លោក ឌី ខាំបូលី អ្នកនាំពាក្យក្រសួងអប់រំយុវជន និងកីឡា បញ្ជាក់ថា បញ្ហាកូវី-១៩នេះ គឺជាបញ្ហាសកល ដែលការប៉ះពាល់មិនមានត្រឹមតែប្រទេសកម្ពុជាទេ គឺទូទាំងពិភពលោក ជាពិសេសករណីឆ្លងថ្មីមានការកើនឡើងជារៀងរាល់ថ្ងៃ ដែលមិនអាចឲ្យកម្ពុជាធ្វេសប្រហែសបានឡើយ។
លោកបានបន្តថា « វាទាមទារឲ្យមានការចូលពីគ្រប់ភាគីពាក់ព័ន្ធនៅក្នុងការធានាថា ធ្វើម៉េច ទី១កុំឲ្យសិស្សានុសិស្សប្រឈមមុខនឹងហានិភ័យនៃការឆ្លង។ ទី២គឺត្រូវធ្វើម៉េចអប់រំណែនាំ ពន្យល់ ផ្សព្វផ្សាយឲ្យបានទូលំទូលាយនូវវិធានការអនាម័យ និងការបង្ការការពារកុំមានការឆ្លង និងទី៣ធានានូវនិរន្តរភាពនៃការសិក្សា ទោះបីកម្រិតណាក៏ដោយ ក៏ត្រូវឲ្យមានចរន្តរនៃសិក្សាហ្នឹងបន្តតាមរយៈការរៀនអនឡាញ ការរៀននៅតាមផ្ទះ ឬការរៀនជាក្រុមតូចក្រោម១០នាក់ជាដើម»។
អ្នកនាំពាក្យក្រសួងអប់រំរូបនេះ បានបន្ថែមថា អាណាព្យាបាលទាំងអស់ត្រូវចូលរួមជួយជាមួយសាលាដែរ បើសិនជាពួកគាត់យល់ឃើញថា ការមើលប្រព័ន្ធអេឡិចត្រូនិចច្រើននាំឲ្យខូចភ្នែក គួរតែកុំឲ្យលេងហ្គេម ឬមើលកម្មវិធីដែលគ្មានប្រយោជន៍ក្នុងស្មាតហ្វូនច្រើនពេក ព្រោះថា ការប៉ះពាល់គឺជារឿងជៀសមិនផុតទេ នៅក្នុងបរិបទកូវីដ-១៩នេះ គ្រប់គ្នាត្រូវតែប្រឈមមុខ។
អត្ថបទទាក់ទង!
គូសបញ្ជាក់ថា ការលើកឡើងរបស់អ្នកនាំពាក្យក្រសួងអប់រំបែបនេះ ក្រោយពេលមានការលើកឡើងពីអាណាព្យាបាល ក៏ដូចម្ចាស់គ្រឹះស្ថានសិក្សាឯកជនមួយចំនួន ពីផលប៉ះពាល់លើសុខភាពភ្នែក និងសតិអារម្មណ៍ ដោយសារការសិក្សាតាមប្រព័ន្ធអនឡាញនេះ។
ជាស្តែងកាលពីពេលថ្មីៗនេះ នៅលើហ្វេសប៊ុកផ្លូវការមួយរបស់ស្ថាបនិកសាលាអន្តរជាតិវេសហ៍ឡាញ គឺលោក ប៉ិច ប៉ូឡែន បានសរសេរថា៖« យើងត្រូវបន្តរៀនអនឡាញដើម្បីបង្ការការពារការឆ្លងរាលដាលនៃវីរុសកូវីដ-១៩។ ប៉ុន្តែ សិស្ស និស្សិត ជាពិសេសកុមារតូចៗរាប់ម៉ឺននាក់ និងក្រុមគ្រួសារទាំងអស់ក៏កំពុងជួបហានិភ័យជាច្រើនផ្សេងទៀតដូចខាងក្រោម៖
១. ការសិក្សា និងការអភិវឌ្ឍរបស់កុមារមិនបានពេញលេញ ទោះបីសាលាចំណាយថវិកា ធនធាន និងវិធីសាស្ត្របង្រៀនប៉ុនណាក៏ដោយ។
២. ហានិភ័យសុខភាព ជាពិសេសភ្នែក ត្រចៀក (មើលអេក្រង់អេឡិចត្រូនិក និងស្តាប់កាសសំឡេងច្រើនម៉ោងសឹងរៀងរាល់ថ្ងៃ) ឆ្អឹងចង្កេះ ខ្នង ទំរង់រាងកាយ អាចនឹងខូចដោយសារអង្គុយច្រើនម៉ោង។
៣. សិស្សានុសិស្សប្រឈមនឹងបញ្ហាផ្លូវចិត្ត ដែលត្រូវអង្គុយក្នុងបន្ទប់យូរ ដាច់តែឯង ព្រមទាំងអាចមានហានិភ័យផ្សេងៗទៀត តាមបណ្តាញផ្សព្វផ្សាយសង្គម និងអិនធើណិត។
៤. អ្នកអាណាព្យាបាលក៏នឹងអាចមានបញ្ហាតានតឹងផ្លូវចិត្ត ពិបាកបែងចែកពេលវេលាជួយមើលការសិក្សារបស់កូនដោយត្រូវចេញទៅធ្វើការ រកស៊ីផង និងលៃពេលមើលកូនផង។ ពេលនោះ ហឹង្សាក្នុងគ្រួសារក៏អាចនឹងកើតមានឡើង។ ដូចនេះ យើងត្រូវធ្វើបែបណា0x017d7 អ្នកជំនាញ បណ្ឌិតក្នុង ក្រៅប្រទេស ទាំងអស់ជួយរកដំណោះស្រាយផង»។
ក្នុងសំណេរនោះបញ្ជាក់ទៀតថា «ទុកការបារម្ភពី ខ្វះថវិកាបើកឲ្យគ្រូ ការបង្ខំចិត្តឲ្យបុគ្គលិក គ្រូ១ចំនួនសម្រាកពីការងារ និងការអត់លុយឲ្យម្ចាស់ផ្ទះ ព្រមទាំង ហានិភ័យនៃការបិទសាលា១ឡែកសិន»។
យ៉ាងណាមិញ បើតាមលោក ឌី ខាំបូលី ក្រសួងអប់រំមិនទាន់អាចបញ្ជាក់ប្រាប់សាធារណជនពីកាលបរិច្ឆេទនៃការបើកដំណើរការឡើងវិញនូវសាលារៀនគ្រប់កម្រិតបាននោះទេ ដោយពេលនេះក្រសួងកំពុងតែសិក្សាលម្អិតលើបញ្ហានេះនៅឡើយ៕
None
