គណៈកម្មការអឺរ៉ុបត្រូវបានគេរំពឹងថា នឹងបន្ថែមទណ្ឌកម្មលើកទី ៦ នៅសប្តាហ៍នេះ ដើម្បីប្រឆាំងនឹងរុស្ស៊ីជុំវិញការឈ្លានពានអ៊ុយក្រែន ដែលបានចាប់ផ្តើមឡើងតាំងពីថ្ងៃទី ២៤ ខែកុម្ភៈ ហើយឥឡូវនេះសង្គ្រាមឈ្លានពានមួយនេះ បានឈានចូលដល់ខែទី ៣ហើយ ខណៈទណ្ឌកម្មលើកទី ៦ របស់សហភាពអឺរ៉ុប ត្រូវបានគេរំពឹងថា អាចជាការដាក់ទណ្ឌកម្មទៅលើការឈប់ទិញប្រេងពីរុស្ស៊ី។
ប្រទេសអាឡឺម៉ង់ ដែលជាប្រទេសសេដ្ឋកិច្ចធំជាងគេបំផុតមួយនៅអឺរ៉ុប បានអៈអាងកាលពីថ្ងៃចន្ទថា ខ្លួនបានរៀបចំខ្លួនរួចហើយ ដើម្បីគាំទ្រយ៉ាងពេញទំហឹងទៅលើការហាមឃាត់ បន្ថែមទៀត លើការនាំចេញប្រេងរបស់រុស្ស៊ី។
អធិការបតីអាឡឺម៉ងលោកអូឡាហ្វ ស្កូលស៍ (Olaf Scholz) ដែលមានការប្រុងប្រយ័ត្នជាងមេដឹកនាំលោកខាងលិចផ្សេងទៀត ក្នុងការគាំទ្រអ៊ុយក្រែន បានស្ថិតនៅក្រោមសម្ពាធកាន់តែខ្លាំងឡើង ដើម្បីធ្វើយ៉ាងណាកុំឲ្យសេដ្ឋកិច្ចរបស់ខ្លួនរងផលប៉ះពាល់ខ្លាំង ហើយក៏មិនត្រូវបន្ធូរដៃលើការដាក់សម្ពាធទៅលើរុស្ស៊ីផងដែរ។ ទោះយ៉ាងណា លោក Scholz បានប្តេជ្ញាថា ទណ្ឌកម្ម ដែលលោកខាងលិចបានដាក់ទៅលើទីក្រុងម៉ូស្គូ នឹងមិនត្រូវបានដកចេញវិញទេ លុះត្រាតែប្រធានាធិបតីរុស្ស៊ី លោក វ្ល៉ាឌីមៀ ពូទីន ចុះហត្ថលេខាលើកិច្ចព្រមព្រៀងសន្តិភាពជាមួយអ៊ុយក្រែន ដែលមានការគាំទ្រពីទីក្រុង Kyiv ផងដែរ។ នេះបើយោងតាមទូរទស្សន៍រដ្ឋ ZDF របស់អាល្លឺម៉ង់ ។
អត្ថបទគួរអាន
ប្រធានផ្នែកការទូតរបស់សហភាពអឺរ៉ុបបាននិយាយ ថា សហភាពអឺរ៉ុបសង្ឃឹមថានឹងសម្រេចបាននូវការដាក់ទណ្ឌកម្មជុំទី៦ ប្រឆាំងនឹងរុស្ស៊ីនៅក្នុងកិច្ចប្រជុំបន្ទាប់ នៃក្រុមប្រឹក្សាកិច្ចការបរទេសសហភាពអឺរ៉ុបនៅឆាប់ៗនេះ។
ទោះបីជាយ៉ាងណាក្តី គណៈកម្មការអឺរ៉ុប មិនរាប់បញ្ចូល ប្រទេសហុងគ្រី និង ស្លូវ៉ាគី នៅក្នុងការចូលរួមហ៊ុមព័ទ្ធហាមឃាត់លើការទិញប្រេងពីរុស្ស៊ីនោះទេ ខណៈឥឡូវនេះគណៈកម្មការអឺរ៉ុបកំពុងរៀបចំសម្របសម្រួលពីការពឹងផ្អែករបស់ប្រទេសទាំងពីរលើប្រេងឆៅរុស្ស៊ី។ នេះបើតាមមន្ត្រី សហភាពអឺរ៉ុប ២ រូប ដែលបានអះអាងនៅក្នុងសារព័ត៌មានរ៉យទ័រ។ ប្រទេសហុងគ្រី និងស្លូវ៉ាគី ត្រូវបានគេដឹងថា គឺពឹងផ្អែកខ្លាំងលើប្រេងពីរុស្ស៊ី ហើយថ្មីៗនេះ រដ្ឋាភិបាលហុងគ្រី បានចេញមុខអះអាងរួចហើយ នឹងមិនចុះហត្ថលេខាយល់ព្រមជាមួយសមាជិកផ្សេងទៀតនៃសហភាពអឺរ៉ុបទៅលើការទណ្ឌកម្មចំពោះរុស្ស៊ីលើវិស័យថាមពលនោះទេ។
គួរជម្រាបថា ការកាត់ផ្តាច់អឺរ៉ុបចេញពីប្រេងរុស្ស៊ីទំនងជាងាយស្រួលជាងការកាត់បន្ថយការពឹងផ្អែកលើឧស្ម័នធម្មជាតិរបស់រុស្ស៊ី ខណៈរុស្ស៊ីមានចំណែកផ្គត់ផ្គង់ឧស្ម័នជាង ៤០% ទៅកាន់សហភាពអឺរ៉ុប។ ដើម្បីឆ្លើយតបទៅនឹងទណ្ឌកម្មសហភាពអឺរ៉ុប ទីក្រុងមូស្គូបានទាមទារឱ្យប្រទេសអឺរ៉ុប ដែលទិញឧស្ម័នពីខ្លួន ត្រូវបង់ថ្លៃឧស្ម័នជាប្រាក់រូប្ល ហើយកាលពីសប្តាហ៍មុនទីក្រុងម៉ូស្គូបានកាត់ផ្តាច់ការផ្គត់ផ្គង់ឧស្ម័ន ទៅកាន់ប្រទេសអឺរ៉ុបចំនួន២រួចហើយ គឺប្រទេស ប៉ូឡូញ និងប៊ុលហ្គារី ដោយសារការប្រទេសទាំងពីរនេះ បដិសេធ មិនព្រមបង់ជាប្រាក់រូប្លតាមការទាមទាររបស់រុស្ស៊ី៕
អត្ថបទ៖ វ៉ាន់ ស្រីរ័ត្ន
None
