លោក ហែម សុបញ្ញា ប្រធានផ្នែកទីផ្សារក្រុមហ៊ុនផ្ដល់សេវាទូទាត់ចំណាយតាមអេឡិចត្រូនិក Pi Pay បានលើកឡើងថា ត្រឹមតែរយៈពេលជាង១ខែប៉ុណ្ណោះ ក្រុមហ៊ុន Pi Pay ទទួលបានប្រតិបត្តិការទូទាត់តាមរយៈប្រព័ន្ធអេឡិចត្រូនិកជាមួយទូរស័ព្ទស្មាតហ្វូន ក្នុងទំហំទឹកប្រាក់ជាង ១លានដុល្លារ ដែលក្នុងនោះ លោកបានបញ្ជាក់ថា មានបូករួមទាំងការដាក់ប្រាក់ចូលគណនីរបស់អ្នកប្រើប្រាស់ និងការទូទាត់លើការទិញទំនិញនៅតាមហាងជាង១០០កន្លែងនៅរាជធានីភ្នំពេញ។
យុទ្ធនាការបង្កើតឲ្យមានការលក់បញ្ចុះតម្លៃសម្រាប់អ្នកទិញ រាល់ពេលទូទាត់ជាមួយ Pi Pay បានធ្វើឲ្យក្រុមហ៊ុនមួយនេះ ទទួលបានលទ្ធផលក្នុងដំណាក់កាលដំបូងសឹងមិនគួរឲ្យជឿ។
ជាមួយគ្នានេះដែរ លោក គង់ មាន នាយកគ្រប់គ្រងក្រុមហ៊ុន ទ្រូម៉ាន់នី ប្រចាំកម្ពុជា លើកឡើងថាដែរថា សេវាទូទាត់ចំណាយតាមអេឡិចត្រូនិកនេះ គឺពិតជាមានទំហំទីផ្សារធំធេងណាស់ ខណៈដែលបច្ចុប្បន្ន មានប្រជាជនប្រមាណតែ ១៥% ប៉ុណ្ណោះ ដែលមានប្រើប្រាស់សេវាធនាគារ និង ៨៥% ជាអ្នកប្រើប្រាស់ក្រដាសប្រាក់ក្នុងការទូទាត់រាល់ចំណាយផ្សេងៗ។ ដោយសម្លឹងឃើញពីឱកាសទីផ្សារ ក្រុមហ៊ុនរបស់លោកក៏ត្រៀមនឹងបញ្ចេញសេវាទូទាត់ចំណាយតាមអេឡិចត្រូនិច ឬហៅថា E-Wallet នៅខែកញ្ញាខាងមុខនេះផងដែរ។
តើអ្នកបានអានអត្ថបទនេះ ឬនៅ?
លោកបន្ថែមថា នេះជាឱកាសសម្រាប់ក្រុមហ៊ុនផ្ដល់សេវាកម្មទូទាត់ថ្មីតាមបែបអេឡិចត្រូនិកនេះ អាចបញ្ជ្រៀតខ្លួនចូលទៅក្នុងទីផ្សារមួយនេះ ខណៈដែលសេវាកម្មមួយនេះកំពុងមានការពេញនិយមប្រើប្រាស់យ៉ាងខ្លាំងនៅបណ្ដាប្រទេសអភិវឌ្ឍន៍ជាច្រើន។
យ៉ាងណាក៏ដោយ ការយល់ដឹងពីការប្រើប្រាស់សេវាកម្មនេះសម្រាប់ប្រជាជនកម្ពុជាហាក់នៅមានកម្រិតនៅឡើយ ប៉ុន្ដែ លោក គង់ មាន បានលើកឡើងថា វាមិនមែនជាបញ្ហាចោទជាដុំកំភួននោះទេ ក្នុងការបញ្ជ្រាបចំណេះដឹងប្រើប្រាស់សម្រាប់អតិថិជន ព្រោះប្រជាជនវ័យក្មេងកម្ពុជា ភាគច្រើនមានការចង់ចេះចង់ដឹងពីអ្វីដែលថ្មី ពិសេស លើវិស័យបច្ចេកវិទ្យាតែម្ដង។
លោកលើកជាឧទាហរណ៍ជាក់ស្ដែង ដូចជា ការប្រើប្រាស់ទូរស័ព្ទស្មាតហ្វូន ដែលកាលពីមុនមានមនុស្សជាច្រើនមិនស្គាល់អ្វីទៅជាស្មាតហ្វូនផង តែពេលនេះ ម្នាក់ៗមានកាន់ទូរស័ព្ទប្រភេទនេះប្រើប្រាស់យ៉ាងពេញនិយម។
នៅពេលដែលត្រូវសួរថា តើលោកយល់ឃើញយ៉ាងណាចំពោះការប្រកួតប្រជែង? លោក គង់ មាន បានគូសបញ្ជាក់ថា អាស្រ័យទៅលើការយល់ឃើញរបស់អ្នកប្រើប្រាស់ ទាក់ទងទៅនឹងអត្ថប្រយោជន៍ និងទំនុកចិត្តរបស់ក្រុមហ៊ុនដែលពួកគាត់ជ្រើសរើសយកទៅប្រើប្រាស់។ ពោលគឺ ដើម្បីអាចទូទាត់ចំណាយតាមប្រព័ន្ធអេឡិចត្រូនិកនេះបាន អ្នកប្រើប្រាស់តម្រូវឲ្យមានការបង់ប្រាក់ចូលទៅក្នុងគណនីជាមុនសិន ហើយក្រោយពីដាក់ប្រាក់ចូលទៅហើយនោះ តើពួកគាត់អាចប្រើប្រាស់បានទៅលើអ្វីខ្លះ និងចំណេញអ្វីខ្លះ? ដែលទាំងអស់នេះហើយ គឺជាយុទ្ធសាស្ត្រដែលក្រុមហ៊ុននីមួយៗអាចក្រសោបអតិថិជនមកនៅជាមួយខ្លួនបាន។
អត្ថបទទាក់ទងដែលគួរអាន!
លោកស្រី សូ ផនណារី អនុប្រធាននាយកប្រតិបត្តិ ធនាគារអេស៊ីលីដា បានលើកឡើងដែរថា ការទូទាត់ចំណាយតាមអេឡិចត្រូនិកនេះ កំពុងមានការរីកចម្រើនគួរឲ្យកត់សម្គាល់ ខណៈដែលតម្រូវការប្រើប្រាស់និងការប្រកបអាជីវកម្មតាមអនឡាញកំពុងមានការរីកលូតលាស់ខ្លាំងផងដែរ។
តួយ៉ាង ត្រឹមរយៈពេល ៤ខែប៉ុណ្ណោះ សេវាហិរញ្ញវត្ថុសម្រាប់ទូទាត់ចំណាយតាមអេឡិចត្រូនិករបស់ធនាគារអេស៊ីលីដា គឺសេវា អេស៊ីលីដា ទាន់ចិត្ត មានអ្នកប្រើប្រាស់រហូតដល់ជិត ៩ម៉ឺននាក់។
លោកស្រីបានគូសបញ្ជាក់ថា ចំពោះវិស័យធនាគារហាក់មិនសូវជាប្រឈមនឹងការប្រកួតប្រជែង ជាមួយស្ថាប័នហិរញ្ញវត្ថុមិនមែនធនាគារ ដែលបម្រើសេវាកម្មទូទាត់ចំណាយតាមប្រព័ន្ធអេឡិចត្រូនិកនោះទេ ព្រោះថា ធនាគារ ពិសេស អេស៊ីលីដា គឺមានផ្ដល់នូវជម្រើសប្រើប្រាស់ច្រើនយ៉ាងសម្រាប់អ្នកប្រើប្រាស់ តួយ៉ាង ធនាគារអេស៊ីលីដាមានបណ្ដាញសាខាច្រើនជាគេ មានបណ្ដាញប្រព័ន្ធប្រតិបត្តិការសេវាធនាគារតាមអេឡិចត្រូនិកធំជាងគេ ដូចជា ម៉ាស៊ីន និងកាត ATM និងសេវាធនាគារតាមទូរស័ព្ទជាច្រើនផ្សេងទៀត។
តើអ្នកបានអានអត្ថបទនេះ ឬនៅ?
យ៉ាងណាក៏ដោយ ស្របពេលដែលវិស័យបច្ចេកវិទ្យាដែលបម្រើដល់វិស័យហិរញ្ញវត្ថុកាន់តែមានការជឿនលឿន គួបផ្សំនឹងការប្រែប្រួលនៃឥរិយាបថរបស់អ្នកប្រើប្រាស់ នោះតម្រូវការអតិថិជនលើសេវាហិរញ្ញវត្ថុតាមប្រព័ន្ធអេឡិចត្រូនិកក៏នឹងមានការកើនឡើងផងដែរ ហើយជៀសមិនបំផុតនោះទេ វាក៏នឹងជំរុញឲ្យមានការប្រកួតប្រជែងកាន់តែខ្លាំងឡើងនៅពេលអនាគត។
សូមបញ្ជាក់ថា កន្លងមក ការចំណាយលើការទូទាត់នៅកម្ពុជា មានភាគច្រើនបំផុត គឺធ្វើឡើងតាមរយៈក្រដាសប្រាក់ និងមានមួយចំនួន ទូទាត់តាមរយៈម៉ាស៊ីនឆូតកាត (POS)។ ដោយឡែក ការទូទាត់តាមរយៈប្រព័ន្ធអេឡិចត្រូនិកដោយភ្ជាប់ជាមួយទូរស័ព្ទស្មាតហ្វូនហាក់មិនសូវមានច្រើននៅឡើយទេ ខណៈដែលនៅបណ្ដាប្រទេសអភិវឌ្ឍន៍ជាច្រើនកំពុងមានការពេញនិយមប្រើសេវាកម្មទូទាត់តាមប្រព័ន្ធអេឡិចត្រូនិក៕
None
