ជាក់ស្តែងមានក្រុមហ៊ុនចិន និងក្រុមហ៊ុនកម្ពុជា មួយចំនួន កំពុងសិក្សាលទ្ធភាពម៉ៅចម្ការទុរេននៅសហគមន៍កសិកម្មទុរេនបែកអន្លូង ស្ទឹងត្រង់ ដើម្បីនាំចេញទៅកាន់ទីផ្សារចិន។
លោក ហេង ឆេងលី ប្រធានសហគមន៍កសិកម្មទុរេនបែកអន្លូង ស្ទឹងត្រង់ នៅខេត្តកំពង់ចាម បានឱ្យដឹងថា មានក្រុមហ៊ុនចិន ចំនួន៤ និងក្រុមហ៊ុនក្នុងស្រុកចំនួន១ បានចុះមកសិក្សាលទ្ធភាពម៉ៅយកចម្ការទុរេនក្នុងសហគមន៍ខ្លួន ដើម្បីត្រៀមនាំចេញទៅកាន់ទីផ្សារចិន ដោយផ្ទាល់។
តែយ៉ាងណាប្រធានសហគមន៍រូបនេះ បានបញ្ជាក់ថា មកទល់ពេលនេះ ការកំណត់ជាក់លាក់នៃកិច្ចសន្យាទិញលក់ និងតម្លៃយ៉ាងណានោះ នៅពុំទាន់សម្រេចជាផ្លូវការនៅឡើយទេ ដោយរង់ចាំការសម្រេចអនុញ្ញាតនីតិវិធីនាំចេញពីស្ថាប័ននៃប្រទេសទាំងពីរជាមុនសិន ខណៈបច្ចុប្បន្នក្រុមហ៊ុនបានយកឈ្មោះចម្ការនៅក្នុងសហគន៍មួយចំនួនទៅចុះបញ្ជី និងស្នើសុំវិញ្ញាបនបត្រនៃការអនុវត្តកសិកម្មល្អសម្រាប់នាំចេញ។
លោក ហេង ឆេងលី បានឱ្យដឹងដែរថា តាមការទទួលព័ត៌មានពីខាងក្រុមហ៊ុនចិន ទាំងនោះ ការនាំចេញទុរេនទៅកាន់ប្រទេសចិន ទំនងជាអាចសម្រេចបាននៅពេលប្រមូលផលទុរេនដំណាក់កាលទី២នៃឆ្នាំនេះ។
បើតាមប្រធានសហគម៍រូបនេះ តម្លៃទុរេនដែលលក់ទៅឱ្យក្រុមហ៊ុនចិននេះ ទំនងជាមិនខុសគ្នាពីតម្លៃដែលឈ្មួញក្នុងស្រុកម៉ៅយកនាពេលបច្ចុប្បន្នប៉ុន្មាននោះទេ ដោយមានតម្លៃចន្លោះពី១ម៉ឺន២ពាន់រៀល ទៅ១ម៉ឺន៤ពាន់រៀលក្នុងមួយគីឡូក្រាម។
អត្ថបទគួរអាន
ដោយឡែកសម្រាប់តម្លៃទុរេនបែកអន្លូងលក់ឱ្យឈ្មួញរាយបច្ចុប្បន្នមានតម្លៃ១ម៉ឺន៨ពាន់រៀល ខណៈលក់ឱ្យអ្នកទទួលទានផ្ទាល់មានតម្លៃ២ម៉ឺន៥ពាន់រៀល ក្នុងមួយគីឡូក្រាម។ បើតាមលោក ហេង ឆេងលី សហគមន៍កសិកម្មទុរេនបែកអន្លូងស្ទឹងត្រង់ មានសមាជិកចំនួន ១០៦ចម្ការ និងមានផ្ទៃដីដាំដុះទុរេនជាង៥រយហិកតា ដែលមានសមត្ថភាពផ្គត់ផ្គង់ទុរេនប្រមាណ២ពាន់៥រយតោនក្នុងមួយឆ្នាំ។
ជាមួយគ្នានេះ លោក ស៊ីម ថាវរៈ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ចាម បានគូសបញ្ជក់ថា ចម្ការទុរេននៅសហគមន៍កសិកម្មទុរេនបែកអន្លូង ស្ទឹងត្រង់ ពិតជាទទួលបានការចុះមកសិក្សាដើម្បីម៉ៅយកសម្រាប់នាំចេញទៅកាន់ទីផ្សារចិន ពិតប្រាកដមែន។ បើតាមការវាយតម្លៃរបស់ប្រធានមន្ទីររូបនេះ ការនាំចេញទុរេនរបស់សហគមន៍នេះ ទៅកាន់ទីផ្សារចិន ទំនងជាអាចសម្រេចបាននៅក្នុងឆ្នាំនេះ ដ្បិតថា មានម្ចាស់ចម្ការជាច្រើនបានមកស្នើសុំចុះបញ្ជីចម្ការ និងសុំវិញ្ញាបនបត្រនៃការអនុវត្តកសិកម្មល្អសម្រាប់នាំចេញ។ ប្រធានមន្ទីរកសិកម្មរូបនេះ ជឿជាក់ថា នៅពេលទុរេនកម្ពុជា អាចនាំចេញទៅកាន់ប្រទេសចិន បានជាផ្លូវការនោះលោកជឿជាក់ថា ប្រជាកសិករនឹងពង្រីកការដាំដុះរបស់ខ្លួនបន្ថែមទៀតនៅឆ្នាំបន្តបន្ទាប់។
គួរបញ្ជាក់ថា ដើម្បីអាចនាំចេញផ្លែទុរេនស្រស់ទៅកាន់ប្រទេសចិន បានកសិករត្រូវដាក់ពាក្យស្នើសុំចុះបញ្ជីចម្ការ និងរោងចក្រកែច្នៃ និងវេចខ្ចប់ទៅកាន់អគ្គនាយកដ្ឋានកសិកម្មជាមុនសិន បន្ទាប់ពីទទួលបានពាក្យស្នើសុំអគ្គនាយកដ្ឋានកសិកម្ម នឹងចាត់មន្រ្តីជំនាញចុះណែនាំ និងវាយតម្លៃស្របតាមនីតិវិធីបច្ចេកទេស ដូចមានកំណត់ក្នុងពិធីសារ រួចនឹងបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ផ្លែទុរេនស្រស់ទៅកាន់ភាគីគយចិន ដើម្បីភាគីគយចិនចុះមកពិនិត្យ និងវាយតម្លៃបញ្ចប់មុននឹងឈានដល់ការនាំចេញជាផ្លូវការ៕
