លោក ខេង វីរ៉ែន អ្នកគ្រប់គ្រងចម្ការលម៉ើតាខ្នា នៅខេត្តកំពង់ធំ បានគូសបញ្ជាក់ថា ទីផ្សារលម៉ើនៅក្នុងចម្ការរបស់លោកនៅឆ្នាំនេះ ហាក់មិនសូវមានការប្រែប្រួលច្រើននោះទេ គឺនៅតែទទួលបានការគាំទ្រច្រើនដូចរាល់ឆ្នាំពីអតិថិជន ដែលពួកគាត់បានមកគាំទ្រទៅទិញដល់ចម្ការផ្ទាល់ ប៉ុន្តែសម្រាប់ការលក់បោះដុំវិញ ហាក់មានការពិបាកលក់ចេញបន្តិចបើធៀបនឹងឆ្នាំមុនៗ ដោយសារតែបញ្ហាសេដ្ឋកិច្ចប្រែប្រួល ក៏ដូចជាសម្ទុះនៃលម៉ើនាំចូលមានចំនួនច្រើន និងមានតម្លៃទាបជាងលម៉ើដាំក្នុងស្រុកផងដែរ។ បើតាមអ្នកគ្រប់គ្រោងចម្ការលម៉ើតាខ្នារូបនេះ តម្លៃលម៉ើនៅចម្ការរបស់លោក គឺអាចលក់បានចន្លោះពី ១០ដុល្លារ ទៅ១៥ដុល្លារក្នុងមួយគីឡូក្រាម។
បើតាម លោក ខេង វីរ៉ែន ការប្រមូលផលលម៉ើនៅចម្ការរបស់លោក គិតមកទល់ពេលនេះ សម្រេចបានប្រមាណ ៥០% ហើយ និងរំពឹងថា ទិន្នផលលម៉ើនៅឆ្នាំនេះទទួលផលបានត្រឹមតែជាង ២០តោន ទៅ៣០តោនប៉ុណ្ណោះ ដែលចំនួននេះបើធៀបនឹងឆ្នាំ២០២១ គឺមានការធ្លាក់ចុះដល់ទៅ ៥០% ទៅ៦០% ឯណោះ។ ការធ្លាក់ចុះទិន្នផលយ៉ាងគំហុកនេះ ត្រូវបានលោក វីរ៉ែន អះអាងថា គឺបណ្តាលមកពីបញ្ហាអាកាសធាតុដែលមានភ្លៀងធ្លាក់ច្រើននៅដើមរដូវ។
អត្ថបទគួរអាន
ដោយឡែក លោក សាន សុខន អ្នកគ្រប់គ្រងចម្ការលម៉ើយ៉ាដា នៅស្រុកសំពៅលូន ខេត្តបាត់ដំបងវិញ បានអះអាងថា ទីផ្សារល្មើរបស់ចម្ការលោកឆ្នាំនេះ ក៏មិនមានការប្រែប្រួលនោះដែរ ពោលគឺការលក់នៅតែទទួលបានការគាំទ្រច្រើនពីអតិថិជន ឬអាចនិយាយបានថា ហាក់ល្អប្រសើរជាងឆ្នាំមុនទៅទៀត។ លោក សុខន បន្ថែមថា ទិន្នផលនៅឆ្នាំនេះ ក៏មិនមានការប្រែប្រួលច្រើននោះដែរ ដែលរំពឹងថានៅឆ្នាំនេះអាចទទួលផលបានចន្លោះពី ១៥តោន ទៅ២០តោន។ សម្រាប់តម្លៃវិញមួយគីឡូក្រាមអាចលក់ចេញក្នុងតម្លៃ ១៥ដុល្លារ សម្រាប់ភ្ញៀវបញ្ជាទិញ និង១២ដុល្លារកន្លះសម្រាប់ភ្ញៀវទៅទិញដល់ចម្ការផ្ទាល់។ លម៉ើរបស់ចម្ការល្មើយ៉ាដា ភាគច្រើនត្រូវបានលក់បោះដុំឲ្យផ្សារលក់ទំនិញម៉ាក្រូ និងទំនើបផ្សេងៗទៀតផងដែរ។ បើតាមម្ចាស់ចម្ការលម៉ើយ៉ាដារូបនេះ បើទោះបីមានការនាំចូលលម៉ើច្រើនពីខាងក្រៅ និងលក់ចេញក្នុងតម្លៃថោកជាងក៏ដោយ ប៉ុន្ដែ លោកកត់សម្គាល់ឃើញថា ប្រជាពលរដ្ឋនៅតែមានការគាំទ្រច្រើនចំពោះ លម៉ើដែលដាំនៅក្នុងស្រុក។
បើតាមការអះអាងរបស់ម្ចាស់ចម្ការដាំដុះលម៉ើខាងលើនេះ ជាមុខដំណាំថ្មីមួយ សម្រាប់កសិករដាំដុះ ជាមួយនឹងតម្លៃខ្ពស់ ប៉ុន្ដែ ការដាំដុះដំណាំនេះ ទាមទារឲ្យឱ្យមានការសិក្សាស្វែងយល់ឲ្យបានម៉ត់ចត់ទាក់ទងនឹងបច្ចេកទេសដាំដុះ និងបញ្ហាអាកាសធាតុជាដើម ហើយវាក៏ត្រូវការចំណាយដើមទុនច្រើនគួរសមដែរ៕
