ឥណ្ឌូនេស៊ី អះអាងថា រុស្ស៊ីនឹងផ្គត់ផ្គង់ប្រេងដល់ខ្លួនរហូតដល់១៥០លានបារ៉ែល

បេសកជនពិសេសទទួលបន្ទុកថាមពល និងបរិស្ថានឥណ្ឌូនេស៊ី លោកហាស៊ីម ឌីចូចូហាឌីគូស៊ូមូ (Hashim Djojohadikusumo) បានទម្លាយឱ្យដឹង កាលពីថ្ងៃទី២៣ ខែមេសា ថា ប្រធានាធិបតី ឥណ្ឌូនេស៊ី លោក ប្រាប៉ូវ៉ូស៊ូប៊ីអានតូ (Prabowo Subianto) បានជួបជាមួយប្រធានាធិបតីរុស្ស៊ីលោក វ៉្លាឌីមៀ ពូទីន នៅវិមានក្រឹមឡាំង កាលពីសប្តាហ៍មុន ដែលលោកទាំងពីរពិភាក្សាអំពីការពង្រឹងភាពជាដៃគូយុទ្ធសាស្ត្រ រួមទាំងក្នុងវិស័យថាមពលផងដែរ។

ដូចប្រទេសជាច្រើនដែរ ឥណ្ឌូណេស៊ី ដែលមានប្រជាជនសរុបជាង២៨៧លាននាក់បានទទួលរងសម្ពាធពីប្រេងឥន្ធនៈហក់ឡើងថ្លៃទូទាំងពិភពលោក ដោយសារតែសង្គ្រាមនៅមជ្ឈិមបូព៌ា ហើយបាន និងកំពុងព្យាយាមស្វែងរកអ្នកផ្គត់ផ្គង់ជំនួស។ ទិន្នន័យបង្ហាញថា ប្រមាណពី២០% ទៅ ២៥% នៃការនាំចូលប្រេងឆៅរបស់ឥណ្ឌូនេស៊ី បានមកពីតំបន់មជ្ឈិមបូព៌ា ហើយត្រូវដឹកឆ្លងកាត់ច្រកសមុទ្រ Hormuz ដែលអ៊ីរ៉ង់បិទ។

យោងតាមកិច្ចព្រមព្រៀងថ្មីនេះ រុស្ស៊ី បានយល់ព្រមផ្គត់ផ្គង់ប្រេងចំនួន១០០លានបារ៉ែលក្នុងតម្លៃពិសេស ហើយត្រៀមបន្ថែម៥០លានបារ៉ែលទៀត ប្រសិនបើមានតម្រូវការចាំបាច់។ លោករដ្ឋមន្ត្រីក្រសួងថាមពល បាហ៊ីល ឡាហាដាលៀ (Bahlil Lahadalia) បានបញ្ជាក់ថាឥណ្ឌូនេស៊ី ប្រើប្រាស់ប្រេងរហូតដល់១,៦លានបារ៉ែលក្នុងមួយថ្ងៃ ប៉ុន្តែផលិតបានត្រឹមតែ៦០០,០០០បារ៉ែលប៉ុណ្ណោះ ដែលធ្វើឱ្យប្រទេសនេះក្លាយជាអ្នកនាំចូលប្រេងសុទ្ធសាធ។

ដើម្បីទប់ទល់នឹងស្ថានភាពនេះ រដ្ឋាភិបាលឥណ្ឌូនេស៊ី បានដាក់ចេញវិធានការតឹងរ៉ឹង រួមមានការកំណត់បរិមាណប្រើប្រាស់ប្រេង និងការបង្គាប់ឱ្យមន្ត្រីរាជការធ្វើការពីផ្ទះ (Work from home) ១ ថ្ងៃក្នុងមួយសប្តាហ៍ដើម្បីសន្សំសំចៃ។ ទោះជាយ៉ាងណា តាមរយៈកិច្ចព្រមព្រៀងជាមួយរុស្ស៊ីនេះ ឥណ្ឌូនេស៊ី បានប្ដេជ្ញាយ៉ាងមុតមាំថា នឹងមិនដំឡើងថ្លៃប្រេងឥន្ធនៈឡើយ នៅក្នុងឆ្នាំ ២០២៦ នេះ ដើម្បីការពារស្ថិរភាពសេដ្ឋកិច្ច និងជីវភាពពលរដ្ឋ៕

ដោយ: តែម សុខុម