ការផ្ទុះបាតុកម្មហិង្សាកើតឡើងនេះ ក៏បានធ្វើឲ្យរដ្ឋាភិបាលស្រីលង្កា នៅថ្ងៃសុក្រនេះ បានសម្រេចដាក់បម្រាមគោចរនៅក្នុងតំបន់ជាច្រើននៃរដ្ឋធានីកូឡំបូផងដែរ។
ប្រទេសស្រីលង្ហាជាកោះមួយដែលមានប្រជាជនរស់នៅចំនួន ២២ លាននាក់នោះ បច្ចុប្បន្នកំពុងស្ថិតនៅក្នុងវិបត្តិសេដ្ឋកិច្ចដ៏អាក្រក់បំផុត មិនធ្លាប់មានចាប់តាំងពីទទួលបានឯករាជ្យមក។ វិបត្តិសេដ្ឋកិច្ចនៅប្រទេសនេះកើតឡើង នៅគ្រាដែលរដ្ឋាភិបាលកំពុងខ្វះខាតរូបិយបណ្ណបរទេសយ៉ាងធ្ងន់ធ្ងរដើម្បីទូទាត់សម្រាប់ការនាំចូលទំនិញសំខាន់ៗ។
បើយោងតាមក្រុមមន្ត្រី និងរបាយការណ៍ប្រព័ន្ធផ្សព្វផ្សាយធំៗកាលពីថ្ងៃព្រហស្បតិ៍ បានឲ្យដឹងថា ប្រេងម៉ាស៊ូត ដែលជាឥន្ធនៈសំខាន់សម្រាប់ចាក់រថយន្តក្រុង និងយានជំនិះពាណិជ្ជកម្មផ្សេងៗ គឺមិនមាននៅក្នុងស្តុកនៃស្ថានីយ៍ចាក់ប្រេងទូទាំងប្រទេសនោះឡើយ ដែលធ្វើឱ្យការដឹកជញ្ជូនសាធារណៈត្រូវបានជាប់គាំង។
វិបត្តិសេដ្ឋកិច្ចកាន់តែអាក្រក់ ធ្វើឲ្យជីវភាពប្រជាពលរដ្ឋកាន់តែដុនដាបទៅៗ រហូតដល់មានការផ្ទុះបាតុកម្មតវ៉ាបានកើតឡើងនៅថ្ងៃព្រហស្បតិ៍សប្ដាហ៍នេះ ដោយក្រុមបាតុករបានប្រមូលផ្ដុំគ្នារាប់រយនាក់ អុកឡុកនៅមុខផ្ទះប្រធានាធិបតីស្រីលង្កា លោក ហ្គូតាបាយ៉ា រ៉ាចាប៉ាកសា ស្រែកទាមទារឲ្យលោកចុះចេញពីតំណែង។ សាក្សីដែលនៅក្នុងការកើតហេតុបាននិយាយថា ក្រុមបាតុករខ្លះពាក់មួកសុវត្ថិភាព រំលងរនាំង និងគប់ឥដ្ឋដាក់ក្រុមនគរបាល និងការដុតឡានក្រុងនៅលើផ្លូវនៅក្រៅផ្ទះរបស់លោក ប្រធានាធិបតី វ៉ាចាប៉ាកសា។ក្នុងនោះ ប្រជាជនដែលបានទៅធ្វើបាតុកម្មបានស្រែកឱ្យប្រធានាធិបតី និង ក្រុមគ្រួសារចុះចេញពីតំណែង។ ស្របពេលជាមួយគ្នានោះ ក្រុមប៉ូលីសក៏បានបង្ក្រាបទៅលើបាតុករវិញ បន្ទាប់ពីពួកគេបានបិទផ្លូវអស់រយៈពេលជាង ២ ម៉ោង។
អត្ថបទគួរអាន
អាជ្ញាធរស្រីលង្ការបានដាក់បម្រាមគោចរពេញមួយយប់នៅក្នុងផ្នែកជាច្រើននៃទីក្រុងកូឡុំបូរបស់ប្រទេសស្រីលង្កាកាលពីព្រឹកថ្ងៃសុក្រ បន្ទាប់ពីមានការតវ៉ាជុំវិញការដោះស្រាយវិបត្តិសេដ្ឋកិច្ចដ៏អាក្រក់បំផុតរបស់ប្រទេសនេះផងដែរ។ នៅក្នុងហេតុការណ៍បាតុកម្មនោះ ក៏មានមនុស្សមនុស្សរាប់សិបនាក់ត្រូវបានចាប់ឃាត់ខ្លួន ហើយមន្ត្រីនគបាលជាច្រើននាក់ក៏បានរងរបួសផងដែរ។អ្នកនាំពាក្យខាងនគបាលរបស់ស្រីលង្កាបានអះអាងថា អាជ្ញាធរបានឃាត់ខ្លួនមនុស្ស៥៤នាក់ ហើយរថយន្ដជាច្រើនគ្រឿងរបស់កងកម្លាំងត្រូវបានក្រុមបាតុករដុតកម្ទេចចោល រួមទាំងឡានក្រុងពីរគ្រឿង ឡានប្រភេទJeep ១គ្រឿង និងម៉ូតូជាច្រើនគ្រៀងទៀតផងដែរ។គួរកត់សម្គាល់ថា ការខ្វះខាតប្រេងម៉ាស៊ូតបានបង្កឱ្យមានការខឹងសម្បារនៅទូទាំងប្រទេសស្រីលង្កាក្នុងរយៈពេលប៉ុន្មានថ្ងៃថ្មីៗនេះ ប៉ុន្តែរហូតមកដល់ពេលនេះការតវ៉ាបានកើតមានឡើងតែនៅក្នុងរដ្ឋធានីកូឡំបូប៉ុណ្ណោះ។រដ្ឋមន្ត្រីក្រសួងថាមពលស្រីលង្កា លោក ផាវីត្រា វ៉ាន់នីរាច់ឈី (Pavithra Wanniarachchi) បានប្រាប់អ្នកយកព័ត៌មានថា រដ្ឋាភិបាលកំពុងបិទភ្លើងតាមដងផ្លូវ និង ផ្តាច់ចរន្តអគ្គិសនីរហូតដល់ ១៣ ម៉ោងក្នុងមួយថ្ងៃ ដើម្បីសន្សំសំចៃអគ្គិសនី ខណៈការខ្វះខាតប្រេងម៉ាស៊ូត ដោយសារតែរដ្ឋាភិបាលរូបិយបណ្ណបរទេសគ្រប់គ្រាន់សម្រាប់ការនាំចូលប្រេងឥន្ធនៈជាបន្តបន្ទាប់។
យ៉ាងណាមិញ រដ្ឋាភិបាលអះអាងថា ខ្លួនកំពុងស្វែងរកថវិកាសង្គ្រោះពីមូលនិធិរូបិយវត្ថុអន្តរជាតិ និងធនាគារពិភពលោក រួមទាំងបានរស្នើសុំប្រាក់កម្ចីបន្ថែមពីឥណ្ឌា និងចិនផងដែរ។ ស្ថានភាពលំបាករបស់ប្រទេសស្រីលង្កាគឺកាន់តែធ្ងន់ធ្ងរឡើងដោយសារការួមបញ្ចូលទាំងវិបត្តិជំងឺរាតត្បាត កូវីត ១៩ ដែលបានវាយលុកទេសចរណ៍ និងការផ្ទេរប្រាក់។ អ្នកសេដ្ឋកិច្ច ជាច្រើនក៏បានបន្ទោសទៅលើការគ្រប់គ្រងមិនត្រឹមត្រូវរបស់រដ្ឋាភិបាល រួមទាំងការកាត់បន្ថយពន្ធ និងឱនភាពថវិកាជាច្រើនឆ្នាំផងដែរ៕
អត្ថបទ វ៉ាន់ ស្រីរ័ត្ន
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
