ក្រុមប្រឹក្សាប្រតិបត្តិការ របស់អង្គការមូលនិធិរូបិយវត្ថុអន្ដរជាតិ IMF បានសម្តែងនូវទំនុកចិត្តរបស់ខ្លួនទាំងស្រុង ចំពោះអគ្គនាយិកា លោកស្រី គ្រីស្ត្រាលីណា ហ្សកហ្ស៊ីវ៉ា បន្ទាប់ពីបានពិនិត្យឡើងវិញ ជុំវិញការចោទប្រកាន់ថា កាលពីឆ្នាំ២០១៧ ក្នុងតំណែងជាប្រធានធនាគារពិភពលោក លោកស្រីបានដាក់គំនាបលើក្រុមការងាររបស់លោកស្រី ដើម្បីដំឡើងចំណាត់ថ្នាក់ប្រទេសចិននៅក្នុងរបាយការណ៍ចំណាត់ថ្នាក់របស់ធនាគារពិភពលោក «Doing Business»ការធ្វើពាណិជ្ជកម្ម។ ចំណាត់ថ្នាក់ «Doing Business»ការធ្វើពាណិជ្ជកម្ម មានសារៈសំខាន់ណាស់ នៅក្នុងការប្រកួតប្រជែងដើម្បីទាក់ទាញយកក្រុមអ្នកវិនិយោគបរទេស ឲ្យចូលមកបណ្តាក់ទុករកស៊ីក្នុងប្រទេសណាមួយ។
យ៉ាងណាមិញ រដ្ឋមន្ត្រីក្រសួងហិរញ្ញវត្ថុ អាមេរិក លោកស្រី ចានេត យេឡេន (Janet Yellen) បាននិយាយថា លោកស្រីនឹងតាមដានសំណុំរឿងអតីតប្រធានធនាគារពិភពលោក និង បច្ចុប្បន្នជាអគ្គនាយិកា នៃអង្គការមូលនិធិរូបិយវត្ថុអន្តរជាតិ IMFគឺលោកស្រីហ្សក ហ្ស៊ីវ៉ា យ៉ាងដិតដល់ ពិសេសតាមដានដំណើរការវាយតម្លៃការពិត និង ការរកឃើញថ្មីណាមួយដោយ IMF។ លោកស្រីយេឡេន បានអំពាវនាវឱ្យមានការស្រាវជ្រាវឲ្យសកម្មស៊ីជម្រៅមួយ ដើម្បីពង្រឹងសុចរិតភាពទិន្នន័យ និង ភាពជឿជាក់ទៅលើ មូលនិធិរូបយវត្ថុ IMF។
អត្ថបទគួរអាន
ប៉ុន្តែកាលពីសប្តាហ៍មុន លោកស្រី ហ្សក ហ្ស៊ីវ៉ា អគ្គនាយិកា មូលនិធិរូបិយវត្ថុអន្តរជាតិ បានទទួលការគាំទ្រពីប្រទេសបារាំង និង ប្រទេសនៅតំបន់អឺរ៉ុបមួយចំនួនទៀតរួចហើយ នៅឡើយតែ ប្រទេស ជប៉ុន និងសហរដ្ឋអាមេរិក ដែលបានទទូចឲ្យមានការស្រាវជ្រាវបន្ថែមទៀត ខណៈកិច្ចប្រជុំពិភាក្សាដោយ IMF និង World Bank បាននិងកំពុងធ្វើឡើងជាបន្តបន្ទាប់ចាប់តាំងពីសប្តាហ៍មុនមក។
គួរកត់សម្គាល់ថា សម្រាប់សាមីខ្លួន លោកស្រី ហ្សកហ្ស៊ីវ៉ា បានច្រាននូវការចោទប្រកាន់ខាងលើទាំងនេះយ៉ាងដាច់អហង្ការ ហើយបាននិយាយស្វាគមន៍សម្រាប់ការស៊ើបអង្កេតទាំងអស់។
សូមជម្រាបថា បញ្ហាដែលធនាគារពិភពលោកកំពុងជួបប្រទះតាមរយៈសំណុំរឿងរបស់លោកស្រី គ្រីស្តាលីណា ហ្សកហ្ស៊ីវ៉ាពេលនេះ ពិតជាស្ថានការណ៍មួយមិនល្អទាល់តែសោះ។ មិនល្អ ព្រោះវាធ្វើឲ្យប៉ះពាល់ខ្លាំងដល់កេរ្តិ៍ឈ្មោះរបស់ធនាគារពិភពលោក និងធ្វើឲ្យមានការបាត់បង់ជំនឿទុកចិត្តលើស្ថាប័នអន្តរជាតិដ៏ធំមួយនេះ ហើយវាក៏ទំនងជាអាចឈានទៅដល់ការដកដំណែងបច្ចុប្បន្នរបស់លោកស្រី នៅ IMF ផងដែរ ប្រសិនបើគេរកឃើញថាការចោទប្រកាន់ជាការពិត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
