ក្នុងមួយឆ្នាំៗ ការនាំចូលឱសថ ឬថ្នាំពេទ្យពីក្រៅប្រទេសច្រើនរាប់ម៉ឺនតោន បាននិងកំពុងសម្លាប់សហគ្រាសផលិតឱសថ នៅប្រទេសកម្ពុជាបណ្តើរៗហើយ។
ពីមុន សហគ្រាសផលិតឱសថនៅកម្ពុជាមានចំនួនជាង២០សហគ្រាស ប៉ុន្តែ បច្ចុប្បន្ននៅសល់តែ ១៣សហគ្រាសប៉ុណ្ណោះ ដែលកំពុងតែដំណើរការផលិតយ៉ាងត្រដាបត្រដួសជាមួយ នឹងការប្រកួតប្រជែងនឹងសហគ្រាសផលិតឱសថក្នុងស្រុកគ្នាឯង និងជួបប្រកួតប្រជែងជាមួយនឹងការនាំចូលឱសថ ថ្នាំពេទ្យពីក្រៅប្រទេសផង ជាពិសេសឱសថថ្នាំពេទ្យដែលនាំចូលដោយខុសច្បាប់គ្មានគុណភាព។
តំណាងសហគ្រាសផលិតឱសថនៅកម្ពុជា បានសម្តែងការព្រួយបារម្ភយ៉ាងខ្លាំងពីការនាំចូលឱសថ ឬថ្នាំពេទ្យ មកពីក្រៅប្រទេសរាប់រយតោនក្នុងមួយឆ្នាំមកចរាចរណ៍លក់នៅក្នុងទីផ្សារកម្ពុជាដ៏តូចចង្អៀតមួយនេះ។
ឱសថបណ្ឌិត ហៃ លីអ៊ាង ប្រធានអគ្គនាយកសហគ្រាសផលិតឱសថ ប៉េប៉េអឹម (PPM)។
បញ្ហានេះកំពុងតែបង្កការលំបាកដល់សហគ្រាសផលិតឱសថក្នុងស្រុក ហើយក៏បានសម្លាប់សហគ្រាសផលិតឱសថក្នុងស្រុកបន្តិចម្តងៗ ឲ្យឈានទៅរកការក្ស័យធន នៅថ្ងៃណាមួយក្នុងពេលដ៏ខ្លីខាងមុខនេះ ប្រសិនបើរដ្ឋាភិបាលមិនមានវិធានការណាមួយសមស្របទប់ស្កាត់ ដើម្បីដោះសា្រយបញ្ហាទាំងអស់នេះទេ។
លោកឧកញ៉ា ឱសថបណ្ឌិត ហៃ លីអ៊ាង ប្រធានអគ្គនាយកសហគ្រាសផលិតឱសថ ប៉េប៉េអឹម ដែលជាសហគ្រាសផលិតឱសថនៅកម្ពុជាសម្រាប់ផលិតផ្គត់ផ្គង់ទីផ្សារក្រៅស្រុកដ៏ធំជាងគេមួយ បានអះអាងថា ការនាំចូលឱសថពីបរទេសមកកម្ពុជា សព្វថ្ងៃនេះ វាលើសពីតម្រូវការជាក់ស្តែងទៅហើយ ទាមទារឲ្យអាជ្ញាធរមានសមត្ថកិច្ចទប់ស្កាត់ជាបន្ទាន់។ ហើយបញ្ហានេះដែរ កំពុងតែបង្កលក្ខណៈដ៏ស្មុគស្មាញដល់អ្នកផលិតឱសថក្នុងស្រុក ដែលធ្វើឲ្យសហគ្រាសផលិតឱសថមួយចំនួនបិទទ្វារបណ្តើរហើយ។
ក្នុងមួយឆ្នាំៗ កម្ពុជាបានចំណាយទឹកប្រាក់ជាផ្លូវការប្រមាណជាង ១០០លានដុល្លារអាមេរិកសម្រាប់ការនាំចូលឱសថ ថ្នាំពេទ្យមកលក់នៅលើទីផ្សារកម្ពុជា។ ចំនួននេះវាអាចលើសពី១០០លាន ទៅ ២៥០លានដុល្លារអាមេរិកក្នុងការនាំចូលឱសថមកកម្ពុជា។
បើយោងតាមរបាយការណ៍ពីអគ្គនាយកដ្ឋានកាំកុងត្រូល នៃក្រសួងពាណិជ្ជកម្មបានឲ្យដឹងថា កាលពីឆ្នាំ២០១៥ កម្ពុជាបាននាំចូលឱសថថ្នាំពេទ្យ និងបរិក្ខារពេទ្យចំនួនជាង ៣ម៉ឺន ៥ពាន់តោន គិតជាទឹកប្រាក់មានចំនួន ជាង១១០លានដុល្លារ ធៀបនឹងឆ្នាំ២០១៤ មានបរិមាណនាំចូលថ្នាំពេទ្យមកកម្ពុជាជាង ១ម៉ឺ ៨ពាន់តោនប៉ុណ្ណោះ៕
None
