សម្ដេចតេជោ ហ៊ុនសែន
នាយករដ្ឋមន្ត្រីនៃកម្ពុជា បានថ្លែងនៅក្នុងពីធីបើកការដ្ឋានសាងសង់
និងលើកកម្រិតកម្ពស់ភាពផ្លូវជាតិលេខ ៤៨ ថា នៅក្នុងឆ្នាំ២០២១ កន្លងទៅនេះ
បើទោះបីជាកម្ពុជាស្ថិតនៅក្នុងបរិបទនៃជំងឺកូវីដ-១៩ ក៏ដោយ ប៉ុន្ដែ
អគ្គនាយកដ្ឋានពន្ធដារ ប្រមូលចំណូលបានជិត២ពាន់៨រយលានដុល្លារ កើនលើសផែនការ រហូតដល់ទៅ២៤%
ស្មើនឹងទឹកប្រាក់ចំនួនជាង ៥00លានដុល្លាអាមេរិក។
ដោយឡែក អគ្គនាយកដ្ឋានគយ និងរដ្ឋាករវិញប្រមូលបានប្រមាណ
ជិត២ពាន់៣រយលានដុល្លារ ស្មើនឹងប្រមាណ ជាង ៩៧% នៃផែនការ។
ទោះយ៉ាងណា បើតាមសម្តេចតេជោ ហ៊ុន សែន សរុបចំណូលដែលប្រមូលបានដោយស្ថាប័នជាតិប្រមូលចំណូលពន្ធទាំងពីរខាងលើនេះ គឺសម្រេចបានប្រមាណ ៥ពាន់លានដុល្លារអាមេរិក។
អត្ថបទគួរអាន
សម្ដេចតេជោ ហ៊ុន សែន បានគូសបញ្ជាក់ថា ដោយយោងតាមចំណូលដែលបានមកពីគយ និងពន្ធដារទាំងពីរនេះបានបង្ហាញថា សេដ្ឋកិច្ចកម្ពុជានៅមានលំនឹង និងមិនអាចឲ្យរាជរដ្ឋាភិបាលកម្ពុជាអាចដួលរលំបានទេ។ ទន្ទឹមនេះ សម្ដេចក៏បានប៉ាន់ប្រមាណថា ការងើបឡើងវិញនៃសេដ្ឋកិច្ចកម្ពុជានៅឆ្នាំ២០២១ដែលទើបបិទបញ្ចប់ទៅថ្មីៗនេះ សម្រេចបាននៅក្នុងរង្វង់ ៣% ខណៈការវាយតម្លៃចុងក្រោយនឹងធ្វើឡើងនៅខែមីនា ឆ្នាំ២០២២ ហើយការងើបឡើងនៃសេដ្ឋកិច្ចកម្ពុជានេះ គឺជំរុញដោយវិធានការបើកប្រទេសពេញលេញ ខណៈកម្ពុជាចាក់វ៉ាក់សាំងជូនប្រជាជនជិត ១០០ភាគរយហើយ។
សូមបញ្ជាក់ដែរថា កាលពីឆ្នាំ២០២០កន្លងទៅនេះ ចំណូលពន្ធដែលប្រមូលដោយគយ និងពន្ធដារ បូកបញ្ចូលគ្នាសម្រេចបានប្រមាណជិត ៥ពាន់៣រយលានដុល្លារអាមេរិក។ ក្នុងនោះ ចំណូលប្រមូលដោយពន្ធដារ មានជាង២ពាន់៨រយលានដុល្លារ កើនឡើងជិត៤% ធៀបនឹងឆ្នាំ២០១៩ ខណៈដែលចំណូលប្រមូលដោយគយវិញ មានជាង ២ពាន់៤រយលានដុល្លារ ថយចុះ២៤%៕
អត្ថបទ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
