ្គនាយកដ្ឋានគយនិងរដ្ឋាករ ប្រចាំត្រីមាសទី១ នៅឆ្នាំ២០២២ ថា ចំណូលតាមប្រភេទពន្ធនិងអាករ សំខាន់ៗ ដែលអគ្គនាយកដ្ឋានគយ និងរដ្ឋាករប្រមូលបានរួមមាន៖ អាករលើតម្លៃបន្ថែម មានប្រមាណ៣៩%, អាករពិសេស មានប្រមាណ ៣៧%, ពន្ធគយ មានប្រមាណ១៨%,អាករបន្ថែមលើ ផលិតផលប្រេង មានប្រមាណ ៤,២% និងអាករនាំចេញនិងកម្រៃ ផ្សេងៗ មានប្រមាណ ២,២% នៃចំណូលសរុប។
ដ្បិតថា ការប្រមូលចំណូលរបស់អគ្គនាយកដ្ឋានគយនិងរដ្ឋាករ នៅត្រីមាសទី១ ក្នុងឆ្នាំ២០២២នេះ មានការថយចុះបន្តិចបន្តួច ២,៥% ក៏ដោយចុះ តែការប្រមូលចំណូលអគ្គនាយកដ្ឋានគយនិងរដ្ឋាករ សម្រេចបាននូវវឌ្ឍនភាពល្អប្រសើរលើការងារសំខាន់ៗ មួយចំនួន ដែលមានចែងក្នុងផែនការសកម្មភាពប្រចាំឆ្នាំ២០២២។អត្ថបទគួរអាន
ដោយឡែក ការនាំចេញទំនិញរបស់កម្ពុជា ក្នុងវិស័យសំខាន់ៗ ដូចជា ផលិតផលកាត់ដេរ,ផលិតផលមិនមែនកាត់ដេរ និងការនាំចេញផលិតផលកសិកម្ម សុទ្ធតែមានការកើនឡើង គួរឲ្យកត់សម្គាល់។ ក្នុងនោះ ការនាំចេញផលិតផលកាត់ដេរ នៅត្រីមាសទី១ ឆ្នាំ២០២២ មានជាង ៣ពាន់លានដុល្លារ មានការកើនឡើងជាង២៤%, ការនាំចេញផលិតផលវិនិយោគមិនមែនកាត់ដេរ មានជាង ១ពាន់លានដុល្លារ បានកើនឡើងប្រមាណ៣៨%, ការនាំចេញកសិផលវិញ មានតម្លៃសរុប ជាង១ពាន់លានដុល្លារ ដែលមានការកើនឡើងជាង១០%។
ចំពោះចំណូលគយតាមក្រុមទំនិញវិញ សម្រាប់ផលិតផលយានយន្ដ និងគ្រឿងចក្រមានចំណែកប្រហែលជាង៤២% នៃចំណូលសរុប, ទំនិញចម្រុះមានជិត៣០%, ផលិតផលតេលសិលាមានជិត២៣% និងចំណូលពីសម្ភារសំណង់ និងកម្រៃផ្សេងៗមានប្រមាណ ៦% នៃចំណូលគយសរុប។
សូមបញ្ជាក់ថា នៅឆ្នាំ២០២១ អគ្គនាយកដ្ឋានគយនិងរដ្ឋាករកម្ពុជា ប្រមូលចំណូលបានជិត២ពាន់៣រយលានដុល្លារ ស្មើនឹងប្រមាណ ជាង ៩៧% នៃផែនការ៕
None
