សហគ្រាសឱសថ PPM ផ្តល់ពានដល់និស្សិតសាកលវិទ្យាល័យវិទ្យាសាស្រ្តសុខាភិបាល

ក្នុងពិធីប្រគល់ពាននោះ កញ្ញា គឹម ដានី តំណាងក្រុមនិស្សិត៥នាក់ ដែលបានជាប់លេខ១ និងបានទទួលពាន និង ប្រាក់លើកទឹកចិត្ត១ពាន់ដុល្លារសហរដ្ឋអាមេរិក បានឲ្យដឹងថា ក្រុមរបស់ខ្លួនបានស្រាវជ្រាវរុក្ខជាតិសម្រាប់ព្យាបាលឈឺសន្លាក់ឆ្អឹង តាមរយៈការស្ទង់មតិ សៀវភៅ និងប្រភពជាច្រើនទៀត។  

កញ្ញាបញ្ជាក់យ៉ាងដូច្នេះ៖ «រុក្ខជាតិមានសក្តានុពលក្នុងការព្យាបាលសន្លាក់ឆ្អឹងមាន២៨រុក្ខជាតិ ប៉ុន្តែ រុក្ខជាតិ៤ប្រភេទដែលមានសក្តានុពលសំខាន់គឺ ក្តាំងបាយ មន ខ្ញី និងស្មៅអណ្តាតគោ។ តាមពិតទៅ ការសិក្សាហ្នឹង គ្រាន់តែជាការអង្កេត និងបានចុះប្រមូលទិន្នន័យពីចំណេះដឹងពលរដ្ឋនៅខេត្តកំពត ដែលធ្លាប់ប្រើប្រាស់រុក្ខជាតិថា តើរុក្ខជាតិឱសថណាខ្លះ ដែលមានអាទិភាពក្នុងការព្យាបាល ដើម្បីកំណត់ជាឯកសារមួយ ទុកស្រាវជ្រាវបន្តទៀត។ នេះជាការសិក្សាបឋម មិនមែនចូលមន្ទីរសោធន៍លម្អិតអ្វីឡើយ ព្រោះកម្រិតពួកខ្ញុំមានតែត្រឹមហ្នឹង លទ្ធផលនេះ អាចមានប្រយោជន៍ស្រាវជ្រាវទៅថ្ងៃក្រោយ»។

 បើតាមកញ្ញា គឹម ដានី ពានរង្វាន់នេះ គឺជាការលើកទឹកចិត្តមួយក្នុងការស្រាវជ្រាវ និងឆ្លុះបញ្ចាំងពីការយកចិត្តទុក របស់វិស័យឯកជនមកលើការបណ្តុះបណ្តាលនិស្សិតនៅកម្ពុជា។

ក្នុងសាលប្រជុំនៅវិទ្យាស្ថានភាសាបារាំងក្នុងរាជធានីភ្នំពេញ មាននិស្សិតជាច្រើនក្រុមមកពីសាកលវិទ្យាអន្តរជាតិ(IU) និង សាកលវិទ្យាល័យ​វិទ្យាសាស្រ្តសុខាភិបាលដែលជាបេក្ខភាពប្រកួត បានទះដៃអបអរសាទរជ័យលាភីលេខ១ ដែលទទួលបានពាន និងទឹកប្រាក់៤លានរៀល លេខ២ទទួលបានពាន និងទឹកប្រាក់២លានរៀល និងលេខ៣ ទទួលបានពាន និងទឹកប្រាក់១លាន២សែនរៀល។

តាមពិតទៅ ការប្រកួតប្រជែងការស្រាវជ្រាវក្នុងវិស័យឱសថសាស្រ្តរបស់មូលនិធិ Kinal ដែលផ្តួចផ្តើមឡើងដោយសហគ្រានផលិតឱសថ បេ បេ អឹម មិនមែនជាលើកទីមួយនោះទេ តែមូលនិធិរបស់វិស័យឯកជនមួយនេះ បានបង្កើតឡើងតាំងពីឆ្នាំ២០១៣មកម៉្លេះ។

ឧកញ៉ាឱសថវេជ្ជបណ្ឌិត ហៃ លីអ៊ាង ប្រធានសហគ្រាសផលិតឱសថ បេ បេ អឹម និងជាប្រធានមូលនិធិ Kinal បានថ្លែងថា សហគ្រាសផលិត​ឱសថ បេ បេ អឹម យកចំណូលក្រុមហ៊ុន៥ភាគរយ ដើម្បីចំណាយលើការជួយវិស័យស្រាវជ្រាវ និងការបណ្តុះបណ្តាលវិស័យឱសថសាស្រ្តនៅកម្ពុជា។

លោកឧកញ៉ាថ្លែងយ៉ាងដូច្នេះថា៖ «បេ បេ អឹម ជាសហគ្រាសផលិតថ្នាំពេទ្យបារាំងមុនគេ គឺតាំងពីឆ្នាំ១៩៦០មកម៉្លេះ។ យើងចង់ឲ្យពលរដ្ឋខ្មែរ មានផ្នត់គំនិតច្នៃប្រឌិត និងការស្រាវជ្រាវ ត្រូវមានគ្រប់សកម្មភាព និងគ្រប់វិស័យ ព្រោះ ការស្រាវជ្រាវនាំឲ្យកម្ពុជារីកចម្រើន។ ហើយនេះ ជាសកម្មភាពជំរុញលើកទឹកចិត្ត និងគាំទ្រដល់ការស្រាវជ្រាវលើវិស័យឱសថសាស្រ្ត»។       

បើតាមវេជ្ជបណ្ឌិត ហៃ លីអ៊ាង ការស្រាវជ្រាវមិនមែនត្រឹមតែជាការដណ្តើមយកជ័យលាភីនោះទេ ប៉ុន្តែ វាបានធ្វើឲ្យនិស្សិតមានអភិវឌ្ឍន៍ បង្កើតនូវរបកគំឃើញថ្មីៗ និងបណ្តុះបណ្តាលធនធានមនុស្សប្រកបដោយជំនាញច្បាស់លាស់ ដែលជាការរួមចំណែកក្នុងការអភិវឌ្ឍន៍សង្គម។

សូមបញ្ជាក់ថា សហគ្រាសឱសថ បេ បេ អឹម គឺជាសហគ្រាសផលិតឱសថដ៏ចំណាស់ជាងគេនៅកម្ពុជា ដែលបង្កើតឡើងតាំងពីសម័យសង្គមរាស្រ្តនិយម។ បច្ចុប្បន្ននេះ សហគ្រាសនេះ បានផលិតឱសថជាង១០០មុខ និងនាំចេញចំនួន៥០មុខទៅទីផ្សារ១៦ប្រទេស ដែលទីផ្សារធំជាងគេ គឺប្រទេសអាហ្វ្រិច។ ដោយឡែក ឱសថ គីណាល់ ដែលជាឱសថបំបាត់ការឈឺចាប់ ដែលបង្កើតឡើងដោយបណ្ឌិត កុក សុខគីម អស់រយៈពេល៥៨ឆ្នាំនោះ កំពុងមានភាពល្បីល្បាញកាន់តែខ្លាំងនៅទីផ្សារក្នុងស្រុក និងទីផ្សារអន្តរជាតិផងដែរ៕