ទិន្នន័យរបស់ Reuters ដដែលបានបង្ហាញថា តំបន់អឺរ៉ុបទាំងមូលមានអ្នកឆ្លងជំងឺកូវីដ១៩ថ្មីៗចំនួនជាង ១លាននាក់នៅក្នុងរយៈពេល៨ថ្ងៃ ខណៈដែលអ្នកស្លាប់សរុបនៅតំបន់អឺរ៉ុប មានចំនួនជាង១លាន៣សែននាក់ហើយ គិតចាប់តាំងពីវត្តមាននៃកូវីដ១៩ដំបូងមក។
គិតមកដល់ម៉ោងនេះ អឺរ៉ុបនៅតែជាតំបន់ដែលរងផលប៉ះពាល់ពីកូវីដ១៩ខ្លាំងជាងគេ បើធៀបនឹងឧបទ្វីប ឬតំបន់ផ្សេងៗទៀតក្នុងពិភពលោក ដោយក្នុងនោះ ករណីឆ្លងនៅអឺរ៉ុប មានប្រហែល២៧% នៃករណីឆ្លងសកល ចំណែកឯករណីស្លាប់វិញមាន ៣១%នៃអ្នកស្លាប់ទូទាំងពិភពលោក។
កំណត់ត្រាតួលេខអាក្រក់បំផុត ដែលអឺរ៉ុបបានកត់ត្រាទុក គឺនៅក្នុងពេលតែ ១៩៤ថ្ងៃប៉ុណ្ណោះ ដែលតួលេខអ្នកឆ្លងបានកើនឡើងនៅអឺរ៉ុបបានហក់ឡើងពី ២៥លាននាក់ ដល់៥០លានយ៉ាងលឿនស្លេវតែម្ដង។
បើគេនិយាយតាមប្រទេសដោយឡែកវិញ ក្នុងចំណោមប្រទេសនៅអឺរ៉ុបទាំងអស់ ចក្រភពអង់គ្លេសជាប្រទេស ដែលរងគ្រោះខ្លាំងជាងគេ ជាមួយនឹងវិធានការបិទខ្ទប់ប្រើពេលយូរជាងគេ មានករណីឆ្លង និងស្លាប់ប្រចាំថ្ងៃដ៏ច្រើន ដោយប្រទេសនេះទើបតែបានដកចេញនូវវិធានការរឹតបន្តឹងទាំងស្រុងកាលពីថ្ងៃចន្ទកន្លងទៅថ្មីៗនេះឯង។
យ៉ាងណាមិញ មិនមែនប្រទេសនៅអឺរ៉ុបទាំងអស់សុទ្ធតែមានវាសនាដូចអង់គ្លេសនោះទេ។ ជាក់ស្តែង បារាំង បានដាក់ចេញវិធានការការពារសាជាថ្មីម្តងទៀតហើយ និងដែលជាវិធានការដ៏តឹងរឹងជាងគេបំផុតនៅអឺរ៉ុប។
អត្ថបទគួរអាន
បារាំងនឹងផ្តើមដាក់ចេញវិធានការសុវត្ថិភាព ដោយតម្រូវឲ្យពលរដ្ឋសូម្បីតែធ្វើដំណើរនៅក្នុងប្រទេសខ្លួនឯង ក៏ត្រូវមានលិខិតបញ្ជាក់ពីការបានចាក់វ៉ាក់សាំងរួច និងបញ្ជាក់ថា ខ្លួនអវិជ្ជមានកូវីដ១៩ដែរ។ ដើម្បីអាចធ្វើដំណើរតាមរថភ្លើង និងយន្តហោះទៅតាមខេត្តឆ្ងាយៗ ចូលញ៉ាំអាហារ មើលកុន និងចូលក្នុងមន្ទីរពេទ្យបាន ពលរដ្ឋបារាំងចាំបាច់ត្រូវតែមានលិខិតបញ្ជាក់នេះ។
ទន្ទឹមនឹងនេះ នៅមានប្រទេសក្នុងតំបន់អឺរ៉ុបផ្សេងទៀតដូចជា ហូឡង់ និងប្រទេសក្រិចជាដើម ក៏បាននិងកំពុងដាក់ចេញវិធានការរៀងៗខ្លួនផងដែរ ក្រោយពីបានកត់ត្រាពីកំណើនករណីវិជ្ជមានក្នុងចំនួនគួរឲ្យព្រួយបារម្ភ។
សូមជម្រាបថា ជាមួយនឹងកំណើនករណីឆ្លងកូវីដ១៩យ៉ាងលឿនរហ័សនៅអឺរ៉ុប ប្រទេសជាច្រើនក្នុងតំបន់មួយនេះ បានបង្កើនល្បឿន និងសម្រុកចាក់វ៉ាក់សាំងកាន់តែច្រើនផងដែរ សូម្បីតែក្មេងជំទង់មិនទាន់ពេញវ័ញ។ ជាក់ស្តែង នៅទូទាំងទ្វីបអឺរ៉ុប ការចាក់វ៉ាក់សាំងទាំងពីរដូសសម្រេចបាន ៤៤%ហើយ ស្មើនឹងជាង ៤៣០លានដូស ឈរនៅលំដាប់ទី២បន្ទាប់ពីប្រទេសចិន ដែលបានចាក់ជាង១ពាន់៤រយលានដូស៕
None
